សួនកម្សាន្តខ្នាតយក្សតម្លៃ ១.០០០ លានដុល្លារ ត្រូវបានសង់ឡើងនៅលើកោះ Phu Quoc

• Sommana Yan
• 30 ខែ​មិថុនា 2020
• ព័ត៌មានអចលនទ្រព្យ
• 82 មើល

ក្រុមហ៊ុន Vinpearl Joint Stock របស់វៀតណាម បានប្រកាសបើកជាផ្លូវការថា នឹងចំណាយទឹកប្រាក់ប្រមាណ ១.០០០ លានដុល្លារ សម្រាប់គម្រោងសាងសង់សួនកម្សាន្តខ្នាតយក្សធំជាងគេបង្អស់នៅវៀតណាម ឈ្មោះគម្រោង VinWonders Phu Quoc នៅលើកោះត្រល់ ឬ (Phu Quoc) នៅថ្ងៃទី ១ ខែ មិថុនា ស្ថិតនៅចម្ងាយប្រមាណជិត ៥០ គីឡូម៉ែត្រ ពីខេត្តហៀទៀង ចុងភាគនិរតីប្រទេសវៀតណាម។

គ្រោងនឹងសង់នៅលើ ផ្ទៃដី ២៧ ហិកតា VinWonders Phu Quoc ជាប់ឯតទគ្គកម្មជាសំណង់ឧទ្យានដ៏ធំជាងគេនៅប្រទេសវៀតណាម ដែលគ្រោងនឹងផ្តល់ជូននូវកន្ត្រកជិះទំនើបជាង ១០០ សម្រាប់ភ្ញៀវទេសចរ។ សមិទ្ធផលសួនកម្សាន្តដ៏ធំនេះ ត្រូវបានគេរំពឹងថា នឹងនាំមកនូវបទពិសោធន៍នៃការកម្សាន្តដ៏រំភើបនិងធំជាងគេ នៅក្នុងទ្វីបអាស៊ីផងដែរ។

VinWonders Phu Quoc ក្នុងដំណាក់កាលដំបូងនៃគម្រោង ចែកចេញជាផ្នែករងចំនួន ៦ រួមមាន៖ កន្លែងមជ្ឈិមសម័យអឺរ៉ុប, ពិភពវេទមន្ត, ភូមិអាថ៌កំបាំង, វិមានមហាសមុទ្រ, ពិភពព្យុះស៊ីក្លូន និងដំណើរពិភពផ្សងព្រេង និងកន្លែងបង្កប់រឿងរ៉ាវប្លែកៗចំនួន ១២ ផ្សេងទៀត ដែលមានប្រភពគំនិតចេញពីអរិយធម៌មនុស្សជាតិ។

ក្រៅពីនេះ គម្រោងនេះ ក៏រួមបញ្ចូលកន្លែងកម្សាន្តសប្បាយផ្សេងទៀត ទាំងបែបធម្មជាតិ និងបែបរមណីយដ្ឋានកែច្នៃ (Recreation Center) រួមមាន៖ កន្លែងកម្សាន្តបែបព្រៃភ្នំ ទោងកម្សាន្ត រថភ្លើងអាកាស សួនសត្វ ព្រមជាមួយនឹងហាងទំនិញ និងកាហ្វេដ៏សម្បូរបែបផងដែរ។

ចំពោះដំណាក់កាលទី២ គម្រោងនេះ នឹងសាងសង់វិមានហាយហ្វុង (Hai Vuong Palace) ដែលជានិមិត្តរូបដ៏មានមោទនភាពនៃ VinWonders Phu Quoc។ វិមានហាយហ្វុង គឺជាអាងចិញ្ចឹមត្រីមួយក្នុងចំណោមអាងចិញ្ចឹមត្រីធំជាងគេទាំង ៥ នៅលើពិភពលោក ដែលមានផ្ទៃដីរហូតដល់ ១៥,០០០ ម៉ែត្រការ៉េ។ ដោយយកស្ទីលសំណង់រាងស្នូកអណ្តើកសមុទ្រយក្ស វិមានហាយហ្វុងនេះ នឹងរចនាឡើងបែបជាកូនមហាសមុទ្រ សម្រាប់ដាក់សត្វរាប់ពាន់ប្រភេទ ដូចជាចាហួយសមុទ្រ មច្ឆាសមុទ្រពណ៌ចម្រុះ សត្វភែនឃ្វីន (Penguins) និងត្រីឆ្លាមជាដើម។ ក្រុមហ៊ុនធ្វើដូចនេះ ព្រោះចង់ឱ្យអ្នកទេសចរទទួលបទពិសោធន៍ “លង់លក់ក្នុងមហាសមុទ្រ” តែម្តង នៅពេលទៅទីនោះ។

ការស្ថាបនា VinWonders Phu Quoc ជាឧទ្យានកម្សាន្តឈានមុខគេមួយនៅអាស៊ី មិនត្រឹមតែជួយលើកកម្ពស់វិស័យទេសចរណ៍ក្នុងស្រុកវៀតណាម ប្រកបដោយប្រសិទ្ធភាពក្នុងកំឡុងពេលនៃការស្តារឡើងវិញបន្ទាប់ពីគ្រោះមហន្តរាយជំងឺកូវីដ ១៩ ប៉ុណ្ណោះទេ ប៉ុន្តែក៏បញ្ជាក់ពីទីសមត្ថភាពឧស្សាហកម្មកម្សាន្តវៀតណាម ដែលកំពុងឡើងកូដឈានចូលដល់កម្រិតអន្តរជាតិផងដែរ។

សូមបញ្ជាក់ថា កោះត្រល់ ដែលវៀតណាមហៅថា កោះ ភូកុក (Phu Quoc) នេះ បើឈរមើលពីលើភ្នំបូកគោទៅ គេឃើញស្ថិតនៅចម្ងាយប្រមាណតែ ១២ គីឡូម៉ែត្រប៉ុណ្ណោះ ពីឆ្នេរខេត្តកំពត និងប្រមាណតែ ៥​ គីឡូម៉ែត្រប៉ុណ្ណោះ ពីកោះសេះ៕ (អានបន្ថែម)