តើអចលនទ្រព្យប្រភេទអ្វី ដែលវិនិយោគហើយចំណេញជាងខុនដូ?

• 14 ខែ​វិច្ឆិកា 2020
• ព័ត៌មានអចលនទ្រព្យ
• 8 មើល

អ្នកជំនាញផ្នែកអចលនទ្រព្យ បានបង្ហើបឱ្យដឹងថា ការវិនិយោគលើអគារការិយាល័យសហកម្មសិទ្ធិ ឬ Strata-Title Office ចាត់ទុកថាជាឱកាសវិនិយោគថ្មីមួយប្រភេទទៀត ដែលអាចទទួលបានផលចំណេញច្រើនជាងវិនិយោគលើខុនដូ។

អគារការិយាល័យសហកម្មសិទ្ធិ គឺជាប្រភេទអចលនទ្រព្យថ្មីមួយប្រភេទដែលបុគ្គល ឬក្រុមហ៊ុនអាចទិញយូនីតការិយាល័យនៅក្នុងអគារខ្ពស់ៗផ្ដាច់ជាកម្មសិទ្ធិផ្ទាល់ខ្លួនបាន ពោលគឺដូចទិញខុនដូអញ្ចឹង។

នាយកប្រតិបត្តិក្រុមហ៊ុន Pointer លោក ងួន ឆាយលាង បានឱ្យដឹងថា ទីផ្សារខុនដូនៅកម្ពុជា គឺចាប់ផ្ដើមចង្អៀត ដូច្នេះបើយើងអាចវិនិយោគលើអ្វីផ្សេងបាន គឺយើងអាចចំណេញច្រើន។

លោកបានបន្ថែមថា៖ «បើមើលតាមទីផ្សារ Office ជួលបានថ្លៃជាង ដូចនៅកន្លែងខ្លះយើងអាចទិញ ១ ម៉ែត្រការ៉េ ៣០០០ដុល្លារ តែជួលទៅវិញបាន ១ ម៉ែត្រការ៉េ ២៥ ដុល្លារ អញ្ចឹងបើយើងគុណទៅវាអាចក្នុងរង្វង់ ១០% ក្នុងមួយឆ្នាំ។ ផ្ទុយពីខុនដូ បើខុនដូយើងអាចជួលបានក្នុងរង្វង់ខ្ពស់បំផុត ៨%។

«លើសពីនេះ ផលចំណេញពីការជួល Office គឺបានរយៈពេលវែង ព្រោះអ្នកជួល Office គាត់អត់ដែលជួល ៦ ខែ ឬ ១ ឆ្នាំ ដូចខុនដូទេ ព្រោះគាត់ចង់មាន Office នៅយូរអង្វែង យ៉ាងតិចណាស់ក៏ ២ ឆ្នាំដែរ»។

លោកបានឱ្យដឹងទៀតថា ក្រៅពីទិញសម្រាប់វិនិយោគ អគារការិយាល័យសហកម្មសិទ្ធិ ក៏ល្អសម្រាប់អ្នកដែលចង់មានការិយាល័យផ្ទាល់ខ្លួន ដែលចំណេញជាងជួលគេជារៀងរាល់ខែ។

គួរបញ្ជាក់ផងដែរថា ទីផ្សារអគារការិយាល័យសហកម្មសិទ្ធិ បានជ្រាតមកទីផ្សារកម្ពុជាចាប់តាំងពីឆ្នាំ ២០១៥ ហើយយោងតាមរបាយការណ៍ពី CBRE Cambodia ផ្ទៃក្រឡាផ្គត់ផ្គង់អគារការិយាល័យសហកម្មសិទ្ធិនៅទីក្រុងភ្នំពេញកើនឡើងជាបន្តបន្ទាប់ចាប់ពីឆ្នាំ ២០១៨ មក ហើយព្យាករណ៍ថានឹងកើនដល់ទៅជិត ៤០ ម៉ឺនម៉ែត្រការ៉េ ក្នុងឆ្នាំ ២០២១។

• អត្ថបទវិភាគ
• ចំណេះដឹង និង បទពិសោធន៍
• ធុរកិច្ច និងទីផ្សារ
• អត្ថបទវិភាគ
• ចំណេះដឹង និង បទពិសោធន៍
• ធុរកិច្ច និងទីផ្សារ