ផ្លូវជាតិលេខ៣ សម្រេច ៧៤% នឹងបញ្ចប់មុនផែនការដល់ទៅជិតមួយឆ្នាំ

Proeksa Meas
21 ខែឧសភា 2020
Uncategorized
157 មើល

ដោយសារដំណើរការសាងសង់ប្រព្រឹត្តទៅយ៉ាងរលូន ការស្ថាបនាឡើងវិញនូវផ្លូវជាតិលេខ៣ ពីភ្នំពេញទៅក្រុងកំពត ប្រវែង១៣៤,៨២៦ គ.ម សម្រេចបានប្រមាណ ៧៤% ហើយ និងអាចបញ្ចប់មុនផែនការ។ នេះបើយោងតាមគេហទំព័រហ្វេសប៊ុកផ្លូវការរបស់ក្រសួងសាធារណការ និងដឹកជញ្ជូន កាលពីថ្ងៃទី២១ ឧសភា ២០២០នេះ។

បើតាមផែនការ គម្រោងនេះ ត្រូវចំណាយរយៈពេល ៤៨ ខែ គ្រោងនឹងបញ្ចប់ឆ្នាំ ២០២២ ប៉ុន្តែអាចនឹងត្រូវបញ្ចប់មុនគម្រោងរយៈពេល ៩ ខែ ពោល គឺនៅចុងឆ្នាំ២០២១ខាងមុខនេះ ហើយគិតរហូតមកទល់ពេលនេះការសាងសង់សម្រេចបាន៧៤%ហើយ។ នេះ បើតាមការឱ្យដឹងពីឯកឧត្តមទេសរដ្ឋមន្ត្រី ស៊ុន ចាន់ថុលនៅពេលពិនិត្យគុណភាពសាងសង់ផ្លូវជាតិលេខ ៣ នៅព្រឹកថ្ងៃទី ២១ ខែឧសភានេះ។

គម្រោងនេះ ត្រូវបានចែកជាពីរដំណាក់កាល៖ ដំណាក់កាលទី១ពីចោមចៅ (ភ្នំពេញ) ទៅបែកគុស ប្រវែង៦៩,៩០ គីឡូម៉ែត្រ ត្រូវពង្រីកទទឹងតួផ្លូវរហូតដល់ ២៤,៥ម៉ែត្រ ជាប្រភេទផ្លូវបេតុងកៅស៊ូ(AC) កម្រាស់៩សង់ទីម៉ែត្រ ចែកចេញជា៤គន្លង (២គន្លងទៅ២គន្លងមក)។

ដំណាក់កាលទី២ ពីបែកគុសទៅក្រុងកំពតប្រវែង៦៤,៩២៦គីឡូម៉ែត្រ ជាប្រភេទផ្លូវACកម្រាស់៧សង់ទីម៉ែត្រ ត្រូវពង្រីកទទឹងតួផ្លូវរហូតដល់ ១២ ម៉ែត្រ ចែកជា២គន្លង។

ចំពោះគម្រោងកែលម្អគុណភាពនេះ នឹងចំណាយថវិកាសរុបប្រមាណ ២១៩,៩១១ លានដុល្លារអាមេរិក ជាហិរញ្ញប្បទានសម្បទានពីសាធារណរដ្ឋប្រជាមានិតចិន រួមនឹងថវិកាបដិភាគរបស់រាជរដ្ឋាភិបាលកម្ពុជា សាងសង់ដោយក្រុមហ៊ុនសាជីវកម្មស្ពាន និងថ្នល់ចិន (China Road and Bridge Corporation) និងត្រួតពិនិត្យបច្ចេកទេសដោយក្រុមហ៊ុនទីប្រឹក្សាបច្ចេកទេសសំណង់ ក្វាងចូវ វ៉ានអាន (Guangzhou Wanan Construction Supervision Co., Ltd) ។

នៅក្នុងត្រួតពិនិត្យទីតាំងនេះ ឯកឧត្តម ស៊ុន ចាន់ថុល ក៏បានណែនាំឲ្យក្រុមការងារបច្ចេកទេសបន្ថែមគុណភាពផ្លូវ តាមរយៈការធ្វើតេស្តវាស់គុណភាពដោយធ្វើការខួងស្រទាប់ផ្លូវ យកមកពិនិត្យនិងបំពាក់កាមេរ៉ាចាប់ល្បឿន រថយន្តតាមផ្លូវ ដើម្បីធានាឱ្យអ្នកបើកបរចូលរួមគោរពច្បាប់ចរាចរណ៍ផងដែរ៕