សួនសត្វភ្នំពេញសាហ្វារីកំណត់បើកនៅចុងខែមេសានេះ

• 20 ខែ​មេសា 2018
• ព័ត៌មានអចលនទ្រព្យ
• 8 មើល

សួនសត្វភ្នំពេញសាហ្វារីដែលស្ថិតនៅតំបន់ជ្រោយចង្វារបានកំណត់ថ្ងៃបើកអោយចូលទស្សនាហើយ គឺថ្ងៃទី ២៩ ខែ មេសា ខាងមុខនេះបន្ទាប់ពីការសាងសង់អស់រយៈពេលពីរឆ្នាំ។

គម្រោងសួនសត្វភ្នំពេញសាហ្វារីនេះវិនិយោគដោយក្រុមហ៊ុនលីយ៉ុងផាត់គ្រុប ក្នុងទឹកប្រាក់ជាង ៩ លានដុល្លារអាមេរិក ដែលសាងសង់លើផ្ទៃដីប្រមាណ ៨០ ហិចតានៅក្នុងខ័ណ្ឌជ្រោយចង្វារ។ សួនសត្វ Safari World Phnom Penh នេះនឹងក្លាយទៅជាសួនសត្វដ៏ធំបំផុតដែលមិនធ្លាប់មាននៅរាជធានីភ្នំពេញ។

សួនសត្វភ្នំពេញសាហ្វារីនឹងមានសត្វជាង ៨០០ ក្បាលរួមមានខ្លាឃ្មុំ អូទ្រីស កង់ហ្គោរ៉ូ ក្រពើផ្សោត ក្តាន់ និងសត្វជាច្រើនទៀត។ នៅដំណាក់កាលដំបូងនេះនឹងមានការសម្តែងចំនួន ៤ រួមមានការសម្តែងក្រពើ ការសម្តែងបក្សី ការសម្តែងស្វា និងការសម្តែងខ្លា។ លើសពីនេះទៀត ក្នុងសួនសត្វក៏មានកន្លែងកំសាន្ដសម្រាប់កុមារដូចជារថភ្លើងនិងឧបករណ៍លេងដទៃទៀតជាច្រើន។

បើយោងតាមបុគ្គលិករបស់សួនសត្វភ្នំពេញសាហ្វារីបានឱ្យដឹងថាសំបុត្រចូលទស្សនាមានតម្លៃ ១០ដុល្លារសម្រាប់មនុស្សចាស់ និង ៥ដុល្លារសម្រាប់ក្មេង * ។

ក្រៅពីសួនសត្វនេះ ក្រុមហ៊ុន LY.P Group ក៏កំពុងគ្រោងនឹងវិនិយោគទឹកប្រាក់ប្រមាណជាង ៣០ លានដុល្លារអាមេរិកក្នុងការកសាងឧទ្យានទឹកធំបំផុតមួយនៅអាស៊ានដែលមានឈ្មោះថា Angkor Water Park ផងដែរ ។ ប៉ុន្តែព័ត៌មានលម្អិតនៃគម្រោងនេះមិនទាន់បានបង្ហាញជាក់លាក់នៅឡើយទេ។

* តម្លៃអាចនឹងផ្លាស់ប្តូរដោយផ្អែកលើគោលនយោបាយរបស់សួនសត្វ Phnom Penh Safari

• គម្រោងអភិវឌ្ឍន៍
• គម្រោងអភិវឌ្ឍន៍