បន្ទាប់ពីមានការបាក់រលំអគារ រដ្ឋាភិបាលបង្កើតគណៈកម្មការត្រួតពិនិត្យសំណង់នៅខេត្តព្រះសីហនុ

24 ខែមិថុនា 2019
Uncategorized @km
5 មើល

រាជរដ្ឋាភិបាលកាលពីថ្ងៃទី ២៣ ខែ មិថុនា ឆ្នាំ ២០១៩ បានសម្រេចបង្កើតគណៈកម្មការត្រួតពិនិត្យសំណង់នៅខេត្តព្រះសីហនុ ក្រោយពេលខេត្តនេះ ទទួលរងគ្រោះថ្នាក់បាក់រលំអគារកម្ពស់៧ជាន់បណ្តាលឲ្យមនុស្សស្លាប់និងរបួសជាង ៤០នាក់មក។

យោងតាមសេចក្តីសម្រេចខាងលើ គណៈកម្មការត្រួតពិនិត្យសំណង់នេះ មានសមាសភាពចំនួន១៥រូបដែលដឹកនាំដោយឯកឧត្តម ឡៅ ទិព្វសីហា រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ ដែលមានភារកិច្ចចំនួន ៥ រួមមាន៖

១) ចុះពិនិត្យការអនុវត្តបទដ្ឋានបច្ចេកទេស បទដ្ឋានគតិយុត្ត ស្តង់ដារសំណង់ ស្តង់ដារសុវត្ថិភាព គុណភាពសំណង់ នៅតាមការដ្ឋានសំណង់ នៅខេត្តព្រះសីហនុ

២) ចុះពិនិត្យលក្ខណសម្បត្តិរបស់ក្រុមហ៊ុនទទួលម៉ៅការសាងសង់នៅតាមការដ្ឋានសំណង់

៣) ធ្វើបច្ចុប្បន្នភាពសំណង់ដែលធ្វើរួច និងកំពុងធ្វើអាជីរកម្ម

៤) ធ្វើរបាយការណ៍ជូនក្រសួងរៀបចំដែនដី នគរូបនីយកម្ម និងសំណង់ ដើម្បីបូកសរុបរាយការណ៍ជូនរដ្ឋាភិបាល និង

៥) បំពេញភារកិច្ចផ្សេងទៀតតាមការប្រគល់ជូនរបស់រដ្ឋាភិបាល ។

ជាមួយគ្នានេះដែរ ក្រសួងរៀបចំដែនដី នគរូបនីយកម្ម និងសំណង់កាលពីថ្ងៃទី ២៣ ខែ មិថុនា ឆ្នាំ ២០១៩ ក៏បានបង្កើតក្រុមការងារចំនួន៨ក្រុម ដើម្បីត្រួតពិនិត្យគុណភាពសំណង់នៅខេត្តព្រះសីហនុ ។

ក្រុមការងារទាំង៨ក្រុមខាងលើនេះដែលមួយក្រុមៗមានសមាជិកចំនួន៤រូប មានតួនាទីចំនួន ៤ ក្នុងការជួយសម្រួលដល់ការកិច្ចការងាររបស់គណៈកម្មការខាងលើ។

គួររម្លឹកថា ខេត្តព្រះសីហនុក្នុងរយៈពេលប៉ុន្មានឆ្នាំចុងក្រោយនេះ មានការអភិវឌ្ឍន៍យ៉ាងខ្លាំងហើយអគារតូចធំ ខ្ពស់ទាប បាននិងកំពុងរីកលូតលាស់ដូចផ្សិតស្ទើពាស់ពេញទីក្រុង។

- Video Advertisement -