រដ្ឋផ្ដល់សិទ្ធិពិសេសដល់មន្ត្រីក្រសួងដែនដី៣៦១រូប ដើម្បីចាត់វិធានការធ្ងន់លើបទលើ្មសសំណង់

25 ខែមីនា 2021
Uncategorized @km
8 មើល

ក្រសួងរៀបចំដែនដី នគរូបនីយកម្ម និងសំណង់ និងក្រសួងយុត្តិធម៌ បានចេញប្រកាសអន្តរក្រសួងសម្រេច ផ្តល់នីតិសម្បទាជានគរបាលយុត្តិធម៌ ដល់មន្ត្រីក្រសួងដែនដីចំនួន ៣៦១ រូប ក្នុងគោលបំណងដើម្បីរឹតបន្ដឹងការអនុវត្តច្បាប់ក្នុងវិស័យសំណង់ឱ្យកាន់តែមានប្រសិទ្ធភាព។

បើបកស្រាយជាភាសាសាមញ្ញ ការទទួលបាននីតិសម្បទាជានគរបាលយុត្តិធម៌មានន័យថា មន្ត្រីទាំង៣៦១ រូប នឹងមានសិទ្ធិច្រើនជាងមុនក្នុងការអនុវត្ដការងារ ពោលគឺមានសិទ្ធិចាប់ ផាកពិន័យ និងប្ដឹងភ្លាមៗ ក្នុងករណីរកឃើញបទល្មើសក្នុងវិស័យសំណង់ ដូចជាប៉ូលិសនគរបាលដូច្នោះដែរ។

ជារួម មន្ត្រីទាំងនោះ មានភារកិច្ចត្រួតពិនិត្យ បញ្ឈប់ ចាត់វិធានការបណ្តោះអាសន្ន ចាប់ភស្តុតាង កសាងសំណុំរឿង និងពិន័យចំពោះបទល្មើសសំណង់។

លើសពីនេះ មន្ត្រីទាំងនេះ ក៏មានសិទ្ធិដកហូតជាបណ្តោះអាសន្ននូវលិខិតអនុញ្ញាត ឬអាជ្ញាបណ្ណពាក់ព័ន្ធនានា ក្នុងករណីដែលអ្នកកាន់កាប់បានប្រព្រឹត្តបទល្មើសដែលច្បាប់សំណង់មានចែង។

ប៉ុន្ដែ សិទ្ធិរបស់មន្រ្តីទាំងនេះក៏មានដែនកំណត់ដែរ។ បើតាមប្រកាសអន្តរក្រសួងលេខ ០៥៤ កយ.ដនស.ប្រក/២១ ចុះថ្ងៃ១៨ ខែកុម្ភៈ ឆ្នាំ២០២១ មន្ត្រីទាំង៣៦១ រូប ត្រូវអនុវត្តមុខងារ និងភារកិច្ចរបស់ខ្លួន ស្របតាមច្បាប់ស្តីពីសំណង់ ក្រមនីតិវិធីព្រហ្មទណ្ឌ និងបទប្បញ្ញត្តិជាធរមាននៃព្រះរាជាណាចក្រកម្ពុជា។

គួរបញ្ជាក់ផងដែរថា មន្ត្រីទាំង ៣៦១ រូបនោះ ជាមន្ត្រីអធិការកិច្ចថ្នាក់ជាតិ ដល់ថ្នាក់ក្រោមជាតិ ដែលមកពីច្រើនស្ថាប័នដូចជា អគ្គនាយកដ្ឋានសំណង់ នាយកដ្ឋានស្រាវជ្រាវបច្ចេកទេសសំណង់ នាយកដ្ឋានសិក្សាគម្រោងប្លង់ អគ្គនាយកដ្ឋានរៀបចំដែនដី និងនគរូបនីយកម្មសំណង់ នាយកដ្ឋានស្រាវជ្រាវ និងបទបញ្ញត្តិនីតិប្បញ្ញត្តិ នាយកដ្ឋាននគរូបនីយកម្ម នាយកដ្ឋានរៀបចំដែនដី អគ្គនាយកលំនៅឋាន និងមន្ទីររៀបចំដែនដី នគរូបនីយកម្ម សំណង់ និងសុរិយោដីរាជធានី-ខេត្តទូទាំងប្រទេស។

ក្រុមមន្រ្តីដដែលនេះ ក៏តម្រូវឱ្យមានការចូលស្បថទៅតាមនីតិវិធី ដើម្បីអនុវត្តការងារដោយមានតម្លាភាពផងដែរ។

លោក ជីវ ស៊ីវផេង អ្នកគ្រប់គ្រងទូទៅនៃអគ្គលេខាធិការដ្ឋាន សមាគមអ្នកសាងសង់កម្ពុជា បានសម្ដែងការគាំទ្រយ៉ាងមុតមាំលើក្រុមការងារពិសេសមួយនេះ។

លោក ស៊ីវផេង បានឱ្យដឹងថា៖ «ក្នុងនាមជាវិស័យឯកជន យើងមើលឃើញពីការរីកចម្រើនក្នុងវិស័យសំណង់ ប៉ុន្តែកន្លងមកក៏មានបញ្ហាមួយចំនួនដែរ ឧទាហរណ៍ដូចជា ការបាក់ដួលរលំអគារនានាជាដើម។ ដូច្នេះ សង្ឈឹមថាក្រុមការងារពិសេសនេះ នឹងជួយពង្រឹងគុណភាព និងសុវត្ថិភាពគម្រោងសំណង់នានាបានមួយកម្រិតទៀត»។

លោកបន្តថា សមាគមនឹងបន្តចូលរួមជាមួយរាជរដ្ឋាភិបាលក្នុងការរៀបចំសំណង់ឱ្យមានសណ្តាប់ធ្នាប់ និងមានគុណភាពជាងមុន។

- Video Advertisement -