រដ្ឋាភិបាលជូនដី ៥ហិចតា ដល់សាលាភូមិន្ទដើម្បីសង់អគារទំនើបថ្មី ក្បែរវិមានឈ្នះ-ឈ្នះ

Proeksa Meas
15 ខែមិថុនា 2020
Uncategorized @km
183 មើល

រាជរដ្ឋាភិបាល ក្រោមការចាត់ចែងផ្ទាល់របស់ក្រសួងសេដ្ឋកិច្ច និងហិរញ្ញវត្ថុ បានប្រគល់ដីទំហំ ៥ ហិចតា មកឲ្យសាកលវិទ្យាល័យភូមិន្ទភ្នំពេញ ដើម្បីឆ្លើយតបទៅនឹងការរីកចម្រើន និងតម្រូវការរបស់សាកលវិទ្យាល័យ។

នេះបើយោងតាមទំព័រហ្វេសបុកផ្លូវការរបស់ ឯកឧត្តម បណ្ឌិត ជេត ជាលី សាកលវិទ្យាធិការនៃសាកលវិទ្យាល័យភូមិន្ទភ្នំពេញ កាលពីថ្ងៃទី ០៩ មិថុនា ២០២០ នេះ។

ចំពោះព័ត៌មានលម្អិត និងថវិកាសម្រាប់សាងសង់បរិវេណថ្មីមិនទាន់បញ្ចេញឱ្យដឹងនៅឡើយទេ ទោះយ៉ាងណាក្តី សាកលវិទ្យាធិការសាកលវិទ្យាល័យ បានបង្ហាញពីជម្រើសប្លង់ត្រួសៗមួយចំនួននៃផែនការស្ថាបត្យកម្មអគារផ្សេងៗគ្នា នៃបរិវេណអគារថ្មី ដោយបង្ហាញការប្រៀបធៀបរវាងសំណង់ស្ថាបត្យកម្មដំបូលបែបខ្មែរនិយម និងមួយទៀត គឺមានលក្ខណៈទំនើបជាងនេះបន្តិច ដែលលោកបានហៅថា “បរិវេណសាលាឆ្លាតវៃ = Smart Campus” ។

ឯកឧត្តមបានបន្ថែមថា៖ «បច្ចុប្បន្ននេះ យើងកំពុងសាងផែនការមេ ដើម្បីអភិវឌ្ឍមណ្ឌលថ្មីនេះឲ្យទៅជាមណ្ឌលសិក្សាទំនើបមួយ។»

យោងតាមប្រភពដដែល ចំពោះប្លង់់របស់សាកលវិទ្យាល័យភូមិន្ទភ្នំពេញទី ៣ នេះ ត្រូវបានរៀបចំ និង រចនាឡើងដោយដេប៉ាតេម៉ង់វិស្វកម្មរបស់សាកលវិទ្យាល័យផ្ទាល់តែម្តង។

គួរបញ្ជាក់ផងដែរថា សាកលវិទ្យាល័យភូមិន្ទភ្នំពេញ គឺជាស្ថាប័នអប់រំជាន់ខ្ពស់រដ្ឋ ដែលធំជាង និងមានចំណាស់ជាងគេបង្អស់ គឺត្រូវបានកសាងឡើងតាំងពីឆ្នាំ ១៩៦០ មកម្ល៉េះ។ បច្ចុប្បន្ននេះ សាកលវិទ្យាល័យនេះ មានចំនួន ២ ទីតាំង រួមមាន សាកលវិទ្យាភូមិន្ទភ្នំពេញទី១ ដែលមានទីតាំងនៅលើផ្លូវសហព័ន្ធរុស្សី ក្បែរនឹងស្ពានអាកាស៧មករា និងសាកលវិទ្យាល័យភូមិន្ទទី ២ ដែលមានទីតាំងស្ថិតនៅជាប់នឹងរាជបណ្ឌិតសភាកម្ពុជា។

គេនៅចាំបានថា សំណង់ស្ថាបត្យកម្មវិទ្យាស្ថានភាសាបរទេសដ៏ស្រស់ស្អាត ស្ថិតក្នុងបរិវេណសាកលវិទ្យាល័យភូមិន្ទភ្នំពេញទី១ ត្រូវបានរចនាប្លង់ដោយផ្ទាល់ដៃពីស្ថាបត្យកម្មរៀមច្បងដ៏ល្បីល្បាញរបស់ខ្មែរ គឺលោកបណ្ឌិត វណ្ណ មូលីវណ្ណ។

ក្នុងបទសម្ភាសន៍មួយ មុនពេលលោកទទួលអនិច្ចធម្ម លោកធ្លាប់មានប្រសាសន៍ថា៖

«…តួនាទីនៃសំណង់ដែលយើងសាងសង់ ត្រូវមានឲ្យច្បាស់លាស់ គឺឲ្យវាដំណើរការស្រួលទៅតាមបែបបទទំនៀមទម្លាប់វប្បធម៌។ បើសង់សម្រាប់ខ្មែរ យើងត្រូវយល់ថា ខ្មែរគេរស់នៅយ៉ាងម៉េច ភូមិសាស្ត្រមានពន្លឺ មានខ្យល់ឬអត់។ ស្ថាបត្យករ ត្រូវយល់ច្បាស់អំពីភារកិច្ចរបស់ខ្លួន គឺមិនមែនសង់សម្រាប់ខ្លួនឯងទេ គឺធ្វើសម្រាប់អ្នកដទៃដែលគេរស់នៅ។ ម៉្លោះហើយត្រូវយល់ឲ្យច្បាស់ ស្តាប់គេ មើលគេមុននឹងសង់។ និយាយឲ្យខ្លីទៅ គឺគិតឲ្យច្បាស់លាស់ទើបសង់»៕