តំបន់ទេសចរណ៍ដ៏ប្រណិតនៅកោះក្របីត្រៀមបើកទទួលសាធារណជនក្នុងពេលដ៏ខ្លីខាងមុខនេះ

• Me Wathana
• 2 ខែ​តុលា 2018
• Uncategorized
• 460 មើល

រូបភាពដោយ Hotels.com

ស្របពេលដែលខេត្តព្រះសីហនុកំពុងត្រូវការកន្លែងស្នាក់នៅបែបប្រណិតជាច្រើនកន្លែងបន្ថែមទៀត គម្រោងអភិវឌ្ឍន៍មួយចំនួនបាននិងកំពុងលេចជារួបរាងឡើងជាបន្តបន្ទាប់។

ក្នុងនោះដែរ រមណីយដ្ឋានបែបធម្មជាតិដ៏ប្រណិតរបស់ប្រទេសថៃឈ្មោះថា Six Senses Krabey Island កំពុងត្រៀមខ្លួនស្វាគមន៍ទេសចរណ៍ជាតិនិងអន្តរជាតិ។យោងតាមសេចក្តីប្រកាសព័ត៌មានរបស់ក្រុមហ៊ុន Six Senses Hotels Resorts Spas ចុះផ្សាយកាលពីចុងខែកញ្ញាឆ្នាំ២០១៨ រមណីយដ្ឋាន Six Senses Krabey Island គឺចាប់ផ្តើមទទួលការកក់បន្ទប់ស្នាក់នៅសម្រាប់ការស្នាក់នៅចាប់ពីថ្ងៃទី ១ ខែ ធ្នូ ឆ្នាំ ២០១៨ តទៅព្រមទាំងមានកញ្ចប់បញ្ចុះតម្លៃពិសេសទៀតផង។

រមណីយដ្ឋាននេះមានទីតាំងស្ថិតនៅកោះក្របីនៃខេត្តព្រះសីហនុ (ធ្វើដំណើរប្រមាណជា ៣០ នាទីពីព្រលានយន្តហោះកងកេង) ហើយគ្របដណ្តប់ទៅលើផ្ទៃដីប្រមាណជា ១៥ ហិកតានៃកោះដែលបានវិនិយោគដោយក្រុមហ៊ុន RPB Investment។ ការរចនារមណីយដ្ឋាន Six Senses គឺបានផ្តោតសំខាន់ទៅលើការអភិវឌ្ឍន៍បែបនិរន្ដរភាពសំដៅដល់ការការពារនិងថែរក្សាបរិស្ថានឲ្យនៅមានលក្ខណៈដូចដើម។

រមណីយដ្ឋាន Six Sensesគឺមានវីឡាដាច់ដោយឡែកពីគ្នារហូតដល់ទៅ ៤០ ដែល វីឡានីមួយៗមានបំពាក់ទៅដោយអាងហែលទឹក និង លម្អដោយសម្ភារធ្វើពីវត្ថុធាតុធម្មជាតិព្រមទាំងបានផ្សារភ្ជាប់ជាមួយនឹងបច្ចេកវិទ្យាទំនើបផងដែរ។

លោក AryArbani ប្រធានផ្នែកទំនាក់ទំនងទីផ្សាររបស់ក្រុមហ៊ុនបានបញ្ជាក់ប្រាប់ទស្សនាវដ្តីសំណង់និងអចលនទ្រព្យយើងខ្ញុំកាលពីថ្ងៃទី ២៩ ខែ កញ្ញា ឆ្នាំំ ២០១៨ ថា៖ «យើង(ក្រុមហ៊ុន) បានសង្កេតឃើញថាកម្ពុជាកំពុងមានការអភិវឌ្ឍន៏យ៉ាងខ្លាំងជាពិសេសក្នុងតំបន់ខេត្តព្រះសីហនុ។ វាមានសារៈសំខាន់ខ្លាំងណាស់ក្នុងការផ្តោតទៅលើកំណើនអភិវឌ្ឍន៏ដែលប្រកបទៅ ដោយនិរន្តរភាព»។

លោក បានបន្ថែមថា គម្រោងនេះគឺជា គម្រោងទីមួយរបស់Six Senses Hotels Resorts Spas នៅកម្ពុជា។ក្រុមហ៊ុននៅតែស្វែងរកឱកាសដើម្បីរីកចម្រើននៅក្នុងប្រទេសកម្ពុជាតាមរយៈការវិនិយោគនានា។

សូមបញ្ជាក់ជូនថា រមណីយដ្ឋាន Six Senses គឺជាសមាជិកមួយរបស់ Six Senses Hotels Resorts Spas ដែលបច្ចុប្បន្នក្រុមហ៊ុនេះមានសណ្ឋាគារនិងរមណីយដ្ឋានជាច្រើនកន្លែងក្នុងប្រទេសចំនួន ២១ ក្នុងទូទាំងពិភពលោក។