ពលរដ្ឋដែលមានប្រាក់ចំណូលមធ្យមសម្រុកទិញដីឡូតិ៍បើទោះបីជាមានបញ្ហាប្រឈមក្នុងការវិនិយោគក្តី
ភាពរុងរឿងផ្នែកសេដ្ឋកិច្ចរួមជាមួយនឹងការកើនឡើងនៃប្រជាជនកម្ពុជាដែលមានប្រាក់ចំណូលមធ្យមកម្រិតទាប បាននិងកំពុងជំរុញការអភិវឌ្ឍន៍ ឧស្សាហកម្មអចលនទ្រព្យរបស់កម្ពុជា។ ក្នុងរយៈពេលមួយទសវត្សរ៍កន្លងមកនេះ វិស័យអចលនទ្រព្យរបស់កម្ពុជាទទួលបានកំណើនយ៉ាងខ្លាំង ជារៀងរាល់ឆ្នាំ ជាពិសេស នៅរាជធានីភ្នំពេញ និងនៅតំបន់ជាយក្រុងនានា។
ជាមួយនឹងការអភិវឌ្ឍន៍ដ៏ឆាប់រហ័សនេះ បានធ្វើឲ្យមានការកើនឡើងនៃតម្លៃដីធ្លីដោយសារប្រជាជនកម្ពុជាដែលមានប្រាក់ចំណូលមធ្យមកម្រិតទាប មានសេចក្តីប្រាថ្នាចង់បានផ្ទះឬដីក្នុងតម្លៃមួយដែលសមរម្យ។ ជាឆ្លើយតបទៅនឹងតម្រូវការសង្គមដ៏ខ្ពស់មួយនេះ អ្នកអភិវឌ្ឍន៍អចលនទ្រព្យ ក្នុងរយៈពេលប៉ុន្មានឆ្នាំចុងក្រោយនេះ បានបំបែកដីជាច្រើនហិកតាទៅជាដីឡូតិ៍តូចៗ ក្នុងតម្លៃសមរម្យនៅជាយក្រុងភ្នំពេញ និងនៅតាមខេត្តជាប់ទីក្រុ ងដូចជាតាកែវ កណ្តាល និងកំពង់ស្ពឺ ។ល។
តម្លៃសមរម្យ
«ដោយសារតែតម្លៃចន្លោះពី ៣០០០ ដុល្លារទៅ ៥០០០ដុល្លារក្នុងមួយឡូតិ៍ វាសក្ក័សមនឹងប្រជាជនកម្ពុជាច្រើន ហើយពេលខ្លះ អ្នកអភិវឌ្ឍន៍ មិនគិតការប្រាក់ទេ ដូច្នេះពួកគាត់ [អ្នកទិញ] ត្រូវបង់ប្រាក់ជាមុន ចាប់ពី៥០០ ទៅ ១០០០ ដុល្លារ បន្ទាប់មកពួកគាត់ [អ្នកទិញ] អាចបង់ប្រាក់រំលស់ជាមួយនឹងការប្រាក់ទាប ឬមិនមានការប្រាក់» នេះគឺជាការលើកឡើងរបស់ អ្នក អាន សុធីតា អ្នកជំនាញផ្នែកអចលនទ្រព្យ និងជានាយិកាទីភ្នាក់ងារអចលនទ្រព្យអន្ដរជាតិ CBRE Cambodia ដោយក្នុងនោះ អ្នកនាងក៏បានសង្កត់ទៀតថា តម្លៃទាប គឺជាចំណុចទាក់ទាញ សម្រាប់អាជីវកម្មអចលនទ្រព្យដែលកំពុងពេញនិយមមួយនេះ។
