តើឆ្នាំ ២០២១ នៅតែជាឱកាសទិញអចលនទ្រព្យក្នុងតម្លៃទាបទៀតដែរឬទេ?

• 16 ខែ​មីនា 2021
• Uncategorized @km
• 3 មើល

កន្លងមក អ្នកជំនាញជាច្រើនតែងលើកឡើងថា ក្នុងបរិបទកូវីដ ១៩ នេះ គឺជាពេលវេលាល្អក្នុងការវិនិយោគលើអចលនទ្រព្យ ព្រោះអ្នកអាចទិញអចលនទ្រព្យបានក្នុងតម្លៃក្រោមទីផ្សារនិងមានឱកាសលក់ចំណេញច្រើន ក្រោយចប់វិបត្តិកូវីដ ១៩។ នេះជាទស្សនៈទូទៅកាលពីឆ្នាំ ២០២០។

យ៉ាងណាមិញ វិបត្តិកូវីដ ១៩ មិនបានចប់នៅឆ្នាំ ២០២០ ទេ ហើយបន្តយាយីរហូតដល់ឆ្នាំ ២០២១ ដោយថ្មីៗនេះ អ្នកជំនាញបានព្យាករថា ការឆ្លងក្នុងសហគមន៍ ២០ កុម្ភៈ ជះឥទ្ធិពលអវិជ្ជមានយ៉ាងខ្លាំងដល់ទីផ្សារអចលនទ្រព្យនៅកម្ពុជារហូតដល់ត្រីមាសទី ៣ ឆ្នាំ ២០២១ ហើយបញ្ហានេះនឹងនៅតែបន្តធ្ងន់ធ្ងរជាងមុន បើស្ថានភាពឆ្លងក្នុងសហគមន៍មិនអាចគ្រប់គ្រងបាន។ (អានបន្ថែម)

អញ្ចឹង ឆ្នាំ ២០២១ នៅតែជាឱកាសទិញអចលនទ្រព្យក្នុងតម្លៃទាបទៀតដែរឬទេ? ឬក៏ស្ថានភាពផ្លាស់ប្ដូរហើយ?

អ្នកស្រី អាន សុធីតា នាយិកាគ្រប់គ្រងក្រុមហ៊ុន CBRE Cambodia យល់ថា ការទិញអចលនទ្រព្យតម្លៃទាបក្នុងឆ្នាំ ២០២១ នៅតែជាឱកាស «តែត្រូវមានលុយសុទ្ធច្រើន យកទៅទិញមិនអាចខ្ចីធនាគារទិញបានទេប្រសិនបើចង់បានការបញ្ចុះតម្លៃ ៣០% ទៅ ៥០%»។

អ្នកស្រី បន្តថា លុយសុទ្ធ គឺជាអ្វីៗគ្រប់យ៉ាងក្នុងកាលៈទេសៈ ព្រោះធនគារនឹងមិនបញ្ចេញកម្ចីងាយស្រួលឡើយ។ លើសពីនេះ អចលនទ្រព្យលក់បញ្ចុះតម្លៃ ៣០% ទៅ ៥០% គឺមិនតែអ្នកចាំទិញ បើចាំកម្ចីពីធនគារមកទិញគឺពិបាកក្នុងការចាប់យកឱកាសនេះ។

ដោយឡែកនាយិកាគ្រប់គ្រងរូបនេះ បានណែនាំថា ទោះការទិញអចលនទ្រព្យតម្លៃទាប ជាឱកាសក្ដី អ្នកទិញគួរគិតពិចារណាឱ្យបានច្បាស់លាស់ពីលំហូរសាច់ប្រាក់របស់ខ្លួន មុននឹងសម្រេចចិត្ត ព្រោះវិបត្តិកូវីដនៅតែបន្ត ហើយមិនដឹងថានឹងបញ្ចប់នៅពេលណាដូច្នេះអ្នកនឹងអាចកប់លុយយូរជាមួយអចលនទ្រព្យនោះ។

• Investment and Funding
• Knowledge and Key Success