គម្រោងវិនិយោគថ្មីចំនួន ១៧ មានទុន ៣៦៧លានដុល្លារ កំពុងដំណើរការចុះបញ្ជីនៅកម្ពុជា

• Sommana Yan
• 2 ខែ​កញ្ញា 2025
• ព័ត៌មានក្នុងស្រុក
• 136 មើល

កម្ពុជា បន្តទទួលបានគម្រោងវិនិយោគថ្មីចំនួន ១៧ ក្រោមទុនវិនិយោគ ៣៦៧លានដុល្លារ និងអាចបង្កើតការងារបានរហូតដល់ ៧,២ពាន់កន្លែង។ នេះបើយោងតាម“កិច្ចប្រជុំច្រកចេញ-ចូលតែមួយ” លើកទី១២ ដើម្បីពិនិត្យពិភាក្សាលើសំណើសុំចុះបញ្ជីគម្រោងវិនិយោគមានលក្ខណៈសម្បត្តិកាលថ្ងៃទី ១៥ ខែសីហា ឆ្នាំ២០២៥ ។

ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា បានឱ្យដឹងថា គម្រោងវិនិយោគទាំងនេះ មានទុនវិនិយោគសរុបប្រមាណ ៣៦៧លានដុល្លារ អាចបង្កើតការងារបានប្រមាណ ៧,២ពាន់កន្លែង និងមានមុខសញ្ញាវិនិយោគក្នុងវិស័យឧស្សាហកម្មចំនួន ១៥គម្រោង។

គម្រោងថ្មីចំនួន១៥ គឺផ្តោតលើ(ផលិតឧបករណ៍ផ្ទុកថាមពល និងគ្រឿងអគ្គិសនីផ្សេងៗ, ផលិតបន្ទះក្តារកម្រាល និងបន្ទះក្តារសម្រាប់តុបតែងផ្សេងៗ, ផលិតសម្ភារៈកីទ្បា, កែច្នៃផ្លែឈើ, ផលិតសម្ភារៈក្មេងលេង, ផលិតសម្ភារៈតុបតែងសម្រាប់ពិធីបុណ្យ, ផលិតឧបករណ៍ជាងនិងសម្ភារៈបន្ទាប់បន្សំ, ផលិតបរិក្ខារអគ្គិសនីបំភ្លឺនិងគ្រឿងអគ្គិសនីសម្រាប់ប្រើប្រាស់ក្នុងផ្ទះ, បង្កើតសួនឧស្សាហកម្ម, ផលិតបរិក្ខារអគ្គិសនីបំភ្លឺ, គ្រឿងអគ្គិសនីប្រើប្រាស់ក្នុងផ្ទះនិងប្រអប់ដាក់សម្ភារៈជាង, កែច្នៃលោហធាតុ, ផលិតសម្ភារៈប្រើប្រាស់និងសម្ភារៈសម្រាប់ពិធីបុណ្យគ្រប់ប្រភេទពីប្លាស្ទិក, និងផលិតអំពូលភ្លើង និងអំពូលភ្លើងលម្អគ្រប់ប្រភេទ) ។

ដោយឡែក ២គម្រោងទៀត គឺផ្រោតលើវិស័យហេដ្ឋារចនាសម្ព័ន្ធ ក្នុងនោះរួមមាន៖ គម្រោងអភិវឌ្ឍន៍ស្ថានីយប្រព័ន្ធអាគុយស្តុកទុកថាមពលអានុភាព២០០មេហ្គាវ៉ាត់/៤០០មេហ្គាវ៉ាត់ម៉ោងក្នុងខេត្តពោធិ៍សាត់ និងគម្រោងអភិវឌ្ឍន៍ស្ថានីយប្រព័ន្ធអាគុយស្តុកទុកថាមពលអានុភាព៣០០មេហ្គាវ៉ាត់/៦០០មេហ្គាវ៉ាត់ម៉ោងក្នុងខេត្តកំពង់ឆ្នាំង។

គួរបញ្ជាក់ថា គម្រោងវិនិយោគទាំង១៧នេះ នឹងបោះទីតាំងនៅខេត្តតាកែវ  កំពង់ស្ពឺ កំពង់ឆ្នាំង ពោធិ៍សាត់ និងបាត់ដំបង៕

• Investment and Funding