អចលនទ្រព្យក្នុងខណ្ឌសែនសុខទាក់ទាញអ្នកទិញខ្លាំងជាងខណ្ឌដទៃទៀត

• 3 ខែ​តុលា 2018
• ព័ត៌មានអចលនទ្រព្យ
• 8 មើល

អ្នកទិញអចលនទ្រព្យនៅកម្ពុជាកំពុងមាននិន្នាការទៅរកការទិញអចលនទ្រព្យនៅខណ្ឌសែនសុខស្របពេលដែលតំបន់នេះកំពុងមានសកម្មភាពអភិវឌ្ឍយ៉ាងសន្ធឹកសន្ធាប់ នេះបើយោងតាមការបញ្ជាក់ពីអ្នកជំនាញក្នុងវិស័យអចលនទ្រព្យ។

អ្នកឯកទេសផ្នែកអចលនទ្រព្យនិងជានាយកប្រតិបត្តិនៃក្រុមហ៊ុនអចលនទ្រព្យធំមួយនៅកម្ពុជា Key Real Estate Co.Ltd លោក សន សៀប បានប្រាប់ទស្សនាវដ្តីសំណង់និងអចលនទ្រព្យ យើងខ្ញុំកាលពីថ្ងៃទី ០៣ ខែ តុលា ឆ្នាំ ២០១៨ ថាអចលនទ្រព្យនៅខណ្ឌសែនសុខនាពេលបច្ចុប្បន្នកំពុងទាក់ទាញអ្នកទិញខ្លាំងហើយតំបន់នេះនឹងនៅតែមានសក្តានុពលក្នុងរយៈកាលយូរអង្វែងតទៅទៀត។

ការលើកឡើងរបស់លោកគឺស្របពេលដែលក្រុមហ៊ុនអចលនទ្រព្យក្នុងស្រុកមួយបានបង្ហាញពីលទ្ធផលនៃការស្ទង់មតិស្តីអំពីអចលនទ្រព្យនៅកម្ពុជាដោយបានបង្ហាញថាក្នុងចំណោមអ្នកឆ្លើយសំណួរទាំងអស់គឺមាន១៤ភាគរយដែលបាននិយាយថាខ្លួនចាប់អារម្មណ៍ទិញអចលនទ្រព្យនៅខណ្ឌសែនសុខ។ នេះគឺជាអត្រាខ្ពស់ជាងគេបើធៀបទៅនឹងខណ្ឌដទៃទៀតក្នុងរាជធានីភ្នំពេញ។

លោក សន សៀបបានបន្តទៀតថា៖ « ខ្ញុំគិតថាលទ្ធផលនៃការស្ទង់មតិមួយនេះគួរតែត្រូវព្រោះតម្រូវការទីផ្សារក្នុងខណ្ឌសែនសុខជាក់ស្តែងកំពុងកើនឡើងខ្លាំង»។

តាមការពន្យល់របស់លោក មូលហេតុមួយចំនួនដែលបណ្តាលឲ្យអចលនទ្រព្យក្នុងខណ្ឌសែនសុខមានតម្រូវការខ្ពស់គឺដោយសារវត្តមាននៃគម្រោងអភិវឌ្ឍន៍លំនៅដ្ឋានធំៗ ផ្សារទំនើបធំៗ និងគម្រោងអភិវឌ្ឍន៍ជាច្រើនទៀតដែលបានរំលេចខ្លួនជាបន្តបន្ទាប់។

ទន្ទឹមនឹងនេះដែរ យោងតាមទិនន្ន័យនៃការវាយតម្លៃដីធ្លីដែលបានចងក្រងដោយក្រុមហ៊ុន Key Real Estate ក្នុងខែមិថុនា ឆ្នាំ ២០១៨ តម្លៃដីជាមធ្យមក្នុងខណ្ឌសែនសុខគឺមានតម្លៃចន្លោះពី ៥០០ ទៅ ១៥០០ ដុល្លារអាមេរិកក្នុងមួយម៉ែត្រការ៉េ។

សូមបញ្ជាក់ផងដែរថា លោក សន សៀប មានជំនឿថាខណ្ឌសែនសុខនឹងបន្តមានសក្តានុពលរយៈពេលយូរអង្វែងទៅទៀតដោយសារតំបន់នេះមានហេដ្ឋារចនាសម្ព័ន្ធល្អងាយស្រួលក្នុងការអភិវឌ្ឍន៍។

• អត្ថបទវិភាគ
• ធុរកិច្ច និងទីផ្សារ
• អត្ថបទវិភាគ
• ធុរកិច្ច និងទីផ្សារ