ចិននឹងជួយជួសជុលព្រះបរមរាជវាំងអង្គរ ស្ថាបត្យកម្មបុរាណ ហេដ្ឋារចនាសម្ព័ន្ធ និងសាលា�

• Proeksa Meas
• 20 ខែ​មិថុនា 2018
• Uncategorized
• 62 មើល

សាធារណរដ្ឋចិន កាលពីថ្មីៗនេះបានចុះកិច្ចព្រមព្រៀងជាមួយរដ្ឋាភិបាលកម្ពុជាផ្តល់ជំនួយឥតសំណងរាប់លានដុល្លារក្នុងការជួយជួសជុលព្រះបរមរាជវាំងអង្គរ ស្ថាបត្យកម្មបុរាណនៅខេត្តសៀមរាប ដើម្បីរៀបចំផែនការមេសម្រាប់ប្រព័ន្ធដឹកជញ្ជូននៅកម្ពុជា និងសាងសង់អគារវិទ្យាល័យចំនួន ២៦ នៅទូទាំងប្រទេសកម្ពុជា។

កិច្ចព្រមព្រៀងទាំងនេះត្រូវបានធ្វើឡើងក្នុង ពិធីចុះហត្ថលេខាលើកិច្ចព្រមព្រៀងនៃកិច្ចសហប្រតិបត្តិការហិរញ្ញប្បទានមួយចំនួន និងពិធីប្រកាសជាផ្លូវការនូវគម្រោងហិរញ្ញប្បទានឥតសំណង សម្រាប់ការកែលម្អបរិស្ថានសាលារៀន និងការផ្គត់ផ្គង់សម្ភារ:បរិក្ខារអប់រំនៅទីស្តីការក្រសួងសេដ្ឋកិច្ច និងហិរញ្ញវត្ថុរវាងឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ទេសរដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងអនុរដ្ឋមន្ត្រីក្រសួងពាណិជ្ជកម្ម នៃសាធារណរដ្ឋប្រជាមានិតចិនGao Yan កាលពីថ្ងៃទី ១៩ ខែមិថុនាកន្លងមកនេះ។

យោងតាមសេចក្តីប្រកាសព័ត៌មានរបស់ក្រសួងសេដ្ឋកិច្ចបានឱ្យដឹងថាមានការចុះហត្ថលេខាលើកិច្ចព្រមព្រៀងចំនួន ៣ សំខាន់ៗ រួមមាន ៖ ១) ជំនួយឥតសំណង ២,៥ លានដុល្លារសម្រាប់ការអនុវត្តគម្រោងកាត់បន្ថយយុទ្ធភណ្ឌមិនទាន់ផ្ទុះនៅកម្ពុជា ២)កិច្ចព្រមព្រៀងដើម្បីរៀបចំផែនការមេស្តីពីប្រព័ន្ធដឹកជញ្ជូននៅកម្ពុជារួមមានហេដ្ឋារចនាសម្ព័ន្ធ ទាំងផ្លូវគោក ផ្លូវដែក ផ្លូវទឹក ផ្លូវអាកាស និង ៣)កិច្ចព្រមព្រៀងក្នុងការជួយជួសជុលព្រះបរមរាជវាំងនៅអង្គរ ព្រមទាំងស្ថាបត្យកម្មបុរាណដទៃទៀតនៅក្នុងខេត្តសៀមរាប។

ក្រៅពីកិច្ចព្រមព្រៀងសំខាន់ចំនួន ៣ រដ្ឋាភិបាលចិនក៏បានប្រកាសបើកជាផ្លូវការនូវគម្រោងហិរញ្ញប្បទានឥតសំណងសម្រាប់គម្រោងកែលម្អបរិស្ថានសាលារៀន និងការផ្គត់ផ្គង់សម្ភារៈបរិក្ខារអប់រំផងដែរ។ គម្រោងនេះរួមមាន ជំនួយសាងសង់អាគារវិទ្យាល័យចំនួន ២៦ ខ្នងនិងមជ្ឈមណ្ឌលបណ្តុះបណ្តាលគ្រូចំនួន ៣ ខ្នង នៅរាជធានីភ្នំពេញ ១ ខ្នងខេត្តកំពង់ចាម ១ ខ្នងនិងខេត្តកណ្តាល ១ ខ្នង។

គួរបញ្ជាក់ផងដែរ ចាប់ពីខែកក្កដាឆ្នាំ ២០០១ ដល់ថ្ងៃទី ១៩ខែមិថុនាឆ្នាំ ២០១៨ រដ្ឋាភិបាលចិនបានផ្តល់ជំនួយដល់កម្ពុជាក្នុងទឹកប្រាក់សរុបចំនួនជាង ៥២៧៦ លានដុល្លារដែលក្នុងនោះ ១២២១លានដុល្លារជាជំនួយឥតសំណងនិងឥណទានឥតការប្រាក់។