ត្រីមាសទី១ ឆ្នាំ ២០២៣ តើទីផ្សារអចលនទ្រព្យមានស្ថានភាពយ៉ាងណា?
វិបត្តិសេដ្ឋកិច្ចពិភពលោក បញ្ហាអចលនទ្រព្យចិន និងកត្តាសង្គ្រាមនៅអ៊ុយក្រែន នៅតែបន្ដដាក់សម្ពាធដល់ទីផ្សារអចលនទ្រព្យកម្ពុជា ដូច្នេះទាំងអ្នកទិញ អ្នកអភិវឌ្ឍ និងវិនិយោគិនក្នុងវិស័យនេះ ត្រូវតែធ្វើទំនើបកម្មលើផ្ដត់គំនិត និងរបៀបធ្វើអាជីវកម្មថ្មី ទើបអាចរក្សាលំនឹងក្នុងទីផ្សារបាន។
វិនិយោគិន ឬអ្នកប្រកបអាជីវកម្មក្នុងវិស័យអចលនទ្រព្យភាគច្រើន កំពុងអង្គុយរង់ចាំឱ្យទីផ្សារត្រឡប់មកប្រសើរដូចមុនវិបត្តិកូវីដ ប៉ុន្តែជាក់ស្ដែងទីផ្សារអាចនឹងត្រឡប់ទៅរកសភាពដើម ឬយ៉ាងណា នៅមិនទាន់ដឹងនៅឡើយទេ។ គ្រប់យ៉ាងត្រូវបានផ្លាស់ប្ដូរហើយ ខណៈវិធីសាស្រ្តធ្វើអាជីវកម្មដែលធ្លាប់ប្រើកន្លងមក ហើយជោគជ័យកាលពីសម័យមុនវិបត្តិកូវីដ ក៏អាចនឹងមិនអាចប្រើបាននាពេលបច្ចុប្បន្ននេះទេ។
និយាយឱ្យងាយយល់ ចង់ក្លាយជាសេដ្ឋីពីទីផ្សារអចលនទ្រព្យ គឺមិនងាយដូចមុននោះទេ ដូច្នេះវិនិយោគិនត្រូវមានទាំងចំណេះដឹង និងចំណេះធ្វើពិតប្រាកដ ទើបជោគជ័យក្នុងទីផ្សារបរិបទថ្មីនេះបាន។
ឧទាហរណ៍ ការបំប៉ោងតម្លៃដីធ្លីលក់ចេញទិញចូល ក្នុងរយៈពេលខ្លី ដែលជាប្រភពរកចំណូល ដ៏ងាយស្រួលកាលពីមុន ប៉ុន្តែបច្ចុប្បន្នមិនស្រួលដូចមុនទៀតឡើយ ដោយសារកង្វះវិនិយោគិនក្រៅប្រទេស និងភាពប្រុងប្រយ័ត្នក្នុងការប្រើប្រាស់សាច់ប្រាក់របស់វិនិយោគិន។
អ្នកវិនិយោគិនត្រូវដឹងពីលំហូរសាច់ប្រាក់របស់ខ្លួនឱ្យបានច្បាស់ និងវិភាគលើសក្ដានុពលអចលនទ្រព្យឱ្យបានជាក់លាក់ មុនសម្រេចចិត្តវិនិយោគ។ អចលនទ្រព្យដែលទាក់ទិននឹងវិស័យទេសចរណ៍ និងវិស័យឧស្សាហកម្ម ចាត់ទុកថាកំពុងមានសក្ដានុពុល ដោយសារលំហូរភ្ញៀវទេសចរ ដែលរំពឹងពីកីឡាស៊ីហ្គេម និងការធ្វើពិពិធកម្មរោងចក្រផលិតរបស់ក្រុមហ៊ុនធំៗ ក្រោយវិបត្តកូវីដ។
ការវិភាគខាងលើគឺយោងតាមរបាយការណ៍របស់ ភ្នាក់ងារអចលនទ្រព្យអន្តរជាតិ CBRE Cambodia ដែលចេញផ្សាព្វកាលពីថ្មីៗនេះ។ របាយការណ៍នេះ ក៏បានសរុបពីស្ថានភាពរបស់ផ្នែកនីមួយៗ នៃទីផ្សារ ក៏ដូចជានិន្នារការថ្មីៗ ដែលនឹងកើតមានផងដែរ។
បូរី
