រដ្ឋាភិបាលអនុម័តផែនការមេចុងក្រោយនៃគម្រោងអាកាសយានដ្ឋានអន្តរជាតិភ្នំពេញថ្មី

4 ខែកក្កដា 2020
Uncategorized
10 មើល

រដ្ឋលេខាធិការដ្ឋានអាកាសចរស៊ីវិល កាលពីម្សិលមិញនេះ(៣ កក្កដា) បានចុះហត្ថលេខាអនុម័តផែនការមេចុងក្រោយ នៃគម្រោងសាងសង់ អាកាសយានដ្ឋានអន្តរជាតិភ្នំពេញថ្មីតម្លៃ ១,៥ ពាន់លានដុល្លារ ។ នេះបើយោងតាម ហ្វេសប៊ុកផ្លូវការរបស់រដ្ឋលេខាធិការដ្ឋានអាកាសចរស៊ីវិល។

ឯកឧត្តម ម៉ៅ ហាវណ្ណាល់ រដ្ឋមន្រ្តីទទួលបន្ទុករដ្ឋលេខាធិការដ្ឋានអាកាសចរស៊ីវិល បានចុះហត្ថលេខាលើផែនការមេចុងក្រោយ នៃគម្រោងសាងសង់ អាកាសយានដ្ឋានអន្តរជាតិភ្នំពេញថ្មី ជាមួយអ្នកឧកញ៉ា ពុង ឃាងសែ ដើម្បីបញ្ចប់គម្រោងដំណាក់កាលទី ១ ក្នុងឆ្នាំ ២០២៣ នេះ។

ក្នុងពិធីចុះហត្ថលេខានេះ ឯកឧត្តម បានមានប្រសាសន៍ ថា៖ «អាកាសយានដ្ឋានអន្ដរជាតិភ្នំពេញថ្មី គឺជាអាកាសយានដ្ឋាន កម្រិតលំដាក់ថ្នាក់ពិភពលោក ដែលយើងអាចសន្និដ្ឋានបានថា ជាអាកាសយានដ្ឋានលំដាក់ថ្នាក់ទី៩ ក្នុងពិភពលោក»។

គួរបញ្ជាក់ផងដែរថា ព្រលានយន្តហោះអន្តរជាតិភ្នំពេញថ្មី គឺជាគម្រោងអភិវឌ្ឍន៍ដ៏ធំមួយរបស់កម្ពុជា សាងសង់នៅលើផ្ទៃដីទំហំ ២.៦០០ ហិកតា មានទីតាំងស្ថិតនៅឃុំ ព្រែកស្លែង ស្រុកកណ្តាលស្ទឹង ខេត្តកណ្តាល។ គម្រោងនេះ គឺជាការវិនិយោគដោយក្រុមហ៊ុនវិនិយោគទុនអាណិកជនកម្ពុជា (OCIC) តម្លៃប្រមាណ ១,៥ ពាន់លានដុល្លារអាមេរិក និងត្រូវបានចែកចេញជា ៣ ដំណាក់កាល។ (អានបន្ថែម និងបន្ថែម)

បច្ចុប្បន្នគម្រោងនេះ ស្ថិតក្នុងដំណាក់កាលទី ១ សម្រេចបានការសាងសង់បានប្រមាណ ៣០% ហើយគ្រោងនឹងបញ្ចប់ក្នុងឆ្នាំ ២០២៣ នេះ រពឹងនឹងទាក់ទាញភ្ញៀវទេសចរប្រមាណ ១៣ លាននាក់ក្នុងមួយឆ្នាំៗ។ (អានបន្ថែម)

កាលពី២២ ខែមិថុនា ឆ្នាំ ២០២០ កន្លងមកនេះ សម្តេចនាយករដ្ឋមន្ត្រី ហ៊ុន សែន ចុះត្រួតពិនិត្យការដ្ឋានសាងសង់ ព្រលានយន្តហោះអន្តរជាតិភ្នំពេញថ្មី ដោយបញ្ជាក់ថាដំណើរការសាងសង់នៅតែបន្តយ៉ាងរលូន ទោះបីជាមានវិបត្តិកូវីដក៏ដោយ។ (អានបន្ថែម)

- Video Advertisement -