ប៉ៃលិនធ្វើផ្លូវក្រវ៉ាត់ព្រំដែនមួយខ្សែ ភ្ជាប់ខេត្តប៉ៃលិន និងខេត្តចាន់បុរី

• Proeksa Meas
• 25 ខែ​ឧសភា 2020
• Uncategorized @km
• 95 មើល

អាជ្ញាធរខេត្តប៉ៃលិន បាន​បើកការដ្ឋាន​ស្ថាបនាផ្លូវក្រវ៉ាត់ព្រំដែនកម្ពុជា-ថៃ មួយខ្សែប្រវែងជាង ៥ គីឡូម៉ែត្រ រវាងខេត្តប៉ៃលិន និងខេត្តចាន់បុរី ដើម្បីសម្រួលដល់ការធ្វើចរាចរណ៍ផង និងជាយុទ្ធសាស្ត្រការពារបូរណភាពទឹកដីផង។

​ពិធីបើកការដ្ឋាននេះ​ធ្វើឡើង​ កាល​ពីថ្ងៃទី២២ ខែឧសភា ឆ្នាំ២០២០ ដែល​មាន​វត្តមាន​ពី​សំណាក់​ ឯកឧត្តម ផាន់ ចាន់ធុល អភិបាលខេត្តប៉ៃលិន រួមដំណើរ​ជាមួយនឹងមន្ត្រីរាជការ អាជ្ញាធរមូលដ្ឋាន ព្រមទាំងក្រុមការងារ។ នេះ​បើយោង​តាម​គេហទំព័រ​ផ្លូវ​ការ​របស់​រដ្ឋបាល​ខេត្ត​ប៉ៃលិន។

ផ្លូវក្រវ៉ាត់ព្រំដែនមួយខ្សែរនេះ មានប្រវែង ៥, ២ គីឡូម៉ែត្រ ទទឹង ២៥ ម៉ែត្រ​ក្រាលដោយបូតុងអាមេ ប្រវែង ១, ៥ គីឡូម៉ែត្រ និងក្រាលកៅស៊ូប្រភេទ DBST ប្រវែង ៣,៧ គីឡូម៉ែត្រ ព្រមទាំងកាយប្រឡាយដាក់លូមុខកាត់អ៊ុយសងខាងផ្លូវ ប្រវែង ១០, ៤ គីឡូម៉ែត្រ ដោយប្រើប្រាស់កញ្ចប់ថវិកាអភិវឌ្ឍន៍របស់ខេត្ត។

ការដ្ឋានស្ថាបនាផ្លូវក្រវ៉ាត់ព្រំដែននេះ ឆ្លងកាត់ភូមិចំនួន ២ នៅជាប់ព្រំដែនកម្ពុជា-ថៃ (ខេត្តប៉ៃលិន និងខេត្តចាន់បុរី) គឺភូមិផ្សារព្រំ និងភូមិអូរឈើក្រំ ស្ថិតក្នុងឃុំស្ទឹងកាច់ ស្រុកសាលាក្រៅ ខេត្តប៉ៃលិន ដើម្បីសម្រួលដល់ការធ្វើចរាចរណ៍ផង និងជាយុទ្ធសាស្ត្រការពារបូរណៈភាពទឹកដីផង។

ឯកឧត្តម បានមានប្រសាសន៍ថា៖ «ការកសាងសមិទ្ធផលនាថ្ងៃនេះ គឺជាការឆ្លើយតបតាមសំណូមពររបស់ប្រជាពលរដ្ឋ ដើម្បីសម្រួលដល់ការធ្វើដំណើរឱ្យមានភាពកាន់តែងាយស្រួល។ ហើយរដ្ឋបាលខេត្តប៉ៃលិន នឹងខិតខំបន្តចុះជួយដោះស្រាយនូវរាល់សំណូមពរ និងទុក្ខលំបាករបស់ប្រជាពលរដ្ឋនៅតាមមូលដ្ឋាន។ ជាពិសេសការកសាងហេដ្ឋារចនាសម្ព័ន្ធ និងការផ្តល់សេវាសាធារណៈជូនប្រជាពលរដ្ឋឱ្យបានកាន់តែល្អប្រសើរឡើង។»

ឯកឧត្តម ក៏បានសំណូមពរដល់បងប្អូនប្រជាពលរដ្ឋទាំងអស់ ត្រូវរួមគ្នាជួយថែរក្សាទ្រព្យសម្បត្តិសាធារណៈរបស់រដ្ឋ ក៏ដូចជាចូលរួមសហការជាមួយក្រុមការងារបច្ចេកទេស ដើម្បីឱ្យសមិទ្ធផលថ្មីនេះ សម្រេចបានទៅតាមការគ្រោងទុកនិងឆាប់បានប្រើប្រាស់ទាំងអស់គ្នា៕