ជប៉ុនផ្ដល់ជំនួយឥតសំណងជាង ៥២លានយេន សាង់សងហេដ្ឋារចនាសម្ព័ន្ធក្នុងខេត្តចំនួន៥

18 ខែមីនា 2021
Uncategorized @km
6 មើល

រដ្ឋាភិបាលជប៉ុន សម្រេចផ្ដល់ជំនួយឥតសំណង់ជាង ៥២លានយេន ឬស្មើនឹងជាង ៤៨ ម៉ឺនដុល្លារអាមេរិក ដើម្បីសាងសង់អគារសុខាភិបាល និងផ្តល់ឧបករណ៍បច្ចេកទេសមួយចំនួន ក្នុងខេត្តមណ្ឌលគិរី ព្រះវិហារ សៀមរាប ព្រះសីហនុ និងខេត្តកំពង់ឆ្នាំង។

ឯកឧត្តម មិកាមិ ម៉ាសាហ៊ីរ៉ូ ឯកអគ្គរាជទូតប្រទេសជប៉ុនប្រចាំនៅកម្ពុជា បានឱ្យដឹងក្នុងពិធីចុះហត្ថលេខាផ្ដល់ជំនួយ កាលពីថ្ងៃទី១៧ ខែមីនា នេះថា ថវិកាជាង៤៨ ម៉ឺនដុល្លារនេះនឹងត្រូវប្រើប្រាស់សម្រាប់គម្រោង ៥ រួមមាន៖

គម្រោងទី១ គឺការតម្លើងឧបករណ៍កែច្នៃកំប្លោកធ្វើជាជីវអេតាណុល ដែលនឹងប្រើថវិកាប្រមាណ ១៦ ដុល្លារ
គម្រោងទី២ នឹងប្រើថវិកាជិត ៩ ម៉ឺនដុល្លារ សម្រាប់ការសាងសង់អគារសម្ភពមួយកន្លែងនៅក្នុងមណ្ឌលសុខភាពទួលក្នុងខេត្តមណ្ឌលគិរី
គម្រោងទី៣ គឺការសាងសង់អគារផ្នែកអ្នកជំងឺសម្រាកពេទ្យមួយកន្លែង នៅខេត្តព្រះវិហារ ក្រោមទឹកប្រាក់ជិត ៩ ម៉ឺនដុល្លារ
គម្រោងទី៤ មានទឹកប្រាក់៤ ម៉ឺនដុល្លារ ដែលនឹងផ្តល់ដល់អង្គការសេហ្វហេវិន ដើម្បីតម្លើងរថយន្តសម្រាប់គ្លីនិកស្តារនីតិសម្បទាចល័ត នៅតំបន់ដាច់ស្រយាលនានា ក្នុងខេត្តសៀមរាប
គម្រោងទី៥ គឺការបំពាក់ឧបករណ៍វេជ្ជសាស្ត្រ ក្នុងគិលានដ្ឋានមិត្តភាពកម្ពុជា-វៀតណាមក្នុងខេត្តព្រះសីហនុ ក្រោមថវិកាចំនួនជិត ៩ ម៉ឺនដុល្លារ

គួរបញ្ជាក់ផងដែរថា ជំនួយនេះជាផ្នែកមួយនៃ កម្មវិធីជំនួយឥតសំណងសម្រាប់គម្រោងសន្តិសុខមនុស្សឬ KUSANONE របស់ជប៉ុន ។

ចាប់តាំងពីឆ្នាំ ១៩៩១ មក រដ្ឋាភិបាលជប៉ុនតាមរយៈកម្មវិធី KUSANONE នេះ បានផ្តល់ថវិកាជាង ៦៣ លានដុល្លារអាមេរិកដល់កម្ពជា ដើម្បីអនុវត្តគម្រោង KUSANONE ចំនួន ៦៤៧ គម្រោង នៅទូទាំងប្រទេស។