តំបន់សំខាន់ៗនៅរក្សាភាពទាក់ទាញវិនិយោគិន

• 3 ខែ​តុលា 2017
• ព័ត៌មានអចលនទ្រព្យ
• 8 មើល

ដីនៅតំបន់សំខាន់ៗកំពុងក្លាយជាកន្លែងកម្រនៅក្នុងរាជធានីភ្នំពេញ។ ជាលទ្ធផល អ្នកអភិវឌ្ឍន៍កំពុងងាកទៅរកតំបន់ថ្មីផ្សេងទៀត។ តំបន់បឹងកេងកង១ និងកោះពេជ្រ បន្តនៅជាតំបន់ដែលគួរឲ្យចង់បានបំផុតសម្រាប់ខុនដូប្រណីត ហើយតំបន់មាត់ទន្លេជ្រោយចង្វារកំពុងតែក្លាយជាតំបន់សំខាន់ថ្មីមួយទៀត។

ទីតាំងមិនមែនជាកត្តាតែមួយគត់ដែលនាំឲ្យតម្លៃខ្ពស់នោះទេ។ ក្នុងវិស័យអចលនទ្រព្យ ទីតាំងល្អៗក៏ត្រូវការវត្តមាននៃការអភិវឌ្ឍន៍សម្រាប់ការប្រើប្រាស់ចំរុះផ្សេងៗទៀតផងដែរ ឧទាហរណ៍ដូចជា បណ្តុំសណ្ឋាគារល្អៗ ហាងលក់រាយ និងសាលារៀនដែលមានគុណភាពស្រដៀងគ្នា។ ដោយសារហេតុផលនេះ ខុនដូនៅតំបន់បឹងកេងកង១ មានភាពងាយស្រួលក្នុងការជួលដោយទទួលបានផលល្អខ្លាំង ព្រោះថាវាមានទីតាំងល្អស្ថិតនៅជិតសួនឧទ្យាន និងសាលាអន្តរជាតិជាច្រើន។

តំបន់បឹងកេងកង១ មានតម្លៃក្នុងមួយម៉ែត្រការ៉េខ្ពស់ជាងគេក្នុងរាជធានីភ្នំពេញ។ តម្លៃទាក់ទាញបំផុតសម្រាប់ការវិនិយោគខុនដូនៅទីតាំងនេះគឺពី ២.៥០០ ដុល្លារ ទៅ ៣.៥០០ដុល្លារ ក្នុងមួយម៉ែត្រការ៉េ។ យូនីតខុនដូលំដាប់ខ្ពស់នៅតំបន់នេះងាយស្រួលជួលដោយទទួលបានផលល្អខ្លាំង ព្រោះវាមានទីតាំងល្អនៅជិតសួនឧទ្យាន និងមាត់ទន្លេ។ ជាទូទៅ វាជាការពិបាកណាស់ក្នុងការស្វែងរកដីដើម្បីអភិវឌ្ឍគម្រោងលំនៅដ្ឋានខ្ពស់ៗអមដោយទេសភាពសួនឧទ្យាននៅរាជធានីភ្នំពេញ។ ដោយសារមូលហេតុនេះ ទើបតំបន់បឹងកេងកង១ មានអត្រាតម្លៃខ្ពស់ខ្លាំង។

ដោយសារតែភាពខ្វះខាតដីសម្រាប់ការអភិវឌ្ឍថ្មី ក្រុមហ៊ុនអភិវឌ្ឍន៍ខុនដូប្រណីតៗ បានផ្លាស់ទៅតំបន់បឹងកេងកង២ និងតំបន់បឹងកេងកង៣ ក្នុងរយៈពេលពីរឆ្នាំចុងក្រោយនេះ។

ទោះជាយ៉ាងណាក៏ដោយ តំបន់ដែលមានប្រជាប្រិយភាពបំផុតសម្រាប់គម្រោងលំនៅដ្ឋានប្រណីតជាមួយនិងតម្លៃលក់ខ្ពស់ នៅតែស្ថិតនៅក្នុងតំបន់បឹងកេងកង១ និងឆ្ពោះទៅតំបន់មាត់ទន្លេ។ កាលពីមុន អ្នកអភិវឌ្ឍន៍បានផ្តល់នូវគម្រោងជាច្រើននៅក្នុងតំបន់នេះ ចាប់ពីអចលនទ្រព្យកម្រិតមធ្យម ដល់អចលនទ្រព្យប្រណីត។ ប៉ុន្តែគម្រោងថ្មីដែលបានបើកដំណើរការនាពេលថ្មីៗ បានប្តូរទៅជាការអភិវឌ្ឍប្រណីត។

នេះរួមបញ្ចូលទាំង Embassy Central និង 352 Platinum ព្រមទាំងគម្រោង Imperial Crown Condominium ដែលទើបដាក់បង្ហាញថ្មីៗដោយក្រុមហ៊ុនតៃវ៉ាន់ Rock Stone International។ ដោយសារដីមានកំណត់សម្រាប់ការអភិវឌ្ឍនាពេលអនាគត វាបានធ្វើឲ្យតម្លៃដីកើនឡើងខ្ពស់ខ្លាំង សម្រាប់គម្រោងខុនដូកម្រិតទាបដល់កម្រិតមធ្យម។ ដូច្នេះ ទិសដៅថ្មីសម្រាប់គម្រោងលំនៅដ្ឋានប្រណីត គឺតំបន់បឹងកេងកង២ និងបឹងកេងកង៣ និងតំបន់មាត់ទន្លេជ្រោយចង្វារ។

