ផ្ទះតម្លៃ ២-៣ម៉ឺនដុល្លារនៅកណ្តាលក្រុងភ្នំពេញ បើកការដ្ឋានសាងសង់ជាផ្លូវការ

Proeksa Meas
15 ខែធ្នូ 2017
Uncategorized
91 មើល

ភ្នំពេញ៖ គម្រោងសាងសង់អគារខុនដូដែលមានតម្លៃសមរម្យចាប់ពី ២ ទៅ ៣ម៉ឺនដុល្លារអាមេរិកក្នុងមួយយូនីត ស្ថិតនៅសង្កាត់ទឹកថ្លា រាជធានីភ្នំពេញ ខាងក្រោយមន្ទីពេទ្យរ៉ូយាល់ភ្នំពេញ បានបើកសម្ពោធការដ្ឋានសាងសង់ជាផ្លូវការ កាលពីថ្ងៃទី៨ វិច្ឆិកាកន្លងមកនេះ។

លំនៅឋានអារ៉ាខាវ៉ា (Arakawa Residence) អភិវឌ្ឍន៍ដោយក្រុមហ៊ុនជប៉ុន Arakawa ក្រោមទុនវិនិយោគ ៧០ លានដុល្លារអាមេរិក ដោយសាងសង់ជាពីរដំណាក់កាល ដោយដំណាក់កាលទី១ មាន១០អគារ ដែលមានប្រមាណ ២០០០ យូនីត ហើយក្នុងមួយយូនីតមានតម្លៃចន្លោះពី ២ ទៅ៣ ម៉ឺនដុល្លារអាមេរិក។ ការងារសាងសង់ក្នុងដំណាក់កាលទី១នេះ នឹងបញ្ចប់ក្នុងរយៈពេល២ ទៅ៣ ឆ្នាំខាងមុខ។

ថ្លែងនៅក្នុងសន្និសីទកាសែតភ្លាមៗក្រោយបញ្ចប់ពីធីសម្ពោធការដ្ឋានសាងសង់ លោក អាឡិច យ៉ាស៊ូម៉ូតូស្ថាបនិកក្រុមហ៊ុន Arakawa បានមានប្រសាសន៍ថា ដំណាក់កាលទី១ នឹងចំណាយ៤០ លានដុល្លារអាមេរិក និង៣០ លានដុល្លារសម្រាប់ដំណាក់កាលទី២។ ស្ថាបនិកក្រុមហ៊ុនអភិវឌ្ឍន៍អចលនទ្រព្យជនជាតិប៉ុនរូបនេះ បានគូសបញ្ជាក់ថា លំនៅឋានេះនឹងបើកលក់សម្រាប់អតិថិជនដែលមានបំណងទិញស្នាក់នៅ (end users)ហើយមិនអនុញ្ញាតឲ្យមានការទិញសម្រាប់វិនិយោគបន្តនោះទេ។

“លំនៅឋាននេះ សាងសង់ក្នុងគោលបំណងដើម្បីឲ្យប្រជាជនកម្ពុជាដែលជាសិស្សនិស្សិត គូស្វាមីភរិយាថ្មី និងប្រជាពលរដ្ឋទូទៅដែលមានចំណូលទាប-មធ្យម អាចទិញលំនៅឋានខុនដូរបស់អារ៉ាខាវ៉ាបាន ព្រមទាំងទទួលបទពិសោធន៍ជាម្ចាស់កម្មសិទ្ធ និងរស់នៅសមរម្យក្នុងខុនដូទំនើបកណ្តាលក្រុងភ្នំពេញ”។ នេះបើតាមការលើកឡើងរបស់អាឡិច។

ឯកឧត្តម ជា សុផារ៉ា រដ្ឋមន្រ្តីក្រសួងដែនដី ចូលរួមក្នុងពិធីសម្ពោធលំនៅឋាននេះបានមានប្រសាសន៍ថា លំនៅឋានអារ៉ាខាវ៉ា ជាគម្រោងទី៣ ហើយ ដែលបានសហការជាមួយក្រសួងរៀបចំដែនដី ហើយគម្រោងទី១ គឺនៅស្ថិតក្រុងតាខ្មៅ និងគម្រោងទី២ គឺស្ថិតនៅផ្លូវជាតិលេខ៥។