បារាំងសម្រេចផ្ដល់កម្ចី ២៣លានដុល្លារដល់កម្ពុជាដើម្បីស្តារប្រព័ន្ធធារាសាស្រ្ត

• 4 ខែ​វិច្ឆិកា 2021
• Uncategorized
• 7 មើល

ទីភ្នាក់ងារបារាំងសម្រាប់ការអភិវឌ្ឍន៍(AFD) សម្រេចផ្តល់កម្ចីចំនួន ២០លានអឺរ៉ូ (ប្រមាណ២៣លានដុល្លារ) ដល់កម្ពុជា ដើម្បីស្តារឡើងវិញនូវហេដ្ឋារចនាសម្ព័ន្ធធារាសាស្រ្ត នៅក្នុងខេត្តបាត់ដំបង និងបន្ទាយមានជ័យ។

ជាមួយគ្នានេះ កម្ពុជាក៏នឹងទទួលបានជំនួយឥតសំណង់ជាង ៣៤ម៉ឺនដុល្លារទៀត ពីបារាំង សម្រាប់ស្តារឡើងវិញនូវស្ទឹងស្វាយចេក ក្នុងខេត្តបន្ទាយមានជ័យ ផងដែរ។

លោក FABRICE Έtienne ដែលជាលេខាទី១ នៃស្ថានទូតសាធារណរដ្ឋបារាំងប្រចាំនៅកម្ពុជា និងលោកស្រី Oph–lie BOURHIS ជានាយកទីភ្នាក់ងារអភិវឌ្ឍន៍បារាំង(AFD) បានចុះហត្ថលេខា ជាមួយឯកឧត្តម អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ កាលពីថ្ងៃទី៣វិច្ឆិកា កន្លងទៅ។

កម្ចី ២៣លានដុល្លារ នេះនឹងត្រូវប្រើដើម្បីស្ដារឡើងវិញនូវប្រព័ន្ធធារាសាស្ត្រចំនួន ១៦កន្លែង ដែលបានខូចខាតដោយសារគ្រោះទឹកជំនន់កាលពីខែតុលា ឆ្នាំ២០២០ ដោយនៅក្នុងនោះ មាន៨កន្លែងនៅខេត្តបាត់ដំបង និង៧កន្លែងនៅបន្ទាយមានជ័យ។

ដោយឡែក ថវិកា ៣៤៦ ៨០០ ដុល្លារទៀត គឺជាជំនួយឥតសំណងដែលមូលនិធិ FAPS (Facility for Support, Preparation and Implementation of Project) ផ្តល់ឱ្យកម្ពុជា សម្រាប់ការសិក្សាសមិទ្ធិលទ្ធភាពគម្រោងស្តារឡើងវិញនូវស្ទឹងស្វាយចេក ក្នុងខេត្តបន្ទាយមានជ័យ។

លោក អូន ព័ន្ធមុនីរ័ត្ន បានលើកឡើងថា ការផ្តល់ហិរញ្ញប្បទានរបស់AFD និង FAPS មកឱ្យកម្ពុជាក្នុងការអនុវត្តគម្រោងខាងលើ គឺបានឆ្លើយតបយ៉ាងច្បាស់ទៅនឹងសេចក្តីត្រូវការអាទិភាព ពិសេសជួយស្តារសេដ្ឋកិច្ចកម្ពុជាបន្ទាប់វិបត្តិកូវីដ-១៩ ដោយលើកស្ទួយវិស័យកសិកម្ម និងការអភិវឌ្ឍន៍ជនបទ។

• គម្រោងអភិវឌ្ឍន៍
• ការវិនិយោគ និងមូលធន
• កិច្ចសហប្រតិបត្តិការ និងឱកាស
• Investment and Funding
• Cooperation and networking
• Projects Development
• គម្រោងអភិវឌ្ឍន៍
• ការវិនិយោគ និងមូលធន