ទីផ្សារខុនដូរនៅថៃកំពុងប្រឈមការជាប់គាំងជាមួយនឹងយូនីតជាង ៤៥ម៊ឺន លក់មិនចេញ

• 17 ខែ​ឧសភា 2019
• ព័ត៌មានអចលនទ្រព្យ
• 7 មើល

ទីផ្សារខុនដូរនៅប្រទេសថៃកំពុងប្រឈមនឹងការផ្គត់ផ្គង់ហួសតម្រូវការជាមួយនឹងខុនដូរចំនួនជាង ៤៥០ ០០០ យូនីតនៅទូទាំងប្រទេសលក់មិនចេញក្នុងឆ្នាំ២០១៨ នេះបើយោងតាមសារព័ត៌មានអន្តរជាតិផ្នែកសេដ្ឋកិច្ច Bloomberg ។

កាលពីថ្ងៃទី ១៦ ខែឧសភា ឆ្នាំ ២០១៩ សារព័ត៌មានខាងលើបានចុះផ្សាយថា អាផាតមិនចំនួនប្រមាណជា ៦៥០០០យូនីតត្រូវបានផ្គត់ផ្គង់ចូលទៅក្នុងទីក្រុងបាងកក ខណៈដែល លំនៅដ្ឋានប្រមាណជា ៤៥៤ ៨១៤ យូនីត នៅទូទាំងប្រទេសថៃ ជាប់គាំងលក់មិនចេញក្នុងឆ្នាំដូចគ្នា ដែលនេះគឺមានតម្លៃប្រមាណជា ៤១ ពាន់លានដុល្លារអាមេរិក។

«ទីផ្សារខុនដូរជារួមនឹងមានល្បឿនយឺតនៅឆ្នាំនេះ ប៉ុន្តែ នៅតែមានឱកាសក្នុងទីតាំងមួយចំនួនដែលមានផលិតផលត្រឹមត្រូវចំគោលដៅក្នុងតម្លៃសមរម្យ» អ្នកនាង Aliwassa Pathnadabutr នាយកគ្រប់គ្រងក្រុមហ៊ុនអចលនទ្រព្យ Thailand CBRE បានប្រាប់សារព័ត៌មានខាងលើយ៉ាងដូច្នេះ ។

ការធ្លាក់ចុះនៃទីផ្សារនេះ គឺបានកើតឡើងបន្ទាប់ពីរដ្ឋាភិបាលថៃបានរឹតបណ្តឹងលក្ខខណ្ឌផ្តល់ប្រាក់កម្ចីទិញផ្ទះសម្រាប់អ្នកទិញផ្ទះទីពីរដែលត្រូវបានអនុវត្តនៅក្នុងខែមេសាកន្លងទៅនេះ។ ការរឹតបណ្តឹងនេះ មានគោលបំណងដើម្បីកែលម្អស្តង់ដារឥណទាន និងដើម្បីរារាំងសកម្មភាពការទិញអលនចទ្រព្យដោយប្រថុយប្រថាន។

ការប៉ះទង្គិចខាងលើនេះ គឺក៏កើតឡើងដោយសារប្រទេសថៃពឹងផ្អែកខ្លាំងលើអ្នកទិញបរទេសដែលភាគច្រើនគឺជាជនជាតិចិន។

ប្រភពខាងលើបានដកស្រងរបាយការណ៍ CBRE ថា៖ «ភាគច្រើននៃអ្នកទិញបរទេសនាពេលថ្មីៗនេះគឺវិនិយោគិន ហើយ CBRE មានការសង្ស័យថាពួកគេនឹងមិនរស់នៅក្នុងលំនៅដ្ឋានដែលពួកគេបានទិញ។ ការលក់ឲ្យជនបរទេស គឺរសើបខ្លាំងណាស់ចំពោះស្ថានភាពសេដ្ឋកិច្ចនៃប្រទេសកំណើតរបស់អ្នកទិញ»។

• គម្រោងអភិវឌ្ឍន៍
• ធុរកិច្ច និងទីផ្សារ
• គម្រោងអភិវឌ្ឍន៍
• ធុរកិច្ច និងទីផ្សារ