ទោះទុនវិនិយោគសំណង់កើនឡើងក្ដី តែគម្រោងជាច្រើនពន្យារការបើកការដ្ឋានដោយសារកូវីដ

• 9 ខែ​កញ្ញា 2020
• ព័ត៌មានក្នុងស្រុក
• 3 មើល

ក្រសួងរៀបចំដែនដី នគរូបនីយកម្ម និងសំណង់បានអនុម័តគម្រោងសាងសង់ចំនួនជាង ២៥០០គម្រោងក្នុងរយៈពេល ៦ ខែដំបូងនៃឆ្នាំនេះ ដែលមានតម្លៃវិនិយោគប្រមាណ ៣,៨ ពាន់លានដុល្លារអាមេរិក។

ប៉ុន្តែដោយសារការប៉ះពាល់នៃជំងឺរាតត្បាតកូវីដ១៩ ម្ចាស់គម្រោងដែលទទួលបានលិខិតអនុញ្ញាតសាងសង់ភាគច្រើន ពន្យារការបើកការដ្ឋាន ហើយកំពុងរង់ចាំឱ្យវិបត្តិកូវីដស្ងប់សិន នេះបើតាមលោក ជីវ ស៊ីវផេង អ្នកគ្រប់គ្រងទូទៅនៃអគ្គលេខាធិការដ្ឋាន សមាគមអ្នកសាងសង់កម្ពុជា។

លោក ជីវ ស៊ីវផេង បានមានប្រសាសន៍ថា៖ «យើងសង្ឃឹមថាក្រុមហ៊ុនដែលទទួលបានលិខិតអនុញ្ញាតឱ្យសាងសង់ អាចចាប់ផ្តើមសាងសង់ នៅពេលដែលជំងឺរាតត្បាតកូវីដអាចគ្រប់គ្រងបាន»។

លោកបន្តថា មានក្រុមហ៊ុនជាច្រើនទាំងក្នុងស្រុក និងអន្តរជាតិបានស្នើសុំលិខិតអនុញ្ញាតសាងសង់នៅទូទាំងប្រទេស ជាពិសេសនៅខេត្តព្រះសីហនុ ដែលជាហេតុធ្វើឱ្យតួលេខចំនួនគម្រោង និងទុនវិនិយោគកើន។ ប៉ុន្តែជាក់ស្ដែង ចំនួនគម្រោងដែលបើកការដ្ឋានគឺថមថយ។

លោកពន្យល់ថា ម្ចាស់គម្រោងមានសិទ្ធិពន្យារការបើកការដ្ឋាន ដោយសារតែបើយោងតាមច្បាប់ ការលិខិតអនុញ្ញាតសាងសង់មានសុពលភាពរយៈពេលមួយឆ្នាំ។

លោក ជីវ ស៊ីវផេង បានមានប្រសាសន៍ទៀតថា៖ «អ្នកអភិវឌ្ឍគឺព្រួយបារម្ភអំពីកូវីដនោះហើយជាមូលហេតុដែលពួកគេមិនមានសកម្មភាពច្រើន ដែលនេះគឺជារឿងគួរឱ្យបារម្ភដែរ។ ប៉ុន្តែប្រហែលជាបន្ទាប់ពីស្ថានការកូវីដប្រសើរឡើងអ្នកអភិវឌ្ឍន៌នឹងចាប់ផ្តើមសាងសង់»។

• គម្រោងអភិវឌ្ឍន៍
• ផ្លូវ និងហេដ្ឋារចនាសម្ព័ន្ធ