ត្រីមាសទី១ ឆ្នាំ ២០២៣ មានគម្រោងថ្មីៗ ៤ ដែលប្រកាសលក់ និងមានគម្រោងបញ្ចប់ការសង់មានចំនួន៧ ប៉ុណ្ណោះ ដែលជាចំនួនតិចតួចបំផុត ក្នុងពេល ៥ ឆ្នាំចុងក្រោយនេះ ។ ជារួម ចំនួននៅមិនទាន់រឹងមាំ ខណៈតម្លៃលក់នៅតែមានស្ថេរភាព ឬផ្លាស់ប្តូរបន្តិចបន្តួចប៉ុណ្ណោះដែរ។
យោងតាមរបាយការណ៍ ការធ្លាក់ចុះនៃចំនួនបូរីថ្មីៗ គឺដោយសារការដំឡើងអត្រាការប្រាក់ និងភាពតឹងរ៉ឹងនៃកម្ចីធនាគារ។ ដូច្នេះ និន្នាការថ្មី ឃើញអ្នកអភិវឌ្ឍភាគច្រើន កំពុងស្វែងរកការបណ្តាក់ទុនរួម ដើម្បីធ្វើឱ្យលំហូរសាច់ប្រាក់មានស្ថេរភាព និងរស់បានក្នុងទីផ្សារបែបនេះ។
ខុនដូ
ទីផ្សារខុនដូនៅតែប្រឈមនឹងបញ្ហាខ្លាំង។ អតុល្យភាពរវាងការផ្គត់ផ្គង់ និងតម្រូវការនៅតែមាន ខណៈពេលដែលតម្លៃលក់កំពុងស្រុតចុះផងដែរ។ ខុនដូ ១.៣០០ យូនីតថ្មីត្រូវការប្រកាសលក់ ខណៈចំនួន ៣៩.០០០ យូនីត បានបញ្ចប់ការសាងសង់ ។ នៅចុងឆ្នាំ ២០២៣ ការផ្គត់ផ្គង់នឹងមានដល់ទៅ ៥៨.០០០ ដែលជាចំនួនខ្ពស់គួរឱ្យបារម្ភ។
អ្វីដែលធ្វើឱ្យទីផ្សារកាន់ដែលរងសម្ពាធគឺ ការកើនឡើងនៃចំនួនខុដដូថ្មី បើទោះបីជាការលក់ធ្លាក់ចុះ ខណៈវិនិយោគិនក្រៅប្រទេសនៅមិនទាន់ត្រឡប់មកវិញ។ ទីផ្សារបច្ចុប្បន្នផ្ដោតលើអ្នកទិញក្នុងស្រុក ដូច្នេះម្ចាស់គម្រោងត្រូវបង្ខំចិត្តបញ្ចុះតម្លៃច្រើន ដើម្បីបង្កើនការលក់។
ផ្សារទំនើប
មានផ្សារទំនើបបើកថ្មីត្រឹមតែ ១ ប៉ុណ្ណោះ ក្នុងត្រីមាសនេះ។ ការធ្លាក់ចុះនេះជាសញ្ញាល្អបន្តិច ព្រោះកន្លងមក ការផ្គត់ផ្គង់គឺកើនឡើងខ្ពស់។ ត្រឹមចុងឆ្នាំ ២០២៣ ការផ្គត់ផ្គង់នឹងមានដល់ទៅ ៧៥០.០០០ ម៉ែត្រការ៉េ ដែលនឹងបន្តដាក់សម្ពាធលើតម្លៃជួល និងអត្រានៃការជួល។
តំបន់ភាគខាងត្បូងនៃរាជធានីភ្នំពេញ គឺជាចំណុចផ្ដុំនៃគម្រោងថ្មីៗ ដែលបច្ចុប្បន្នមានចំនួន ៥ ទីតាំង ខណៈ ៨ ទៀត ត្រៀមនឹងសាងសង់។ ចំនួននេះ គឺមានដល់ទៅជិត ៣០% នៃផ្សារទំនើបទាំងអស់នៅភ្នំពេញ។
ការិយាល័យ
ចុងឆ្នាំ ២០២៣ ការផ្គត់ផ្គង់នឹងកើតដល់ជាង ១លានម៉ែត្រការ៉េ ដែលជាចំនួនខ្ពស់ ហើយដាក់សម្ពាធដល់ទីផ្សារ។ បច្ចុប្បន្នឃើញថា អ្នកអភិវឌ្ឍមានបញ្ហាសាច់ប្រាក់ ហើយផ្អាកគម្រោង ខណៈក៏កំពុងព្យាយាមដាក់លក់អគារដែលសង់មិនទាន់រួចទាំងនោះផងដែរ។ ទន្ទឹមនឹងនោះ សម្រាប់ម្ចាស់អគារ គឺដល់ពេលហើយដែលត្រូវកែលម្អអគាររបស់ខ្លួន ដើម្បីតាមទាន់ទីផ្សារ និងរក្សាអ្នកជួលដែលមានស្រាប់។
- Video Advertisement -
English 
ខ្មែរ 
