រដ្ឋបាលខេត្តត្បូងឃ្មុំចេញគោលការណ៍ថ្មីរឹតបន្ដឹងអាជីវកម្មពុះដីឡូតិ៍ សំណង់ និងដីធ្លី

• 30 ខែ​ធ្នូ 2021
• ព័ត៌មានអចលនទ្រព្យ
• 6 មើល

រដ្ឋបាលខេត្តត្បូងឃ្មុំ បានចេញបញ្ជាឱ្យមន្ទីរ និងរដ្ឋបាលក្រុងស្រុកក្រោមឱវាទទាំងអស់ ពង្រឹងវិធានការគ្រប់គ្រងអាជីវកម្មពុះដីឡូតិ៍ សំណង់ ការជីក និងចាក់បំពេញអាចម៍ដី នៅទូទាំងខេត្ត ក៏ដូចជាត្រូវអនុវត្តវិធានការក្ដៅដើម្បីទប់ស្កាត់ និងបង្ក្រាបការទន្ទ្រានដីព្រៃលិចទឹក និងតំបន់អភិរក្សនានា។

លិខិតលេខ ០៤២/២១ គបឯខ.តឃ ចុះថ្ងៃទី ២១ ខែធ្នូ ឆ្នាំ២០២១ បានបញ្ជាក់ដូចខាងក្រោម៖

-មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត ត្រូវធ្វើការត្រួតពិនិត្យរាល់ ការងារសំណង់ និងការពុះដីឡូត៍ ឱ្យបានត្រឹមត្រូវ ដោយអនុលោមតាមបទប្បញ្ញត្តិបច្ចេកទេស

-មន្ទីរសាធារណការ និងដឹកជញ្ជូនខេត្ត ត្រូវធ្វើការត្រួតពិនិត្យរាល់សំណង់ទាំងឡាយណា ដែលបានសាងសង់ ឬបាននឹងកំពុងសាងសង់លើដីចំណីផ្លូវ ហើយណែនាំដល់ម្ចាស់សំណង់ឱ្យអនុវត្តស្របច្បាប់វិញ

-មន្ទីររ៉ែ និងថាមពលខេត្ត ត្រូវតាមដាន ត្រួតពិនិត្យ និងវាយតម្លៃអំពីអាជ្ញាបណ្ណសិប្បកម្មធនធានរ៉ែ(ការជីកយកអាចម៍ដី) ដោយត្រូវធ្វើការហាមឃាត់ជាដាច់ខាតចំពោះការជីកយកអាចម៍ដីនៅក្នុងតំបន់ដីព្រៃលិចទឹក ឬតំបន់អភិរក្ស

-មន្ទីរកសិកម្ម រុក្ខាប្រមាញ់ និងនេសាទខេត្ត មន្ទីរធនធានទឹក និងឧតុនិយមខេត្ត និងមន្ទីរបរិស្ថានខេត្ត និងស្ថាប័នពាក់ព័ន្ធ ត្រូវចុះពិនិត្យ និងស្រាវជ្រាវការទន្ទ្រានដីព្រៃលិចទឹក និងតំបន់អភិរក្សនានា

-អភិបាលក្រុង ស្រុក ត្រូវតាមដាន និងត្រួតពិនិត្យលើការរំលោភយកដីរដ្ឋ និងការសាងសង់សំណង់លើដីចំណីផ្លូវ សំណង់គ្មានលិខិតអនុញ្ញាត ការចាក់បំពេញអាចម៍ដី ការងារអនាម័យ បរិស្ថាននៅតាមទីប្រជុំជន និងតាមបណ្តោយដងផ្លូវជាតិ។

បន្ថែមពីនេះ រដ្ឋបាលខេត្ត ក៏បានណែនាំដល់មន្ទីរជំនាញ អង្គភាពពាក់ព័ន្ធទាំងនេះ ត្រូវបន្តការផ្សព្វផ្សាយ និងពង្រឹងការអនុវត្តនូវនីតិវិធីទាំងឡាយតាមខ្លឹមសារសេចក្តីជូនដំណឹងលេខ ៣៥៩/២១ សជណ.តឃ ចុះថ្ងៃទី២២ ខែកញ្ញា ឆ្នាំ២០២១ ផងដែរ។ (អានបន្ថែម)

• ច្បាប់ និងបញ្ញាត្តិ
• ការវិនិយោគ និងមូលធន
• ធុរកិច្ច និងទីផ្សារ
• ច្បាប់ និងបញ្ញាត្តិ
• ការវិនិយោគ និងមូលធន
• ធុរកិច្ច និងទីផ្សារ