ទីផ្សារបូរីនៅតែមានសន្ទុះ ខណៈ៦ ខែចុងក្រោយ មានគម្រោងថ្មីបើកលក់សរុប ៣៩ គម្រោង

• 7 ខែ​មេសា 2022
• ព័ត៌មានអចលនទ្រព្យ
• 11 មើល

ទោះជាវិបត្តិកូវីដនៅតែបន្ដក្ដី ទីផ្សារបូរីនៅតែមានភាពរឹងមាំជាងគេ បើធៀបនឹងប្រភេទអលចនទ្រព្យផ្សេងទៀត ពិសេសសម្រាប់គម្រោងតម្លៃទាប ទៅមធ្យម ខណៈ ៦ ខែ ចុងក្រោយនេះ ឃើញថាមានគម្រោងប្រកាសលក់ថ្មីដល់ទៅ ៣៩ គម្រោង។

នេះបើយោងតាមរបាយការណ៍របស់ទីភ្នាក់ងារអចលនទ្រព្យ CBRE Cambodia ចេញផ្សាយកាលពីថ្ងៃទី ៧ មេសា នេះ។

របាយការណ៍ដដែលបន្ដថា ចំនួនគម្រោងបូរីនៅកម្ពុជា នឹងបន្ដកើនឡើង ដោយព្យាករថានឹងមានដល់ទៅជាង ៣០០ គម្រោង ត្រឹមចុងឆ្នាំនេះ ហើយនឹងកើនដល់ជិត ៤០០ គម្រោង នៅចុងឆ្នាំ ២០២៣។

ដោយឡែក ទាក់ទងនឹងតម្លៃ មានការធ្លាក់ចុះបន្ដិចបន្ដួចសម្រាប់ផ្ទះប្រភេទល្វែង និង វីឡាភ្លោះ ប៉ុន្តែឃើញថាតម្លៃលក់ផ្ទះអាជីវកម្មមានការកើនឡើង ៤% ក្នុងអំឡុងពេល ៦ ខែនេះ។

របាយការណ៍បញ្ជាក់ទៀតថា មូលហេតុដែលធ្វើឱ្យទីផ្សារនេះពេញនិយម និងនៅមានភាពរឹងមាំគឺ ដោយសារតែកត្ដាហានិភ័យទាបក្នុងការអភិវឌ្ឍ។
ជាក់ស្ដែង ការសង់បូរី អ្នកអភិវឌ្ឍគឺអាចសង់បានជាដំណាក់កាលៗ តាមទុនដែលប្រមូលបានពីអ្នកទិញ ដែលធ្វើឱ្យលំហូរសាច់ប្រាក់អ្នកអភិវឌ្ឍមិនគាំងស្ទះ។ ខុសពីខុនដូ ដែលម្ចាស់គម្រោងត្រូវសាងសង់គម្រោងឱ្យរួចរាល់ម្ដងទាំងអស់ ទើបអាចលក់ចេញបាន។

ដូច្នេះ ជិតពាក់កណ្ដាលនៃអ្នកអភិវឌ្ឍបូរីថ្មីៗ ខាងលើ សុទ្ធតែជាអ្នកប្រឡូកក្នុងទីផ្សារថ្មី ព្រោះពួកគាត់ងាយស្រួលក្នុងការជ្រាតចូលក្នុងទីផ្សារ។

លើសពីនេះ កត្តាតម្រូវការខ្ពស់ ក៏ជាមូលហេតុដែលធ្វើឱ្យទីផ្សាររឹងមាំដែរ ពិសេសគម្រោងដែលស្ថិតនៅជាយក្រុង ដែលតម្លៃមធ្យម ឬទាប។

• អត្ថបទវិភាគ
• អត្ថបទវិភាគ