English 
ខ្មែរ 
និន្នាការផ្លាស់ប្តូរនៅក្នុងសេដ្ឋកិច្ចរបស់ខេត្តព្រះសីហនុ
វិស័យទេសចរណ៍ជាកត្តារួមចំណែកដ៏សំខាន់ចំពោះសេដ្ឋកិច្ចខេត្តព្រះសីហនុ ហើយខណៈដែលវានៅតែជាចង្វាក់បេះដូងសម្រាប់ទីក្រុងឆ្នេរសមុទ្រនេះ មានការផ្លាស់ប្តូរការផ្តោតទៅលើតម្រូវការផ្នែកអចលនទ្រព្យពីក្រុមហ៊ុនអភិវឌ្ឍន៍ និងវិនិយោគិនដែលកំពុងសម្លឹងមើលទៅកាន់តំបន់នេះ។
លោក Chhayleang Ngoun មកពីក្រុមហ៊ុន Ratanaka Realty បានពន្យល់ថា “ព្រះសីហនុជាទីក្រុងស្រស់ស្អាតមួយ ប៉ុន្តែសកម្មភាពធុរកិច្ចមិនមានការវិវត្តន៍ច្រើនទេ។ មនុស្សជាធម្មតាចង់ទិញអចលនទ្រព្យនៅក្បែរឆ្នេរដើម្បីបានទេសភាពស្អាត និងផាសុកភាព”។ លោកស្រី ចាន់ ម្លប់សុខា មកពីការិយាល័យមេធាវីសុខា បានចែករំលែកការយល់ឃើញដោយលើកឡើងថា “ទីផ្សារអចលនទ្រព្យនៅក្នុងក្រុងព្រះសីហនុគឺល្អ។ ខ្ញុំគិតថាមនុស្សចង់ទិញអចលនទ្រព្យនៅក្បែរឆ្នេរ”។
ចំនួនភ្ញៀវទេសចរដែលទៅទស្សនាខេត្តព្រះសីហនុបានកើនឡើងរហូត ដែលក្នុងនោះភ្ញៀវទេសចរចិនមានការកើនឡើងគួរឲ្យកត់សម្គាល់ជាងគេ។ កំណើននេះត្រូវបានគេរំពឹងថានឹងបន្តនៅក្នុងឆ្នាំ ២០១៧ ជាមួយនឹងការកើនឡើងចំនួននៃការតភ្ជាប់ជើងហោះហើរអន្ដរជាតិ។ ក្រុមហ៊ុនអាកាសចរណ៍ក្នុងស្រុកចំនួនពីរក្នុងប្រទេសកម្ពុជា អង្គរអ៊ែរ និងបាយ័នអ៊ែរ បច្ចុប្បន្ននេះមានការហោះហើរប្រចាំថ្ងៃរវាងខេត្តព្រះសីហនុ ភ្នំពេញ និងខេត្តសៀមរាប។ ក្រៅពីនេះមានជើងហោះហើរអន្ដរជាតិដទៃទៀតដែលចុះចតក្នុងខេត្តព្រះសីហនុ រួមមាន Lucky Air ពីប្រទេសចិន Cathay Dragon ពីទីក្រុងហុងកុង និង Silk Air ពីប្រទេសសឹង្ហបុរី។ និន្នាការសំខាន់មួយទៀតគឺការពង្រីក និងកំណើនចំនួនកន្លែងស្នាក់នៅមានតំលៃសមរម្យ ដែលបានបើកទីផ្សារសម្រាប់ក្រុមភ្ញៀវទេសចរធំៗ ។ នៅពេលអនាគត ការពង្រីកអាកាសយានដ្ឋានព្រះសីហនុនឹងជួយសម្រួលដល់កំណើនបន្ថែមទៀតលើផ្នែកទាំងអស់នៃទេសចរណ៍។
