ចិនកំពុងសាងសង់ព្រែកជីកតម្លៃ ១០ប៊ីលានដុល្លារ ភ្ជាប់របៀងទន្លេ និងសមុទ្រខាងលិច

• 30 ខែ​កញ្ញា 2022
• ព័ត៌មានសំណង់
• 8 មើល

ប្រទេសចិន កាលពីថ្មីៗនេះ បានបើកការដ្ឋាសាងសង់ព្រែកជីកខ្នាតធំមួយប្រវែងជាង ១៣៥គម ទិសដៅបង្កើតជាច្រករបៀងភ្ជាប់ទន្លេ និងសមុទ្រភាគខាងលិច ដ៏សំខាន់មួយ។

យោងតាមកាសែត China Daily  គម្រោងនេះមានទីតាំងស្ថិតទីក្រុង Qinzhou នៃតំបន់ស្វយ័ត Guangxi Zhuang ។ ការសាងសង់គ្រោងចំណាយសរុបជាង ១០ ប៊ីលានដុល្លារ  ដោយការដ្ឋានសាងសង់គ្រោងនឹងបញ្ចប់នៅរយៈ ៥៤ ខែ​ ខាងមុខ។

ព្រែកជីកប្រវែង ១៣៥គម នេះ នឹងតភ្ជាប់ពីអាងស្តុកទឹក Xijin ក្នុងទីក្រុង Hengzhou ទៅកាន់ទីប្រជុំជន Luwu នៃស្រុក Lingshan ដែលនឹងបើកឱ្យនាវាឆ្លងចូលទៅឈូងសមុទ្រ Beibu តាមរយៈទន្លេ Qinjiang ។

គោលបំណងព្រែកជីកនេះ គឺដើម្បីពង្រឹងហេដ្ឋារចនាសម្ព័ន្ធដឹកជញ្ជូន ការផ្គត់ផ្គង់ទឹក ប្រព័ន្ធធារាសាស្រ្ត ការការពារទឹកជំនន់ និងការកែលម្អប្រព័ន្ធអេកូឡូស៊ី។

ជាមួយនឹងជម្រៅដ៏ជ្រៅ ប្រឡាយនឹងអនុញ្ញាតឱ្យកប៉ាល់ខ្នាតយក្សដែលអាចផ្ទុកទំនិញរហូតដល់ ៥០០០ តោន ឆ្លងកាត់បាន។ ផ្លូវទឹកថ្មីនេះ ក៏នឹងបន្ធូរបន្ថយសម្ពាធនៃការដឹកជញ្ជូន និងហានិភ័យនៃការធ្វើដំណើរឆ្លងកាត់ទន្លេ Yangtze និងទន្លេ Pearl ។

ប្រឡាយនេះនឹងជួយកាត់បន្ថយការធ្វើដំណើរតាមឈូងសមុទ្រនៅភាគនិរតីនៃប្រទេសចិនប្រមាណ ៥៦០គីឡូម៉ែត្រ ខណៈនឹងជួយសន្សំថ្លៃដឹកដឹកជញ្ជូនបានដល់ជាង ៥ពាន់លានយន់ជារៀងរាល់ឆ្នាំ។

• គម្រោងអភិវឌ្ឍន៍
• Projects Development
• គម្រោងអភិវឌ្ឍន៍