ចិននឹងបង្កើតរោងចក្រដ៏ធំមួយ កែច្នៃទឹកមាត់ត្រចៀកកាំនៅកម្ពុជាឆាប់ៗនេះ

9 ខែសីហា 2022
Uncategorized
9 មើល

មជ្ឈមណ្ឌល Cambodia (Xiamen) Commercial Center ដែលជាតំណាងមជ្ឈមណ្ឌលពាណិជ្ជកម្មកម្ពុជាប្រចាំទីក្រុង Xiamen នៃខេត្ត Fujian កំពុងសហការជាមួយក្រុមហ៊ុន Southeast Yandu (Xiamen) Industrial Development Co., Ltd គ្រោងនឹងសាងសង់រោងចក្រកែច្នៃទឹកមាត់ត្រចៀកកាំនៅកម្ពុជាឆាប់ៗនេះ ដើម្បីនាំចេញទៅប្រទេសចិន។ នេះបើតាមពិធីចុះហត្ថលេខាលើអនុស្សរណៈយោគយល់គ្នា (MOU) ស្តីពី ” ការនាំចេញផលិតផលសំបុកត្រចៀកកាំទៅកាន់សាធារណរដ្ឋប្រជាមានិតចិន” កាលពីថ្ងៃទី០៨ ខែសីហា ឆ្នាំ២០២២។

ឯកឧត្តមរដ្ឋមន្រ្តី វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានថ្លែងថា កម្ពុជាកន្លងមកផលិតទឹកមាត់ត្រចៀកកាំសម្រាប់ផ្គត់ផ្គង់ឱ្យទីផ្សារក្នុងស្រុក និងមានការនាំចេញក្នុងបរិមាណតិចតូច និងក្រៅផ្លូវការ។

ឯកឧត្តមរដ្ឋមន្រ្តី បានបន្តថា ឯកសារ MOU នឹងជួយបើកទីផ្សារចិន ដែលជាទីផ្សារធំជាងគេឱ្យទទួលយកផលិតផលនេះជាផ្លូវការ ដោយធានាបាននូវស្តង់ដារផលិត គុណភាពផលិតផល និងសុវត្ថិភាពសម្រាប់សុខភាពសាធារណ: ឆ្លើយតបបានតាមលក្ខខណ្ឌតម្រូវភូតគាមអនាម័យនៃអគ្គនាយកដ្ឋានគយចិន។

ឯកឧត្តមបន្ត ផលិតកម្មទឹកមាត់ត្រចៀកកាំ (ការចិញ្ចឹម) ការប្រមូលផល ការកែច្នៃ ត្រូវបានលើកកម្ពស់ និងឆ្លើយតបបានតាមសេចក្តីត្រូវការរបស់ទីផ្សារចិនផងដែរ។

យោងលើរបាយការណ៍របស់អគ្គនាយកដ្ឋានកិសកម្មបានឲ្យដឹងទៀតថា តាមស្ថិតិរបស់រដ្ឋបាលព្រៃឈើក្នុងឆ្នាំ២០២០ នៅទូទាំងប្រទេសមានផ្ទះត្រចៀកកាំចំនួន ៨៧២ផ្ទះ និងអាចផ្តល់ផលចន្លោះពី១តោន ទៅ១,៥តោនក្នុងមួយខែ។

ក្នុងនោះសំបុកត្រចៀកកាំទើបប្រមូលផល មានតម្លៃចាប់ពី៧០០ ទៅ៩០០ដុល្លារ ក្នុងមួយគីឡូក្រាម និងសំបុកត្រចៀកកាំដែលអាចបរិភោគបាន មានតម្លៃចាប់ពី ១ ៥០០ ទៅ២ ០០០ក្នុងមួយគីឡូក្រាម។

- Video Advertisement -