ខុនដូកម្ពស់៦៩ជាន់ បើកការដ្ឋានសាងសង់នៅជ្រោយចង្វារ

25 ខែវិច្ឆិកា 2019
ព័ត៌មានអចលនទ្រព្យ
8 មើល

ក្រុមហ៊ុន ម័រហ្គេន ហ្វត (Morgan Ford) របស់ប្រទេសចិនបានបោះទុនវិនិយោគ ៦០០ លានដុល្លារដើម្បីសាងសង់អគារកប់ពពកកម្ពស់៦៩ជាន់នៅជ្រោយចង្វារ។

លោក Ding Yongjun អគ្គនាយកក្រុមហ៊ុន ម័រហ្គេន ហ្វត បានឱ្យដឹងនៅក្នុងពិធីបើកការដ្ឋានសាងសង់អគារ Morgan En Maison កាលពីចុងសប្ដាហ៍កន្លងទៅថា អគារខុនដូរ ៦៩ជាន់ មានកម្ពស់ ២២០ម៉ែត្រ នេះមានទីតាំងស្ថិតនៅលើដងទន្លេមេគង្គ ក្នុងខណ្ឌជ្រោយចង្វារ។ នេះបើយោងតាមហ្វេសប៊ុកផ្លូវការរបស់ក្រុមហ៊ុន Morgan។

អគ្គនាយកក្រុមហ៊ុន ម័រហ្គេន ហ្វត បន្តថា “អគារខុនដូនេះសរុបមានចំនួន៥ ជាអក្សរ U នៅលើផ្ទៃដីសរុប ២,៤ ហិចតា។ អគារទាំងអស់មានផ្ទៃក្រឡាសរុបជាង ៤០ម៉ឺនម៉ែត្រការ៉េ”។ ប្រភពខាងលើបន្តទៀតថា បើតាមការគ្រោងទុក អគារនេះនឹងបញ្ចប់ការសាងសង់នៅឆ្នាំ ២០២២។

ឯកឧត្ដម ហោ ណាំហុង ឧបនាយករដ្ឋមន្ត្រី បានមានប្រសាសន៍ថា ការសាងសង់អគារខ្ពស់ៗ កប់ពពក នៅរាជធានីភ្នំពេញ គឺជាការចូលរួមចំណែកក្នុងការអភិវឌ្ឍន៍វិស័យសំណង់ និង បានលើកសម្រស់សោភ័ណភាព និង បង្កើនឱកាសការងារកាន់តែច្រើនឡើងដល់ប្រជាជនកម្ពុជា។ ប្រភពខាងលើបន្ថែម។

ក្រុមហ៊ុនអចលនទ្រព្យ ប៊ុណ្ណា រៀលធី គ្រុប ទើបបានចុះផ្សាយរបាយការណ៍មួយកាលពីខែតុលា ដោយបានបង្ហាញថា បច្ចុប្បន្នភ្នំពេញមានអគារកម្ពស់ចាប់ពី១០០ម៉ែត្រចំនួន ២៣អគារ ក្នុងនោះចាប់ពី ១៥០ម៉ែត្រមាន៦អគារ ខណៈពេលដែល Morgan En Maison កម្ពស់២២០ម៉ែត្រនេះនឹងបន្ថែមកំណត់ត្រាមួយទៀតក្នុងចំណោមអគារដែលខ្ពស់បំផុតនៅភ្នំពេញ៕

- Video Advertisement -