អគារកប់ពពក ៦២ជាន់ របស់អ្នកឧកញ៉ា គិត ម៉េង បើកការដ្ឋានសាងសង់ជាផ្លូវការហើយ

• Me Wathana
• 14 ខែ​កុម្ភៈ 2019
• Uncategorized
• 272 មើល

ក្រុមហ៊ុនរ៉ូយ៉ាល់ខេមបូឌាខូអិលធីឌីនៃក្រុមហ៊ុនរ៉ូយ៉ាល់គ្រុប កាលព្រឹកថ្ងៃទី ១៤ ខែកុម្ភៈ បានបើកការដ្ឋានសាងសង់ គម្រោងអគារភ្លោះកណ្ដាលក្រុងកម្ពស់ ៦២ ជាន់ The Royal One ជាផ្លូវការហើយ ។

គម្រោង The Royal One នេះមានទីតាំងស្ថិតនៅចំកណ្តាលទីក្រុង កែងមហាវិថីព្រះមុន្នីវង្សនិងមហាវិថីសហព័ន្ធរុស្ស៊ី នៅជិតផ្សារធំថ្មី និងអគារកាណាឌីយ៉ា។ អគារភ្លោះនេះមានកម្ពស់ ២៣០ ម៉ែត្រ ឬស្មើទៅនឹង ៦២ ជាន់ ព្រមទាំងចំណតរថយន្តក្រោមដី ៦ ជាន់ទៀត ហើយសាងសង់លើផ្ទៃដីជាង ៤០០០ ម៉ែត្រការ៉េ ។ ក្រោយការសាងសង់រួច គម្រោងនេះ នឹងមានជាអគារពាណិជ្ជកម្ម អគារខុនដូ ផ្សារទំនើប ក្លឹបហាត់ប្រាណ ភោជនីយដ្ឋាន និងមជ្ឈមណ្ឌលកំសាន្តផ្សេងៗជាច្រើនទៀត។

យោងតាមប្រសាសន៍របស់ ឧកញ៉ា គិត ធាង ប្រធានក្រុមហ៊ុនរ៉ូយ៉ាល់វ័នបានឱ្យដឹងថា ក្រុមហ៊ុនបានបណ្តាក់ទុនប្រមាណជា ២៣០ លានដុល្លារអាមេរិកលើគម្រោងដ៏ធំមួយនេះ ហើយគ្រោងនឹងប្រើរយៈពេលប្រមាណជា ៥ឆ្នាំក្នុងការសាងសង់។

លោកបានបន្ថែមទៀតថា បន្ទាប់ពីបញ្ចប់ការសាងសង់ គម្រោងដ៏ប្រណិតមួយនេះនឹងក្លាយជាផ្នែកមួយនៃមោទនភាពជាតិរបស់ប្រទេសកម្ពុជា ដែលឆ្លុះបញ្ចាំងពីសមត្ថភាពនិងវិបុលភាពរបស់ប្រទេស។