ប្រព័ន្ធផលិតទឹកស្អាតបច្ចេកវិទ្យាថ្មី UF-MEMBRANE នៅខេត្តកំពត ដាក់ឱ្យដំណើរហើយ

11 ខែមករា 2022
Uncategorized
5 មើល

ប្រព័ន្ធប្រព្រឹត្តកម្មទឹកស្អាត ដែលមានសមត្ថភាពផលិតទឹក ៥០០០ម៉ែត្រគូបក្នុងមួយថ្ងៃ របស់រដ្ឋាករទឹកខេត្តកំពត បានប្រកាសដាក់ដំណើរការហើយ ក្រោមវត្តមានឯកឧត្តម ចម ប្រសិទ្ធ រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ កាលថ្ងៃទី៩ ខែមករា កន្លងទៅ។

ប្រព័ន្ធថ្មីនេះ គឺប្រើប្រាស់បច្ចេកវិទ្យាថ្មី UF-MEMBRANE ដែលផលិតទឹកគុណភាពខ្ពស់ ពោលគឺស្អាតដល់ថ្នាក់អាចពិសាទឹកពីក្បាលម៉ាស៊ីនផ្ទាល់បានតែម្ដង។ លើសពីនេះ ស្ថានីយផលិតទឹកស្អាតថ្មីនេះ ក៏ប្រើ ប្រព័ន្ធគ្រប់គ្រងស្វ័យប្រវត្តិកម្ម នៅពេលដែលបញ្ជូនទឹកចេញទៅផ្គត់ផ្គង់ដល់ប្រជាពលរដ្ឋ។

គម្រោងនេះជាការបន្ថែមលើអាងប្រព្រឹត្តកម្មដែលមានស្រាប់ ដែលធ្វើឱ្យរដ្ឋាករទឹកខេត្តកំពតមានលទ្ធភាពបង្កើនសមត្ថភាពផលិតរហូតដល់ ១៨ ៥០០ម៉ែត្រគូបក្នុងមួយថ្ងៃ នាពេលបច្ចុប្បន្ន។

ក្រៅពីប្រព័ន្ធនេះ រដ្ឋក៏កំពុងសហការជាមួយឯកជន ពិចារណាបង្កើតប្រព័ន្ធប្រព្រឹត្តកម្មទឹកស្អាតថ្មីបន្ថែមទៀត ស្របគ្នានឹងគម្រោងសាងសង់ទំនប់បង្ហៀរទឹកនៅព្រែកទឹកឈូ។

គួរបញ្ជាក់ថា ការផ្គត់ផ្គង់ទឹកស្អាតទូទាំងប្រទេស បានកើនឡើងគួរឱ្យកត់សម្គាល់ ដែលគិតត្រឹមឆ្នាំ២០២១ ចំនួនគ្រួសារដែលទទួលបានទឹកស្អាតប្រើប្រាស់ជាង ១លានគ្រួសារ ឬ ៣៨៣លានម៉ែត្រគូប។

រដ្ឋក៏មានផែនការពង្រីកវិសាលភាពនៃការផ្គត់ផ្គង់ទឹកស្អាតនៅទីក្រុង ទីប្រជុំជនឱ្យបាន៩០% ដល់ឆ្នាំ២០២៣ និង ១០០% ត្រឹមឆ្នាំ២០២៥។

- Video Advertisement -