សម្ដេចតេជោ ចាប់អារម្មណ៍ចង់បំពាក់អំពូលឆ្លាតវៃ (LED) សម្រាប់ដងវិថីទូទាំងប្រទេស

Proeksa Meas
3 ខែមិថុនា 2020
Uncategorized
108 មើល

ខេត្តព្រះសីហនុនឹងក្លាយជាទីក្រុងឆ្លាត ដើរមុនគេក្នុងចំណោមទីក្រុងឆ្លាតដទៃ បន្ទាប់ពីការរៀបចំបំពាក់អំពូលឆ្លាតវៃតាមដងវិថី។

សម្តេច ហ៊ុន សែន នាយករដ្ឋមន្ត្រីកម្ពុជា បានថ្លែងយ៉ាងដូច្នេះ នៅក្នុងសន្និសីទកាសែតនៃដំណើរចុះត្រួតពិនិត្យវឌ្ឍនភាពគម្រោងសាងសង់ផ្លូវ ៣៤ ខ្សែ ក្នុងខេត្តព្រះសីហនុនាថ្ងៃទី ០១ ខែ មិថុនា ឆ្នាំ ២០២០។

សម្តេចបានមានប្រសាសន៍ថា៖ «ខ្ញុំអាចនិយាយបានថា ខេត្តព្រះសីហនុនឹងក្លាយជាទីក្រុងឆ្លាត ដើរមុនគេក្នុងចំណោមទីក្រុងឆ្លាតដទៃ។ ក្នុងនោះខ្ញុំបានណែនាំឲ្យឯកឧត្តម ជា សុផារ៉ា ចុះហត្ថលេខាជាមួយនឹងក្រុមហ៊ុន Minebea ដែលមានទីតាំងនៅឯតំបន់សេដ្ឋកិច្ចពិសេសភ្នំពេញ យកបង្គោលភ្លើង និងអំពូល គេហៅថា អំពូលឆ្លាត យកមកដាក់ជាង៥០០០ ហើយខ្ញុំគិតថានៅទូទាំងប្រទេសថ្ងៃក្រោយ ត្រូវប្រើអំពូលបែបនេះដើម្បីបំភ្លឺតាមផ្លូវ។»

ការរៀបចំដាក់អំពូលភ្លើងឆ្លាតនេះ មិនត្រឹមតែអាចសន្សំសំចៃអគ្គិសនីប៉ុណ្ណោះទេ ថែមទាំងក្លាយជាសក្ដានុពលទេសចរណ៍ថែមទៀតផង។

សម្ដេចបានបន្តថា៖ «ខ្ញុំគិតថាខេត្តព្រះសីហនុ គ្រាន់តែយកផ្លូវថ្នល់ ក៏អាចទាក់ទាញទេសចរក្នុងស្រុក មកលេងកម្សាន្ត មកមើលផ្លូវថាវាស្អាតប៉ុណ្ណា។ ហើយខ្ញុំបានផ្ដល់មតិឲ្យឯកឧត្តមគួច ចំរើន ឲ្យរៀបភ្លើងឲ្យស្អាត។ គាត់មកមើលផ្លូវ ឲ្យគាត់មកមើលភ្លើង។ វាទៅជាទេសចរណ៍មួយប្រកបដោយការទាក់ទាញនៅទិសនិរតីរបស់យើងនេះ។»

គួរបញ្ជាក់ផងដែរថា ខេត្តព្រះសីហនុគឺដែលមានសក្ដានុពលសេដ្ឋកិច្ចខ្ពស់ ដែលថ្មីៗនេះ រដ្ឋាភិបាលកំពុងតែអភិវឌ្ឍផ្លូវទាំង ៣៤ខ្សែ និងហេដ្ឋារចនាសម្ព័ន្ធធំៗនៅក្នុងខេត្តនេះ ដើម្បីជាការតភ្ជាប់ប៉ូលសេដ្ឋកិច្ចសំខាន់ៗទាំង ៣ របស់កម្ពុជា។

សូមបញ្ជាក់ថា ផ្លូវទាំង ៣៤ ខ្សែនេះ ជាគម្រោងសាងសង់ហេដ្ឋរចនាសម្ព័ន្ធផ្លូវថ្នល់ មួយធំ និងសំខាន់បំផុតរបស់ប្រទេស។ សម្តេចបានហៅគម្រោងនេះថា ជាគម្រោងកសាងផ្លូវដ៏ទំនើបបំផុតដែលមិនធ្លាប់មាននៅកម្ពុជា។

“យើងមានមហាវិថីផង យើងមានវិថីផង និងមានអនុវិថីផង។ ប៉ុន្តែអនុវិថីរបស់យើងវាប៉ុនផ្លូវជាតិ ១២ម៉ែត្រ វាធំជាងផ្លូវជាតលេខ ៤ ទៅទៀត។ ហើយមហាវិថីរបស់យើង មានទំហំដល់ ៥០ ម៉ែត្រ។ ដូច្នេះ ផ្លូវថ្មីរបស់យើងនេះ មានស្តង់ដារខ្ពស់។” ប្រសាសន៍សម្តេច៕

(អានបន្ថែម)

- Video Advertisement -