រដ្ឋាភិបាលជំរុញការវិនិយោគទាញយកថាមពលពីសំរាម សំណល់រឹងទីប្រជុំជន

14 ខែមករា 2020
Uncategorized @km
7 មើល

រាជរដ្ឋាភិបាលកម្ពុជា ជំរុញអោយមានការវិនិយោគ ក្នុងការទាញយកថាមពលអគ្គិសនី ពីសំរាម សំណល់រឹងទីប្រជុំជន ដែលជាផ្នែកមួយនៃការគ្រប់គ្រង់សំរាម សំណល់រឹងទីប្រជុំជន ខណៈបរិមាណកាកសំណល់រឹង មានអាត្រាកើនឡើងខ្ពស់ពីមួយឆ្នាំទៅមួយឆ្នាំ។

ការទាក់ទាញវិនិយោគទាញយកថាមពលពីសំរាម សំណល់រឹងនៅតាមទីប្រជុំជន ស្ថិតនៅក្នុងសេចក្តីព្រាងគោលនយោបាយស្តីពី ការគ្រប់គ្រង់សំរាម សំណល់រឹងទីប្រជុំជន ឆ្នាំ២០១៩-២០២៨ ដែលអន្តរក្រសួងកំពុងពិភាក្សា និងរៀបចំគោលនយោបាយនេះសម្រាប់អនុវត្ត។

យោងតាមក្រសួងបរិស្ថាន រដ្ឋាភិបាល បានផ្តោតអាទិភាពលើការបន្តពង្រឹង ការគ្រប់គ្រងសំណល់រឹង រាវ ឧស្ម័ន និងសារធាតុគ្រោះថ្នាក់ ជាកិច្ចឆ្លើយតបទៅនឹងការអភិវឌ្ឍន៍។

បរិមាណសំរាម សំណល់រឹង មាន១.៧លានតោន ឬប្រមាណ ៥១ភាគរយ នៃបរិមាណសំរាម សំណល់សរុប ដែលត្រូវបានប្រមូល និងចាក់នៅទីលានចាក់សម្រាម នៅក្នុងឆ្នាំ២០១៨ ជាមួយនឹងអត្រាកំណើន ១៥ភាគរយ ក្នុងមួយឆ្នាំ។

តាមរយៈគោលនយោបាយនេះ រាជរដ្ឋាភិបាល បានកំណត់គម្រោងសំខាន់ៗ សម្រាប់អនុវត្តវិធានការគោលនយោបាយ និងផែនការសកម្មភាព ចំនួន ៩គម្រោង ក្នុងនោះការវិនិយោគទាញយកថាមពលពីសំរាម សំណល់រឹង ក៏ស្ថិតក្នុងគម្រោងអតិថិភាពនេះដែរ។

គម្រោងការទាញថាមពលពីសំរាម សំណល់រឹងទីប្រជុំជន រួមមានការវិនិយោគសាងសង់ឡដុតសំណល់ ដើម្បីទាញយកថាមពល ដែលអាចផលិតអគ្គិសនី សម្រាប់រាជធានីភ្នំពេញ និងបណ្តាទីក្រុងដែលមានសក្កានុពល និងពុំមានទីលានទុកដាក់ ចាក់សំរាម សំណល់រឹងទីប្រជុំជន និងការជ្រើសរើសគម្រោងការបំប្លែងសំរាម សំណល់រឹង (Waste to Energy) ទៅជាថាមពល ត្រូវសិក្សាពីជម្រើសបច្ចេកវិទ្យានានា ដែលសមស្រប ព្រមទាំងធានាដល់និរន្តភាពនៃប្រតិបត្តិការគម្រោងផងដែរ។

សេចក្តីព្រាងគោលនយោបាយស្តីពីការគ្រប់គ្រងសំរាម សំណល់រឹងទីប្រជុំជន ២០១៩-២០២៨ ត្រូវលើកយកមកពិភាក្សានៅក្នុងកិច្ចប្រជុំ កាលពីថ្ងៃទី១៤ ខែមករា ដោយមានការចូលរួមដោយ ឯកឧត្តម អូន ព័ន្ធមុន្នីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ ឯកឧត្តម សាយ សំអាល់ រដ្ឋមន្រ្តីក្រសួងបរិស្ថាន និងឯកឧត្តម ឃួង ស្រេង អភិបាលរាជធានីភ្នំពេញ៕

- Video Advertisement -