ព្រឹត្តិការណ៍ប្រចាំថ្ងៃសំខាន់ៗក្នុងខែ ឧសភា-មិថុនា របស់សាលារាជធានីភ្នំពេញ (PPCH)

• Proeksa Meas
• 25 ខែ​កក្កដា 2017
• Uncategorized
• 106 មើល

ស្ពានថ្មើរជើងឆ្លងផ្លូវជម្ពូវ័នបើកឲ្យដំណើរការ

អគាររដ្ឋបាលជ្រោយចង្វារបើកដំណើរការជាផ្លូវការ

១៧ ឧសភា៖ ឯកឧត្តម ប៉ា សុជាតិវង្ស អភិបាលនៃគណៈអភិបាលរាជធានីភ្នំពេញ បានអញ្ជើញជាអធិបតីភាពក្នុងពិធីសម្ពោធដាក់ឱ្យប្រើប្រាស់ជាផ្លូវការអគាររដ្ឋបាលខណ្ឌជ្រោយចង្វារ មានកំពស់២ជាន់ ទំហំ ២៨មx១៥ម ស្ថិតក្នុងភូមិគៀនឃ្លាំង សង្កាត់ព្រែកលាប ខណ្ឌជ្រោយចង្វារ។

ជប៉ុនបណ្តុះបណ្តាលមន្រ្តីកម្ពុជាស្តីពីការគ្រប់គ្រងប្រព័ន្ធលូបង្ហូរទឹក

២៧ ឧសភា៖ គណៈប្រតិភូមកពីទីក្រុង Kitakyosui ប្រទេសជប៉ុនបានជួបជាមួយមន្រ្តីមន្ទីរនាំក្រសួងសាធារណៈការ និងដឹកជញ្ជូនរាជធានីភ្នំពេញដើម្បីពិភាក្សាពីការបណ្តុះបណ្តាលស្តីពីបញ្ហាការថែទាំ និងការគ្រប់គ្រងនៃប្រព័ន្ធលូបង្ហូរទឹក និងបញ្ហានៃការសាយភាយទឹកដែលមានសារជាតិពុល។ ក្រោយចប់វគ្គបណ្តុះបណ្តាល គេរំពឹងថា ការគ្រប់គ្រងប្រព័ន្ធលូទឹកនៅកម្ពុជា នឹងត្រូវបានកែលម្អឲ្យកាន់តែប្រសើរជាងមុន។

PPCH ចូលរួមបើកសម្ពោធការដ្ឋានសាងសង់ផ្សារម៉ាក្រូ

២៩ ឧសភា៖ ផ្សារម៉ាក្រូកម្ពុជាបានបើកការដ្ឋានសាងសង់ជាផ្លូវការកាលពីថ្ងៃទី ២៩ ខែឧសភា នៅជិតផ្សារទំនើបអ៊ីអនម៉លទី ២ ស្ថិតនៅខណ្ឌសែនសុខ រាជធានីភ្នំពេញ ក្រោមអធិបតីភាព ឯកឧត្តម ប៉ាសុជាតិ វង្ស អភិបាលនៃគណៈអភិបាលរាជធានីភ្នំពេញ។ ការសាងសង់ផ្សារលក់រាយដ៏ធំនៅកម្ពុជាមួយនេះ រំពឹងថានឹងរួចរាល់នៅចុងឆ្នាំ២០១៧ នេះ។ ម៉ាក្រូជាមជ្ឈមណ្ឌលលំដាប់អន្តរជាតិ ដែលនឹងផ្តល់ជូនប្រតិបត្តិករអាជីវកម្មជាច្រើន រួមមាន ហាងលក់រាយ ហាងចែកចាយបន្ត សណ្ឋាគារ ភោជនីយដ្ឋាន អាជីវកម្មជាច្រើនទៀត។

បង្កន់សាធារណៈនៅទីលានប្រជាធិបតេយ្យបើកឲ្យដំណើរការ

៧ មិថុនា៖ ការសាងសង់បង្គន់សាធារណៈថ្មីនៅទីលានប្រជាធិបតេយ្យ ដែលស្ថិតនៅក្នុងខណ្ឌ ឬស្សីកែវត្រូវបានបញ្ចប់ជាស្ថាពរកាលពីចុងខែឧសភាកន្លងមកនេះ។

