ជប៉ុនផ្តល់ជំនួយឥតសំណង ៣២លានដុល្លារ លើគម្រោងប្រព័ន្ធទឹកស្អាតក្រុងតាខ្មៅ

• 2 ខែ​មិថុនា 2020
• Uncategorized @km
• 4 មើល

ហិរញ្ញប្បទានឥតសំណង ក្នុងទំហំទឹកប្រាក់សរុបប្រមាណជា ៣២ លានដុល្លារអាមេរិក​ លើគម្រោងពង្រីកប្រព័ន្ធផ្គត់ផ្គង់ទឹកស្អាតនៅក្រុងតាខ្មៅ ត្រូវបានរដ្ឋាភិបាលជប៉ុន តាមរយៈអង្គការ JICA បានប្រគល់ជូនក្រសួងសេដ្ឋកិច្ច កាលពីថ្ងៃទី ០១ ខែ មិថុនា ម្សិលមិញ។ នេះ បើយោងតាមសេចក្តីប្រកាសព័ត៌មានផ្លូវការរបស់ការិយាល័យ JICA ប្រចាំនៅកម្ពុជា។

ការចេញផ្សាយនោះ​ បានឱ្យដឹងថា កិច្ចព្រមព្រៀងហិរញ្ញប្បទានឥតសំណងសម្រាប់អនុវត្ត គម្រោងពង្រីកប្រព័ន្ធផ្គត់ផ្គង់ទឹកស្អាតនៅក្រុងតាខ្មៅ “Project for the Expansion of Water Supply System in Ta Khmau City” ដែលមានទឹកប្រាក់សរុបចំនួន ៣,៤២១ លានយ៉េន (ប្រមាណជា ៣២ លានដុល្លារអាមេរិក)​ ត្រូវបានចុះហត្ថលេខារួមគ្នារវាងឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ដ្រី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និង លោក Yuichi SUGANO ប្រធានតំណាង JICA ប្រចាំនៅកម្ពុជា។

យោងតាមអង្គការ JICA គោលបំណងនៃការផ្តល់ហិរប្បញ្ញទាននេះ គឺដើម្បីធ្វើវិសិដ្ឋកម្ម ការទទួលបានទឹកស្អាតប្រកបដោយសុវត្ថិភាព សម្រាប់ប្រជាពលរដ្ឋទូទៅ ប្រើប្រាស់នៅក្នុងក្រុងតាខ្មៅ។  កញ្ចប់ថវិកាគម្រោងនេះ នឹងត្រូវយកទៅចំណាយលើការសាងសង់ហេដ្ឋារចនាសម្ព័ន្ធចំនួន ០៤ ធំៗ៖

(១) សាងសង់រោងចក្រប្រព្រឹត្តិកម្មទឹកស្អាត ដែលមានសមត្ថភាពផលិតទឹកស្អាតបាន ៣០.០០០ ម៉ែត្រគូបក្នុងមួយថ្ងៃ

(២)​​ សាងសង់ស្ថានីយបូមទឹកឆៅ និងបំពង់មេនាំទឹកឆៅ

(៣) សាងសង់បរិក្ខារសម្រាប់ចែកចាយ​ទឹកស្អាត និង

(៤) ចំណាយលើការបំពាក់ប្រព័ន្ធ SCADA ព្រមទាំងការផ្ទេរបច្ចេកវិទ្យាសម្រាប់ប្រតិបត្តិការ និងការថែទាំដោយប្រើបទពិសោធន៍ និងចំណេះដឹងពីប្រទេសជប៉ុន ផ្ទាល់តែម្តង។

(អានបន្ថែម)

• គម្រោងអភិវឌ្ឍន៍
• ផ្លូវ និងហេដ្ឋារចនាសម្ព័ន្ធ
• Road and Infrastructure
• Projects Development
• គម្រោងអភិវឌ្ឍន៍