អ្នកជំនាញ៖ កំពតនិងកែបនឹងក្លាយជាគោលដៅសក្តានុពលទីផ្សារអចលទ្រព្យនាពេលអនាគត

• 8 ខែ​ឧសភា 2018
• ព័ត៌មានអចលនទ្រព្យ
• 8 មើល

ខេត្តកំពត និងខេត្តកែបត្រូវបានគេរំពឹងថានឹងក្លាយជាគោលដៅនៃការរីកចម្រើនផ្នែកអចលនទ្រព្យនាពេលបន្ទាប់ក្នុងប្រទេសកម្ពុជា ក្នុងរយៈពេល១០ឆ្នាំខាងមុខ បន្ទាប់ពីទីក្រុងធំៗទាំង៣ គឺ រាជធានីភ្នំពេញ ក្រុងសៀមរាប និងក្រុងព្រះសីហនុ។

លោក សន ស៊ាប ស្ថាបនិក និងជានាយកក្រុមហ៊ុន Key Real Estate Co., Ltd និងជាអតីតអនុប្រធានសមាគមអ្នកវាយតម្លៃ និងភ្នាក់ងារអចលនទ្រព្យកម្ពុជា (CVEA) មើលឃើញពីសក្តានុពលដ៏ខ្លាំងនៅខេត្តកំពតនិងខេត្តកែប ថែមទាំងរំពឹងថាតំបន់ទាំងនេះនឹងរីកចម្រើនឆ្លើយតបនិងទីផ្សារទេសចរណ៍។

លោក សន ស៊ាប បានលើកឡើងថា «ខេត្តទាំងពីរនេះទំនងជានឹងទាក់ទាញអ្នកអភិវឌ្ឍន៍ និងវិនិយោគិនជាច្រើននៅប៉ុន្មានឆ្នាំខាងមុខនេះ។ ហេតុផលគឺថាតម្លៃដីនាពេលនេះនៅតែមានតម្លៃសមរម្យដែលជាការល្អសម្រាប់អ្នកអភិវឌ្ឍន៍ធ្វើការវិនិយោគ។»

លោកបានបន្ថែមថា «ហេតុផលមួយទៀតគឺថា ខេត្តទាំងពីរទាក់ទាញភ្ញៀវទេសចរណ៍កម្ពុជាជាច្រើនជាពិសេសភ្ញៀវមកពីរាជធានីភ្នំពេញ។ នៅពេលមនុស្សកាន់តែច្រើនមកទស្សនា នោះតម្រូវការកន្លែងស្នាក់ ហូបចុក និងកន្លែងផ្សេងៗទៀតក៏នឹងកើនឡើងផងដែរ។»

តាមលោក សន ស៊ាប ខេត្តទាំងពីរមានទីតាំងល្អនៅជិតឆ្នេរសមុទ្ររួមទាំងភ្នំនិងកន្លែងមើលទេសភាពប្រកបដោយភាពទាក់ទាញផ្សេងៗទៀត។ វាជាទីតាំងដ៏ល្អសម្រាប់អចលនទ្រព្យដូចជា សណ្ឋាគារ ខុនដូ អាផាតមិន និងកន្លែងផ្សេងៗទៀត។ ខេត្តទាំងពីរអាចក្លាយជា “ក្រុងព្រះសីហនុទី ២” នាពេលអនាគត។

ការអភិវឌ្ឍក្នុងតំបន់នេះមិនត្រឹមតែផ្តល់ផលប្រយោជន៍ដល់អ្នកអភិវឌ្ឍន៍ប៉ុណ្ណោះទេ ថែមទាំងប្រជាជនដែលរស់នៅក្នុងខេត្តផងដែរ ម្យ៉ាងទៀតវាក៏ជួយកាត់បន្ថយភាពអ៊ូអរខ្លាំងនៅតំបន់ទេសចរណ៍ធំៗនាពេលបច្ចុប្បន្ន។

• ធុរកិច្ច និងទីផ្សារ
• ធុរកិច្ច និងទីផ្សារ