វិស័យអចលនទ្រព្យនៅខេត្តព្រះសីហនុក៏មាននិន្នាការវិវត្តន៍ផងដែរ។ មានការផ្លាស់ប្តូរយ៉ាងច្បាស់ឆ្ពោះទៅរកការវិនិយោគលើអចលនទ្រព្យនៅខេត្តព្រះសីហនុ ដែលការធានាផ្តល់ជូននូវផលចំណេញបានក្លាយជាបទដ្ឋានទីផ្សារ។ ភាគច្រើននៃអ្នកទិញ និងអ្នកវិនិយោគ មានទំនោរចាប់អារម្មណ៍ទិញអចលនទ្រព្យដែលមានការធានាពីផលចំណេញដែលគេអាចទទួលបាន ព្រមទាំងរីករាយនឹងភាពជាម្ចាស់កម្មសិទ្ធិលើអចលនទ្រព្យនៅក្បែរសមុទ្រ។ ពួកគេក៏កំពុងសម្លឹងមើលទិញអចលនទ្រព្យដែលមិនសូវមានជម្លោះពាក់ព័ន្ធនឹងកម្មសិទ្ធិ និងមានកម្មវិធីគ្រប់គ្រងការជួលដើម្បីធានាថាម្ចាស់អចលនទ្រព្យអាចទទួលបានប្រាក់ចំណូលជាអតិបរមា។ អចលនទ្រព្យលំនៅដ្ឋានថ្មីៗដែលស្ថិតនៅក្នុងក្រុមនេះ កំពុងត្រូវបានសាងសង់នៅក្នុងខេត្តព្រះសីហនុ ដូចជា Blue Bay Condominium, D’Seaview, Royal Bayview Condominium, Sunshine Bay និងThe Scarlett។ ចំណុចអវិជ្ជមានគឺបច្ចុប្បន្ននេះមានកង្វះនូវក្រុមហ៊ុនគ្រប់គ្រងអចលនទ្រព្យដែលមានជំនាញវិជ្ជាជីវៈ និងបទពិសោធន៍ ដែលការណ៍នេះបានកម្រិតនូវសក្តានុពលសម្រាប់កំណើន។
ភាពខុសគ្នាដ៏សំខាន់រវាង វីឡាលំដាប់ខ្ពស់ដែលមានទីតាំងស្ថិតនៅលើកោះក្បែរខេត្តព្រះសីហនុ និងអគារខុនដូនោះ គឺភាពបត់បែននៃការប្រើប្រាស់។ អ្នកទិញខុនដូ និងអ្នកវិនិយោគលើខុនដូ ច្រើនទទួលយកលក្ខខណ្ឌប្រើប្រាស់អចលនទ្រព្យដែលមានភាពរឹតត្បិត ចំណែកឯអ្នកទិញអចលនទ្រព្យលំដាប់ខ្ពស់ជាធម្មតាត្រូវការភាពបត់បែនច្រើនលើពេលវេលាដែលពួកគេអាចប្រើប្រាស់អចលនទ្រព្យរបស់គេ។ ផ្នែកលាក់បាំងពិសេសមួយនៃទីផ្សារ គឺការស្វែងរកវីឡារីសតប្រណីតបំផុត ហើយអ្នកទិញចាប់អារម្មណ៍លើអ្វីដែលកោះនៅជិតទៅខេត្តព្រះសីហនុផ្តល់ជូន ជាពិសេសគឺគុណភាពឆ្នេរ។
វាគឺជាផ្នែកថ្មីមួយនៃទីផ្សារដែលក្នុងពេលអនាគតទំនងនឹងក្លាយជាកត្តាជម្រុញនៃទីផ្សារលំនៅដ្ឋានរីសត ដូចនៅភូកេត និងកោះសាមុយក្នុងប្រទេសថៃ ដែលអចលនទ្រព្យលំដាប់ខ្ពស់ទាំងអស់សុទ្ធតែមានទេសភាពសមុទ្រ ការផ្តល់សេវាកម្មយ៉ាងពេញលេញជាមួយនិងការគ្រប់គ្រងបែបសណ្ឋាគារលំដាប់ផ្កាយប្រាំ។ ទោះជាយ៉ាងណា វីឡាប្រណីតទាំងនេះ គឺជាទីផ្សារលាក់បង្កប់ណាស់ ដែលមានតែបុគ្គលដែលជាអ្នកមានធំៗប៉ុណ្ណោះអាចដឹង ។ ផលិតផលវិនិយោគដែលមានតំលៃសមរម្យ មានលក្ខណៈសមហេតុលើហិរញ្ញវត្ថុ និងត្រូវបានដាក់លក់ច្រើនជាងសម្រាប់តម្រូវការភាគច្រើននាពេលបច្ចុប្បន្ន។