ប្រជាជនកម្ពុជាដែលមានប្រាក់ចំណូលមធ្យមកម្រិតទាបបានសម្លឹងមើលការវិនិយោគផ្សេងដូចជាការទិញដីឡូតិ៍ដោយសារតែការអភិវឌ្ឍន៍លំនៅដ្ឋានដែលមានតំលៃសមរម្យមានការយឺតយ៉ាវ ហើយតម្រូវការលំនៅដ្ឋានចេះតែកើនឡើងរហូតដល់ ៨០០ ០០០ខ្នងប ន្ថែមទៀតក្នុងឆ្នាំ ២០៣០ដោយសារកំណើនប្រជាជននៅទូទាំងរាជធានីភ្នំពេញ។
អ្នកនាងធីតា បានពន្យល់ថា៖ «ពួកគាត់ [អ្នកទិញ] គិតថាសម្រាប់តម្លៃហ្អឹងពួកគាត់ [អ្នកទិញ] នៅពេលបន្តិចទៀតគាត់អាចបន្ថែម ៥០០០ ដុល្លារឬ ១០០០០ ដុល្លារ ដូច្នេះពួកគាត់ [អ្នកទិញ] អាចសង់ផ្ទះដោយខ្លួនឯងបាន ពីព្រោះពួកគាត់គិតថា តម្លៃសរុបគឺប្រហែល ២០០០០ ដុល្លារ គឺនៅទាបជាងផ្ទះដែលពួកគាត់ទិញនៅបុរី ដែលតម្លៃទាបបំផុតគឺ ៥០០០០ដុល្លារ»។
អ្នកទិញដីឡូតិ៍
អង្គុយនៅក្នុងហាងលក់កាហ្វេក្នុងថ្ងៃដែលមានកំដៅខ្លាំង បុគ្គលិកក្រុមហ៊ុនមួយរូបដែលមានអាយុ ២៣ ឆ្នាំ មានឈ្មោះថា សុភា បានមានប្រសាសន៍ថា កញ្ញាបានវិនិយោគលើដីមួយកន្លែងនៅតំបន់កប់ស្រូវដែលជាកន្លែងដ៏ពេញនិយមសម្រាប់ការអភិវឌ្ឍដីដីឡូតិ៍នៅជាយក្រុងភ្នំពេញ។
កញ្ញាសុភាបានថ្លែងថា៖ «ខ្ញុំបានទិញដីមួយទំហំ ៥ ម៉ែត្រ និងទទឹង ២០ ម៉ែត្រ ក្នុងតម្លៃ ៣៥០០ ដុល្លារ នៅតំបន់កប់ស្រូវ ព្រោះខ្ញុំចង់មានដី ដើម្បីធ្វើផ្ទះនៅពេលអនាគត»។
ស្របពេលដែលកញ្ញាពន្យល់ថានាងបានចំណាយប្រាក់ បន្ទាប់មកបង់រំលោះ ១០០ ដុល្លារក្នុងមួយខែសម្រាប់រយៈពេលពីរឆ្នាំកន្លះ កញ្ញាសុភា បានមានប្រសាសន៍ថា នាងរីករាយនឹងការវិនិយោគរបស់នាង ព្រោះនេះជាទ្រព្យសម្បត្តិដំបូងរបស់នាង បើទោះជាទទួលស្គាល់ថា ការវិនិយោគនេះអាចមានបញ្ហាប្រឈមក្តី។
សុភាក៏បានពន្យល់ពីប្រភេទឯកសារកម្មសិទ្ធិដែលនាងរំពឹងថានឹងទទួលបាននៅពេលបញ្ចប់ការបង់រំលស់ថា «សម្រាប់ការទិញនេះ ខ្ញុំនឹងទទួលបានប្លង់ទន់ និងចុះហត្ថលេខាពីសង្កាត់តែប៉ុណ្ណោះ ប៉ុន្តែខ្ញុំគិតថាការទិញនេះនៅតែល្អ ខ្ញុំនឹងមានដីផ្ទាល់ខ្លួន»។
