ទំនប់វារីអគ្គិសនីតាតៃលើ អនុភាព១៥០MG ​តម្លៃជិត $៤០០លាន បើកការដ្ឋានសាងសង់ហើយ

• Sommana Yan
• 30 ខែ​វិច្ឆិកា 2023
• Uncategorized @km
• 537 មើល

គម្រោងទំនប់វារីអគ្គិសនី តាតៃលើ ស្ថិតនៅក្នុងស្រុកថ្មបាំង ខេត្តកោះកុង តម្លៃជិត ៤០០លានដុល្លារ បើកការដ្ឋានសាងសង់ហើយ។ នេះបើតាមពិធីបិទស្ទឹង បើកការដ្ឋានសាងសង់ ក្រោមអធិបតីភាពសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា កាលពីថ្ងៃទី៣០ ខែវិច្ឆិកា ឆ្នាំ២០២៣។

គម្រោងវារីអគ្គិសនីនេះ ប្រើប្រភពទឹករបស់ស្ទឹង២ គឺស្ទឹងកែប និងស្ទឹងតាតៃ ដោយសាងសង់ទំនប់២ កាត់ស្ទឹងទាំង ២ បង្កើតជាអាងស្តុកទឹក២ ភ្ជាប់គ្នាទៅវិញទៅមក ដោយទួណែលបង្ហូរទឹកក្រោមដី។ ប្រភពទឹក ដែលតភ្ជាប់គ្នានេះ គ្រោងទម្លាក់យកមកផលិតថាមពលអគ្គិសនី នៅអគារថាមពល ដែលមានអានុភាពសរុប ១៥០មេហ្គាវ៉ាត់ ស្ថិតនៅចម្ងាយ ១៣គីឡូម៉ែត្រ ក្រោមទំនប់ទឹកស្ទឹងកែប តាមបំពង់ទួណែល បង្ហូរទឹកក្រោមដី។

គម្រោងនេះ នឹងត្រូវធ្វើឡើងក្រោមរូបភាពជាគម្រោង វិនិយោគសាងសង់-ដំណើរការ-ផ្ទេរ (Build-Operation-Transfer) ក្នុងទំហំវិនិយោគ សរុបជិត ៤០០លានដុល្លារអាម៉េរិក ដែលវិនិយោគដោយក្រុមហ៊ុន China National Heavy Machinery Corporation (CH MC)។

គម្រោងនេះ ផ្ដល់សម្បទានរយៈពេល ៣៩ឆ្នាំ ក្នុងនោះរយៈពេល ៤ឆ្នាំ សម្រាប់ការសាងសង់ និង ៣៥ឆ្នាំ សម្រាប់ការធ្វើអាជីវកម្ម។ បរិមាណមូលដ្ឋាន នៃថាមពលអគ្គិសនីផលិតប្រចាំឆ្នាំលក់ឱ្យអគ្គិសនីកម្ពុជា គឺជាមធ្យមប្រមាណ ៥២៧លានគីឡូវ៉ាត់ម៉ោង។

ទន្ទឹមនឹងបើកការដ្ឋានសាងសង់គម្រោងទំនប់វារីអគ្គិសនី តាតៃលើ សម្តេចមហាបវរធិបតី ក៏បានប្រកាសឱ្យអូសខ្សែបញ្ជូនថាមពលអគ្គសនីទៅកាន់ឃុំចំនួន៣ ផងដែរ ដែលមានប្រវែងជាង ៣៣គីឡូម៉ែត្រ  ស្ថិតនៅស្រុកថ្មបាំង  ខេត្តកោះកុង។