សេដ្ឋីចិននិងលោកលី សុខឆាយបានអនុម័តថវិកា២០០លានដុល្លារ សហការលើគម្រោងព្រលានភ្នំពេញថ្មី

31 ខែសីហា 2021
Uncategorized
12 មើល

ក្រុមហ៊ុនមហាសេដ្ឋីពីប្រទេសចិន និងក្រុមហ៊ុនក្នុងស្រុក LSCG កាលពីថ្មីៗនេះ រួមគ្នាអនុម័តថវិកា ២០០ លានដុល្លារ សម្រាប់សហការវិនិយោគជាមួយអ្នកឧកញ្ញា ពុង ឃាវសែ លើគម្រោងព្រលានយន្តហោះភ្នំពេញថ្មី។

បើយោងតាមអគ្គនាយកក្រុមហ៊ុន LSCG លោកលី សុខឆាយ ដែលជាតំណាងចរចាលើកិច្ចសហការនេះ ក្រុមហ៊ុនចិន និងក្រុមហ៊ុនរបស់លោក បានត្រៀមខ្លួនរួចរាល់ ទាំងថវិកា បច្ចេកទេស និងធនធានមនុស្ស សម្រាប់រួមអនុវត្តគម្រោងព្រលានថ្មីនេះ ដោយបច្ចុប្បន្ន គឺនៅរង់ចាំតែការអនុម័តចុងក្រោយពីអ្នកឧកញ្ញា ពុង ឃាវសែ ប៉ុណ្ណោះ។

លោក លី សុខឆាយ បានប្រាប់ទស្សនាវដ្តីសំណង់ និងអចលនទ្រព្យ កាលពីថ្ងៃទី ២៩ សីហា ថា៖ «ក្រុមហ៊ុនមហាសេដ្ឋីចិន និងក្រុមហ៊ុនLSCG បានចរចាជាមួយនឹងOCIC និងអ្នកឧកញ្ញា ពុង ឃាវសែ ជាច្រើនលើកមកហើយ មុននឹងឈានដល់ដំណាក់កាលត្រៀមថវិកា ២០០លានដុល្លារ ពីទីក្រុងប៉េកាំងដោយផ្ទាល់នេះ»។

«លើសពីនេះ ក្រុមហ៊ុនក៏បានសិក្សាលើផែនការមេនៃគម្រោង លទ្ធភាពនៃការវិនិយោគ ការងារបច្ចេកទេសដែលក្រុមហ៊ុនអាចរួមសហការបាន ក៏ដូចជាហានិភ័យដែលអាចនឹងកើតមាន រួចរាល់ជាស្រេចអស់ហើយ។ គ្រប់យ៉ាងក៏ត្រូវបានដាក់បញ្ជូនទៅខាងក្រុមហ៊ុនព្រលានយន្តហោះថ្មី និង OCIC រួចរាល់» លោកបានបន្ត។

យ៉ាងណាក្ដី លោក លី សុខឆាយ នៅមិនទាន់បញ្ជាក់នៅឡើយទេថា ទុនវិនិយោគ ២០០លានដុល្លារ នឹងត្រូវយកទៅប្រើប្រាស់លើផ្នែកណា ឬយកទៅធ្វើការងារអ្វីនៃគម្រោងព្រលានថ្មីនេះ ដោយរង់ចាំការអនុម័តចុងក្រោយពី អ្នកឧកញ្ញា ពុង ឃាវសែ សិន។

គួរបញ្ជាក់ផងដែរ ក្រុមហ៊ុន LSCG កន្លងមក ក៏បានដេញថ្លៃឈ្នះដើម្បីធ្វើការងារមួយចំនួនក្នុងគម្រោងរបស់ OCIC ដូចជាគម្រោងព្រលានយន្តហោះភ្នំពេញថ្មី គម្រោងបឹង៥០០ និងគម្រោងផ្សេងៗទៀតផងដែរ។ (អានបន្ថែម)