បញ្ហាប្រឈមសម្រាប់អ្នកវិនិយោគដីឡូតិ៍
យោងទៅតាមការឲ្យដឹងពីអ្នកនាង សុធីតា តម្លៃទាបគួបផ្សំជាមួយនឹងជម្រើសនៃការទូទាត់ល្អ ហើយអ្នកអភិវឌ្ឍន៍បន្តទទួលបានប្រាក់ចំណេញ ពីគម្រោងទាំងនេះ គឺជាមូលហេតុចម្បងនៃភាពជោគជ័យនៃអាជីវកម្មមួយនេះ បើទោះបីជាវាមានហានិភ័យ និងឧបសគ្គ សម្រាប់អ្នកទិញដីឡូតិ៍ ក៏ដោយ។
អ្នកថ្លែងថា៖ «វាជាបញ្ហាប្រឈមបន្តិច។ អ្វីដែលសំខាន់បំផុតសម្រាប់ការអភិវឌ្ឍន៍ដីឡូតិ៍ គឺដំណើរការពាក់ពន្ធ័ជាមួយនឹងប្លង់ ហេដ្ឋារចនាសម្ព័ន្ធ ការគ្រប់គ្រង និងការអភិវឌ្ឍន៍ បើមិនដូច្នេះទេ អ្នកអភិវឌ្ឍន៍នឹងធ្វើឱ្យគម្រោងទាំងមូលរងការលំបាក»។
ផលប៉ះពាល់នាពេលអនាគតសម្រាប់អ្នកទិញចុងក្រោយ
ខណៈពេលដែលអ្នកទិញដីឡូតិ៍ធ្វើការទិញដើម្បីសាងសង់ផ្ទះ ឬដើម្បីទទួលបានប្រាក់ចំណេញពីការលក់បន្ត អ្នកដែលរំពឹងចង់សាងសង់ផ្ទះនៅលើដី នឹងត្រូវពិចារណាពីផលប៉ះពាល់នាពេលអនាគត។នៅពេលដែលអ្នកអភិវឌ្ឍន៍មិនមានប្លង់មេ ឬលក្ខខណ្ឌតម្រូវសម្រាប់អ្នកទិញដីឡូតិ៍ អ្នកនាងសុធីតាពន្យល់ថា៖ «វាក៏ពាក់ព័ន្ធនឹងការសាងសង់ដែរ ពីព្រោះជាធម្មតាទំហំ ៥ ម៉ែត្រគុណ ២០ ម៉ែត្រ ជាទំហំផ្ទះល្វែង ហើយផ្ទះល្វែង ត្រូវមានជញ្ជាំងរួមគ្នា ដូច្នេះ បើមួយសាងសង់ហើយមួយទៀតមិនសាងសង់ អ្នកសាងសង់មុនគេអាច នឹងជួបបញ្ហានៅពេលមានអ្នកសាងសង់បន្ទាប់»។
នៅពេលត្រូវយើងខ្ញុំសួរអំពីផលប៉ះពាល់សម្រាប់អ្នកទិញនាពេលអនាគត អ្នកអភិវឌ្ឍន៍ដីឡូតិ៍មួយចំនួន ដោយបដិសេធមិនបញ្ចេញឈ្មោះ ដែលបានបង្ហាញគម្រោងរបស់ពួកគេនៅក្នុងពិព័រណ៍អចលនទ្រព្យនាពេលថ្មីៗនេះនៅឯទីក្រុងកោះពេជ្រ បានឲ្យថា «យើងមិនខ្វល់អំពីរឿងនាពេលអនាគតទេ យើងគ្រាន់តែលក់ដី និងដំឡើងប្រពន្ធ័ទឹក និងអគ្គិសនី»។
