អាយអឹមអែហ្វ៖ កំណើនផលិតផលក្នុងស្រុក (GDP)កម្ពុជានឹងធ្លាក់ចុះត្រឹមដក១,៥% ឆ្នាំ២០២០

• Sommana Yan
• 20 ខែ​មេសា 2020
• Uncategorized @km
• 171 មើល

កំណើនផលិតផលក្នុងស្រុកសរុប(GDP)របស់កម្ពុជា នឹងធ្លាក់ចុះដល់កម្រិត -១,៥% ដោយសារតែការធ្លាក់ចុះយ៉ាងគំហុកនៃភ្ញៀវទេសចរបរទេស និងវិស័យឧស្សាហកម្មកាត់ដេរដែលបណ្ដាលមកពីវិបត្តិកូវីដ១៩។

នេះបើយោងទៅតាមកិច្ចសម្ភាសន៍សារព័ត៌មានស្ដីអំពីរបាយការណ៍សង្ខេបរបស់នាយកដ្ឋានអាស៊ីនិងប៉ាស៊ីហ្វិក ជាមួយលោក ឆាងយ៉ុង រី(Changyong Rhee) ប្រធាននាយកដ្ឋានអាស៊ីប៉ាស៊ីហ្វិករបស់មូលនិធិរូបិយវត្ថុអន្ដរជាតិឬអាយអឹមអែហ្វ (IMF) កាលពីថ្ងៃទី១៥ ខែមេសា ឆ្នាំ២០២០កន្លងទៅនេះ។

លោកមានប្រសាសន៍ថា៖ «ចំពោះកម្ពុជា ឡាវ មីយ៉ាន់ម៉ា និង វៀតណាម ដែលសេដ្ឋកិច្ចភាគច្រើនពឹងផ្អែកលើការនាំចេញ និងវិស័យទេសចរណ៍ នឹងត្រូវធា្លក់ចុះយ៉ាងគំហុកទោះបីជាការរាតត្បាតនៃជំងឺកូវីដ១៩ស្ថិតក្នុងដំណាក់កាលដំបូងក៏ដោយ។ ចំពោះប្រទេសកម្ពុជា ខ្ញុំបានលឺថាវិស័យទេសចរណ៍ធ្លាក់ចុះទៅដល់ ៦០% និងវិស័យឧស្សាហកម្មកាត់ដេរក៏មានការធា្លក់ចុះយ៉ាងគំហុកដែរ។»

លោកបានបន្តថា៖ «យើងបានគណនាឡើងវិញហើយសម្រេចទម្លាក់កំណើនផលិតផលក្នុងស្រុកសរុបមកដល់កម្រិត-១,៥%។ ការដាំក្បាលចុះដល់ទៅដក១,៥ភាគរយ ឃើញតួលេខនេះ អ្នកអាចនឹងលាន់មាត់ថា ចុម…!ក៏ប៉ុន្តែសូមរម្លឹកថានៅមុនពេលវិបត្តិមេរោគនេះកើតឡើង យើងបានរំពឹងថា អត្រាផលិតផលក្នុងស្រុកនៃប្រទេសនេះគឺ៧%។ ក៏ប៉ុន្តែ ផលិតផលក្នុងស្រុកដែលធ្លាក់ចុះជាក់ស្តែង គឺជាង ៨,៥ ភាគរយបើប្រៀបធៀបទៅនឹងការព្យាករមុនពេលមានវិបត្តិ។ ដូច្នេះសេដ្ឋកិច្ចក្នុងប្រទេសនេះនឹងជួបការលំបាកខ្លាំងណាស់។»

សូមរម្លឹកផងដែរថា មុនតួលេខចេញដោយអាយអឹមអែហ្វនេះបន្តិច ធនាគារពិភពលោក ក៏ធ្លាប់បានព្យាករថាកំណើនសេដ្ឋកិច្ចកម្ពុជានឹងធ្លាក់ចុះមកនៅត្រឹមប្រមាណ២,៥% ដោយសារការរីករាលដាលនៃកូវីដ ១៩ ដែលធ្វើឲ្យប៉ះពាល់ដល់ក្បាលម៉ាស៊ីនអភិវឌ្ឍន៍សំខាន់ៗនៅកម្ពុជារួមមានវិស័យទេសចរណ៍ និងសំណង់នៅក្នុងត្រីមាសទីមួយក្នុងឆ្នាំ២០២០ នេះផងដែរ។ នេះបើយោងតាមរបាយការណ៍របស់ធនាគារពិភពលោក ស្ដីអំពីការធ្វើបច្ចុប្បន្នភាពសេដ្ឋកិច្ចប្រចាំខែមេសាឆ្នាំ ២០២០ សម្រាប់អាស៊ីបូព៌ា និងប៉ាស៊ីហ្វិកក្នុងកំឡុងពេលរីករាលដាលនៃជំងឺកូវីដ ១៩៕ (អានបន្ថែម)