ចំណតរថយន្តក្រោមដីធំជាងគេនៅភ្នំពេញបើកដំណើរការនៅដើមឆ្នាំ២០១៨

• Proeksa Meas
• 3 ខែ​មករា 2018
• Uncategorized
• 517 មើល

ភ្នំពេញ​៖ បន្ទាប់ពីបើកការដ្ឋានសាងសង់នៅចុងឆ្នាំ២០១៥​ ពោលគឺប្រើរយៈពេលសាងសង់ជិត ២ឆ្នាំ​​​​ ទីបំផុតចំណតក្រោមដីធំជាងគេបង្អស់នៅទីក្រុងភ្នំពេញ​​នឹងបើកសម្ពោធឲ្យប្រើ​​​​ប្រាស់ជាផ្លូវការនៅខែមករា​​ ឆ្នាំ២០១៨​ ខាងមុខនេះ។ នេះបើតាមប្រសាសន៍ របស់ប្រធានគ្រប់គ្រងគម្រោងចំណតក្រោមដី នៃក្រុមហ៊ុនវិនិយោគទុនអនិកជនកម្ពុជា​​(OCIC)។ លោក ឈិន ហុក បានថ្លែងប្រាប់សារព័ត៌មានសំណង់​​​​ និងអចលនទ្រព្យឲ្យដឹងថា​​ បច្ចុប្បន្នការសាងសង់ផ្នែកខាងក្នុង​​ និងខាងលើនៃចំណតក្រោមដីនេះបានបញ្ចប់រួចរាល់អស់ហើយ រង់ចំាតែការសាងសង់ផ្លូវ ​៧៧​ ដែលនៅខាងកើតជាប់គម្រោងនេះដែលមិនទាន់បញ្ចប់ការសាងសង់​នៅឡើយ។ លោក​​​ ហុក បានបញ្ជាក់ថា​ ការសាងសង់ផ្លូវ ៧៧ នេះ អាចនឹងបញ្ចប់នៅសប្តាហ៍​​ទី១ ខែមករា​។​ បើយោងតាមប្រសាសន៍របស់ប្រធានគ្រប់គ្រងគម្រោងចំណតក្រោមដីរូបនេះថា ​ ចំណតក្រោមដី ដែលស្ថិតនៅពីមុខព្រះសក្សមុនីចេតិយ៍​​ ចន្លោះអគារកាណាឌីយ៉ា និងអគារវឌ្ឍនៈ​ធំជាងគេមួយនេះ ​មានកម្ពស់ពីរជាន់​​ និងទំហំផ្ទៃក្រឡាសរុបជិត ៩ពាន់ម៉ែត្រការ៉េ​​ ហើយអាចផ្ទុកបាន ៣០៤​ រថយន្ត។