អ្នកនាងសុធីតាថ្លែងថា៖ «អ្នកអភិវឌ្ឍន៍ត្រូវតែកំណត់វា។ ដីនេះពួកគាត់ [អ្នកទិញ] គួរសង់ផ្ទះមួយឬពីរជាន់ ហើយបើអាចធ្វើបានពួកគាត់ [អ្នកអភិវឌ្ឍន៍] គួរតែបុកគ្រឹះសម្រាប់អ្នកទិញ។ វាល្អ ព្រោះវាពិតជាមិនមានផលប៉ះពាល់ដល់អ្នកទិញទេ នេះគឺជាគំនិតរបស់ខ្ញុំ ពីព្រោះផលប៉ះពាល់ជាធម្មតាកើតឡើងដោយសារគ្រឹះ»។
ពីហានិភ័យបុគ្គលរហូតដល់កំណើនសេដ្ឋកិច្ចជាតិឈានដល់ការបង្កើតច្បាប់
ដោយសារតែអាជីវកម្មនេះនៅតែបន្តរីកដុះដាលដោយប្រជាជនកម្ពុជាកាន់តែច្រើនឡើងៗ បាននាំគ្នាមកចាប់យកការទិញដីឡូតិ៍ វាក៏បង្កការព្រួយបារម្ភ ដល់សេដ្ឋកិច្ចកម្ពុជាផងដែរ។ ធនាគារពិភពលោកនៅឆ្នាំ ២០១៨ បានលើកឡើងថា ការអភិវឌ្ឍដីឡូតិ៍បង្កការព្រួយបារម្ភ ដល់វិស័យហិរញ្ញវត្ថុ ដោយលើកឡើងថា ការទិញ និងលក់ដីឡូតិ៍គឺជាសកម្មភាពអាជីវកម្មមិនច្បាស់លាស់ ធ្វើឡើងសម្រាប់រំពឹងផលចំណេញនាពេលអនាគត និងការកើនឡើងនូវកម្ចីអចលនទ្រព្យ។
ក្នុងឆ្នាំដដែល រដ្ឋាភិបាលក៏បានសម្តែងការព្រួយបារម្ភចំពោះសកម្មភាពនេះ ជាមួយនឹងប្រកាសដែលត្រូវបានអនុវត្ត ដើម្បីធានានិរន្តរភាព នៃការគ្រប់គ្រងដីធ្លី និងនគរូបនីយកម្ម ជាពិសេសសម្រាប់ការអភិវឌ្ឍដីឡូតិ៍។
«នៅពេលយើងមានបទពិសោធន៍ យើងចាប់ផ្តើមមានច្បាប់ និងបទបញ្ញាត្តិ។ ប្រសិនបើពួកគាត់បែងចែកដីជាដីឡូត៍ តើពួកគាត់ត្រូវមានអាជ្ញាប័ណ្ណអ្វីខ្លះពីក្រសួងរៀបចំដែនដី នគរូបនីយកម្ម និងសំណង់»។ អ្នកនាងសុធីតា ពន្យល់។
អ្នកនាងបានមានប្រសាសន៍ទៀតថា «ប្រសិនបើពួកគាត់ [អ្នកអភិវឌ្ឍន៍] មានអាជ្ញាប័ណ្ណត្រឹមត្រូវ ពួកគាត់គឺជាអ្នកអភិវឌ្ឍន៍ដែលមានការអនុញ្ញាត (បានចុះបញ្ជីជាមួយ ក្រសួង ប្រសិនបើពួកគេមានដី ១០០ ឡូតិ៍ ពួកគាត់ត្រូវតែមាន ១០០ ប័ណ្ណ) ហើយពួកគាត់ត្រូវតែអភិវឌ្ឍស្របតាមផែនការមេរបស់ពួកគាត់ ដូចជាការដំឡើងអគ្គិសនី លូរ ផ្លូវថ្នល់ និងការគ្រប់គ្រងអចលនទ្រព្យ។ ដូចនេះ វាឲមិនមានបញ្ហាអ្វីទេ»។
- Video Advertisement -
English 
ខ្មែរ 
