សហគមន៍កូរ៉េ  ចង់មកជួយអភិវឌ្ឍវិស័យធនធានទឹក និងឧតុនិយមនៅកម្ពុជា

• 28 ខែ​កក្កដា 2025
• Uncategorized
• 6 មើល

សាជីវកម្មសហគមន៍ជនបទប្រទេសកូរ៉េ (KRC) បានជួបពិភាក្សាជាមួយក្រសួងធនធានទឹក ដើម្បីស្វែងយល់ពីវិស័យធនធានទឹក ខណៈស្ថាប័ននេះ ក៏បានបង្ហាញពីបំណងចង់ជួយអភិវឌ្ឍលើវិស័យធនធានទឹក និងឧតុនិយមនៅកម្ពុជាផងដែរ។ នេះបើយោងតាមជំនួបពិភាក្សារវាងឯកឧត្តម ប៉ុញ សច្ចៈ រដ្ឋលេខាធិការ និងជានាយកគម្រោងដែលទទួលហិរញ្ញប្បទានពីសាធារណរដ្ឋកូរ៉េ ជាមួយលោក គីម ជុង គ្យុង តំណាងប្រតិភូ KRC នៅថ្ងៃទី២៣ ខែកក្កដា ឆ្នាំ២០២៥។

នាឱកាសនោះ លោក គីម ជុង គ្យុង បានឱ្យដឹងថា KRC មានបទពិសាធន៍ធ្វើការគ្រប់គ្រងបែងចែកទឹកក្នុងប្រពន្ធ័ធារាសាស្ត្រ និងអភិវឌ្ឍលើវិស័យធនធានទឹកនៅក្នុងប្រទេសកូរ៉េប្រមាណជាង ១០០ឆ្នាំមកហើយ ក៏ដូចជានៅតាមបណ្តាប្រទេសកំពុងអភិវឌ្ឍន៍រួមទាំងប្រទេសកម្ពុជាផងដែរ។ លោកបន្តថា ផ្អែកលើភាពរីកចម្រើននៃបច្ចេកវិទ្យាទំនើបនាពេលបច្ចុប្បន្ន សាជីវកម្មសហគមន៍ជនបទកូរ៉េ មានបំណងចង់ជួយអភិវឌ្ឍវិស័យធនធានទឹក និងឧតុនិយមនៅកម្ពុជា ដែលពាក់ព័ន្ធនឹងជំនួយអភិវឌ្ឍន៍ផ្លូវការពីរដ្ឋាភិបាលកូរ៉េ។

ជាការឆ្លើយតប ឯកឧត្តមរដ្ឋលេខាធិការ បានថ្លែងអំណរគុណដល់ស្ថាប័នសាជីវកម្មសហគមន៍ជនបទកូរ៉េ(KRC)។ ឯកឧត្តម ក៏បានជម្រាបពីបេសកកម្មការងាររបស់ក្រសួង ដែលបច្ចុប្បន្នកំពុងអនុវត្តលើវិស័យធនធានទឹក និងឧតុនិយម ដោយបានសង្ខេបប្រាប់អំពីបែបបទការងារសហប្រតិបត្តិការជាមួយដៃគូអភិវឌ្ឍន៍នានា ពិសេសជាមួយប្រទេសកូរ៉េ និងផែនការអភិវឌ្ឍន៍បន្តនាពេលខាងមុខផងដែរ។

គួររម្លឹកថា ក្នុងរយៈពេលជិត ២០ឆ្នាំ មកនេះ​ រដ្ឋាភិបាលកូរ៉េ បានផ្តល់ជំនួយមករាជរដ្ឋាភិបាលកម្ពុជា ក្នុងទំហំថវិកាប្រមាណ ៤៥០លានដុល្លារ ដើម្បីជួយដល់វិស័យធនធានទឹក និងឧតុនិយមកម្ពុជា។ នេះបើយោងតាមជំនួបពិភាក្សារវាងឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម ជាមួយលោកស្រី Minnie Chey នាយិកាប្រតិបត្តិធនាគារនីហរ័ណ អាហរ័ណកូរ៉េប្រចាំកម្ពុជា(K-EXIMBANK) កាលថ្ងៃទី៩ ខែកក្កដា ឆ្នាំ២០២៥៕ (អានបន្ថែម)

• water treatment
• water infrastructure
• environment