លោក Chhayleang Nguon នាយកប្រតិបត្តិក្រុមហ៊ុន Ratanaka Realty បានពន្យល់ថា “ខ្ញុំគិតថាតម្រូវការយូនីតលំនៅដ្ឋាននៅតាមតំបន់សំខាន់ៗនៅរាជធានីភ្នំពេញនៅតែមានទំហំធំ។ ខ្ញុំមើលឃើញថា មនុស្សនឹងមានភាពធុញទ្រាន់នឹងការធ្វើដំណើរវិលត្រឡប់ទៅមកពីផ្ទះទៅកន្លែងធ្វើការហើយជាប់គាំងនៅក្នុងចរាចរណ៍។ ការរស់នៅក្នុងខុនដូនឹងជួយសន្សំសំចៃពេលវេលា និងថវិកា។ ពួកគេក៏មានពេលវេលាល្អៗដើម្បីនៅជាមួយគ្រួសាររបស់ពួកគេផងដែរ ប្រសិនបើពួកគេជ្រើសរើសរស់នៅក្នុងខុនដូនៅតំបន់សំខាន់ៗ”។

ផ្សារទំនើបថ្មីពីរមានទីតាំងស្ថិតនៅតាមបណ្តោយមហាវិថីរូស្ស៊ី The Gateway Shopping Arcade និង Parkson Mall ។ តម្លៃមធ្យមរបស់ The Gateway បានកើនឡើងជិតដល់ជាង ៣០០០ ដុល្លារ ក្នុងមួយម៉ែត្រការ៉េ។ គួរកត់សម្គាល់ថា តម្លៃយូនីតខុនដូនៅតាមដងផ្លូវធំៗមានតម្លៃខ្ពស់ជាងខុនដូដែលមានទីតាំងនៅតាមផ្លូវក្នុង។

ការចាប់ផ្តើមនៅក្នុងទីផ្សារលំនៅដ្ឋានប្រណីតមានការយឺតយ៉ាវ ដោយសារអ្នកអភិវឌ្ឍន៍ពិបាកស្វែងរកទីតាំងល្អសម្រាប់ការអភិវឌ្ឍ។ ផ្ទុយទៅវិញ ដោយសារតែទីផ្សារមិនសូវសកម្ម និងថមថយពីចំណាប់អារម្មណ៍ ក្រុមហ៊ុនអភិវឌ្ឍន៍មួយចំនួនមិនមានភាពប្រញាប់ប្រញាល់ក្នុងការចាប់ផ្តើមបង្ហាញនូវគម្រោងប្រណីតថ្មីៗនោះទេ។ ទន្ទឹមនឹងនេះដែរ ពួកគេបន្តផ្តល់តម្លៃខ្ពស់សម្រាប់ដីនៅតំបន់សំខាន់ៗ។ ការលក់គម្រោងដែលមានស្រាប់ និងការលក់បន្ត ក៏ទទួលរងផលប៉ះពាល់ផងដែរ ដោយសារតែអ្នកទិញ និងវិនិយោគិនបាននៅរង់ចាំមើលស្ថានភាពសិន។

ប៉ុន្តែការលក់គួរតែមានភាពល្អក្នុងរយៈពេលវែង ដោយពិចារណាពីតម្រូវការជាបន្តបន្ទាប់សម្រាប់ការវិនិយោគរយៈពេលវែង និងពីអ្នកទិញសម្រាប់ប្រើប្រាស់ឬរស់នៅ។ ជាលទ្ធផល តម្លៃដើមទុននៃយូនីតខុនដូក្នុងទីតាំងល្អបំផុតនឹងបន្តកើនឡើងក្នុងរយៈពេលប៉ុន្មានឆ្នាំខាងមុខនេះ។ ទោះបីជាតម្លៃនឹងមិនកើនឡើងខ្លាំងជារៀងរាល់ឆ្នាំក៏ដោយ ក៏តម្លៃអាចនឹងកើនឡើងពី ៣០ ទៅ ៤០ ភាគរយនៅឆ្នាំ ២០២០ ដល់ឆ្នាំ ២០២៥។ យោងតាមលោកស្រី ចាន់ ម្លប់សុខា មកពីការិយាល័យមេធាវីសុខា បានឲ្យដឹងថា “ក្នុងរយៈពេល ៣ ទៅ ៤ឆ្នាំខាងមុខ ខ្ញុំជឿជាក់ថាតម្លៃយូនីតខុនដូលំនៅឋានដែលនៅមានតម្រូវការនឹងកើនឡើងសមរម្យ”។

• ចំណេះដឹង និង បទពិសោធន៍
• ចំណេះដឹង និង បទពិសោធន៍