ផ្្លូវជាតិលេខ៥ ចាក់បេតុង បើកឲ្យដំណើរការ

១៣ មិថុនា៖ ការដ្ឋានចាក់បេតុងនៃផ្លូវជាតិលេខ៥ បានសម្រេចបញ្ចប់ការសងសង់១០០ ភាគរយ។ ផ្លូវជាតិលេខ៥ មានប្រវែង ៣៩០០ ម៉ែត្រ ដែលមានទទឹង១៦ ម៉ែត្រ ហើយផ្លូវជាតិ នេះតភ្ជាប់ពីស្ពានព្រែកភ្នៅទៅកាន់តំបន់យឿត្រី។ បន្ថែមពីនេះ សាលារាជធានីភ្នំពេញក៏បាន ពង្រីកផ្លូវទំនប់កប់ស្រូវដែលមានប្រវែង ៦៣៨ ម៉ែត្រ ទទឹង៥ ម៉ែត្រដោយតភ្ជាប់ពីព្រែកភ្នៅ ទៅកាន់ផ្លូវជាតិលេខ៥។

សួនថ្មើរជើងតាមមាត់ទន្លេស្វាគមន៍ព្រះរាជពិធីបុណ្យអ៊ុំទូក

១៤ មិថុនា៖ គិតត្រឹមថ្ងៃទី១៤ ខែមិថុនា ឆ្នាំ២០១៧នេះ ការដ្ឋានកែលំអសួនមាត់ទន្លេ ចាប់ពីព្រះអង្គដង្កើដល់ព្រះគន្លង់ សម្រេចបាន ៦៥% ហើយសាលារាជធានីភ្នំពេញនឹងបញ្ចប់ការដ្ឋានការកែលំអទាំងស្រុង ដែលតភ្ជាប់ពីទីក្រុងកោះពេជ្រ ឆ្ពោះទៅកាន់ស្ពានជ្រោយចង្វារឲ្យបានមុនព្រះរាជពិធីបុណ្យអ៊ុំទូកឈានមកដល់។

 

កិច្ចពិភាក្សាលម្អិតពីការសាងសង់ស្ពានដែក

១៥ មិថុនា៖ ក្រុមការងារសាលារាជាធានីភ្នំពេញបានចុះពិនិត្យទីតាំងសាងសង់ស្ពានបណ្តោះអាសន្នអំពីដែកបាឡេឆ្លងកាត់ទន្លេសាបនៅត្រង់ចំណុចឃ្លាំងប្រេងឥន្ធនៈសូគីម៉ិច ឬស្សីកែវទៅកាន់តំបន់អភិវឌ្ឍន៍ជ្រោយចង្វារ របស់ក្រុមហ៊ុន OCIC។ ស្ពានដែកបាឡេនេះ គឺធ្វើការសាងសង់ឲ្យឆ្លងបណ្តោះអាសន្នដើម្បីសម្រួលចរាចរណ៍ពីស្ពានជ្រោយចង្វារចាស់ដែលនឹងត្រូវធ្វើការជួសជុល បន្ទាប់ពីស្ពាននោះជួសជុលរួចស្ពានដែកបេឡេនេះនឹងត្រូវរួសរើសាងសាង់ជាស្ពានថ្មវិញក្នុងការតភ្ជាប់រវាងខណ្ឌជ្រោយចង្វារ និងខណ្ឌឬស្សីកែវ ដែលនឹងជួយសម្រួលក្នុងការធ្វើដំណើររបស់ប្រជាពលរដ្ឋ។

កិច្ចប្រជុំរៀបចំប្លង់មេអភិវឌ្ឍន៍តំបន់ជ្រោយចង្វារ

២១ មិថុនា៖ ឯកឧត្តម អៀង អូននី អភិបាលរងរាជធានីភ្នំពេញ បានដឹកនាំប្រជុំរៀបចំប្លង់មេអភិវឌ្ឍន៍តំបន់ជ្រោយចង្វារ ដើម្បីឱ្យមានការគ្រប់គ្រង ការអភិវឌ្ឍន៍នានាឲ្យត្រូវតាមលក្ខណៈបច្ចេកទេស និងបទដ្ឋានដែលបានកំណត់ក្នុងប្លង់គោលអភិវឌ្ឍន៍រាជធានីភ្នំពេញឆ្នាំ២០៣៥៕