ផែនការធំ! ចិនគ្រោងចាយ ១,៥ ទ្រីលានដុល្លារ សង់ហេដ្ឋារចនាសម្ព័ន្ធឆ្លាតវៃ ១៣០០គម្រោង

• 5 ខែ​កក្កដា 2022
• ព័ត៌មានសំណង់
• 5 មើល

សហគ្រាសគ្រប់គ្រងរដ្ឋរបស់ចិន  បានបង្ហាញផែនការចង់វិនិយោគប្រមាណ ១,៥ ទ្រីលានដុល្លារ (១៥០០ពាន់លានដុល្លារ) សាងសង់ហេដ្ឋារចនាសម្ព័ន្ធឆ្លាតវៃជាង ១៣០០ គម្រោង ទូទាំងប្រទេសពីឆ្នាំ ២០២១ ដល់ឆ្នាំ ២០២៥ ទិសដៅជំរុញកំណើនសេដ្ឋកិច្ចប្រកបដោយចីរភាព។

យោងតាមរបាយការណ៍របស់ China Daily ចេញផ្សាយកាលពីខែមិថុនា គម្រោងទាំងនោះមិនមែនធម្មតាដូចជាផ្លូវដែក ផ្លូវថ្នល់ និងផ្លូវទឹកទេ ប៉ុន្តែជាគម្រោងហេដ្ឋារចនាសម្ព័ន្ធដែល ផ្អែកលើបច្ចេកវិទ្យាព័ត៌មានដូចជា 5G បញ្ញាសិប្បនិម្មិត (AI) អ៊ីនធឺណិតឧស្សាហកម្ម និងIoT ជាដើម។

គម្រោងហេដ្ឋារចនាសម្ព័ន្ធ សំដៅដល់ការប្រើអត្ថប្រយោជន៍នៃ AI និងBig Data ទៅដោះស្រាយបញ្ហាស្មុគស្មាញនានា ក្នុងវិស័យសំណង់ហេដ្ឋារចនាសម្ព័ន្ធ ដើម្បីធ្វើឱ្យសំណង់មានគុណភាពរឹងមាំជាងមុន ប៉ុន្តែចំណាយទាបជាងមុន។

លើសពីនេះ វាក៏ជួយគ្រប់គ្រងហេដ្ឋារចនាសម្ព័ន្ធទាំងនោះ ដោយឆ្លាតវៃ ដោយប្រាប់ពីរយៈពេលកំណត់ក្នុងការជួសជុល និងថៃទាំ ក៏ដូចជាការបើកបរលើសទំងន់ជាដើម។

លើសពីនេះ វាក៏ផ្ដល់ឱកាសឱ្យក្រុមហ៊ុនបច្ចេកវិទ្យាតូចៗ មានសិទ្ធិចូលរួម ក្នុងការផ្ដល់ជាសេវាកម្ម និងផលិតផលក្នុងការកសាងគម្រោងផងដែរ។

ដើម្បីអនុវត្តគម្រោងនេះ ចិនក៏នឹងបង្កើតប្រព័ន្ធគ្រប់គ្រងទិន្នន័យរួមមួយដោយមាន អនុស្ថានីយស្ដុកទិន្នន័យ ១៨ កន្លែង។

គម្រោងនេះនឹងត្រូវបានអនុវត្តដោយសហគ្រាសសាធារណៈជាង​ ៧០ ក្រុមហ៊ុន ដែលកាលពីឆ្នាំមុន បានបណ្ដាក់ទុនសរុបប្រមាណ ៦០  ពាន់លានដុល្លារ ដើម្បីពង្រីកសមត្ថភាពឌីជីថល របស់ខ្លួន។

គម្រោងឌីជីថល រួមមាន ប្រព័ន្ធរុករកផ្កាយរណប Beidou និង blockchain  ក៏ដូចជាការបង្កើតឧបករណ៍វិស្វកម្មនៅឈូងសមុទ្រ ការដឹកជញ្ជូន និងដំណើរការទិន្នន័យBig Data ជាដើម។

គួរបញ្ជាក់ថា  ទ្រព្យសម្បត្តិនៅក្រៅប្រទេសរបស់សហគ្រាសសាធារណៈរបស់ចិនមាន ដល់ជាង ១,៣ ទ្រីលានដុល្លារ ដែលស្មើនឹងជាង ៨០០០  គម្រោងនៅក្នុងជាង ១៨០  ប្រទេស និងតំបន់។

 

• គម្រោងអភិវឌ្ឍន៍
• ផ្លូវ និងហេដ្ឋារចនាសម្ព័ន្ធ
• Road and Infrastructure
• Projects Development
• គម្រោងអភិវឌ្ឍន៍