ឯកឧត្តម ស៊ុន ចាន់ថុល៖ កុំសួរថាកម្ពុជាបានធ្វើអ្វីឲ្យយើង ត្រូវសួរថាយើងបានធ្វើអ្វីហើយឲ្យកម្ពុជា

Proeksa Meas
10 ខែមិថុនា 2020
Uncategorized @km
223 មើល

ឯកឧត្តម ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានមានប្រសាសន៍នៅក្នុងដំណើរចុះត្រួតពិនិត្យគុណភាព និងលក្ខណៈបច្ចេកទេសនៃការសាងសង់កំណាត់ផ្លូវជាតិលេខ៧ កាលពីថ្ងៃទី ១០ មិថុនា ២០២០ ថា៖ «កុំសួរថាកម្ពុជាបានធ្វើអ្វីឲ្យយើង ត្រូវសួរថាយើងបានធ្វើអ្វីហើយឲ្យកម្ពុជា។»

ក្នុងន័យនេះ ឯកឧត្តម បានជំរុញដល់ប្រជាពលរដ្ឋទាំងអស់ឲ្យអប់រំខ្លួនឯងជាពលរដ្ឋល្អ ហើយត្រូវចូលរួមគោរពច្បាប់ចរាចរណ៍ និងថែរក្សារគុណភាពផ្លូវឲ្យបានគង់វង្ស។

ឯកឧត្តមបានថ្លែងថា៖ «ក្នុងឱកាសនេះដែរ ខ្ញុំសូមណែនាំទៅកាន់ក្រុមហ៊ុនដឹកទំនិញ ចូលរួមគោរពច្បាប់ចរាចរណ៍។ កុំដឹកហួសទម្ងន់កំណត់ដោយច្បាប់ វាខូចផ្លូវយើង វាឆាប់ខូច។»

ក្នុងប្រសាសន៍ជំរុញឱ្យប្រជាពលរដ្ឋចូលរួមកសាង និងថែរក្សាសមិទ្ធផលជាតិ ដូចជាស្ពាន សាលារៀន មន្ទីរពេទ្យវត្តអារាម ឯកឧត្តមបានបន្តថា៖ «ខ្ញុំតែងតែទុកពាក្យស្លោកឲ្យបងប្អូនយើងពិចារណា ពាក្យស្លោកហ្នឹងខ្ញុំរៀនសូត្រពីគេទេ គេនិយាយថា កុំសួរថាប្រទេសយើងធ្វើអ្វីឲ្យយើង ត្រូវសួរថាយើងធ្វើអ្វីឲ្យប្រទេសយើង។»

«…គោរពច្បាប់ កុំប្រើគ្រឿញៀន…កុំប្រើគ្រឿងស្រវឹងហើយបើកបរឡាន កុំបើកឡានហើយបោះសំរាមចោល អាហ្នឹងជួយកម្ពុជាហើយ…។ …អញ្ចឹងកុំសួរកម្ពុជាថាកម្ពុជាបានធ្វើអ្វីឲ្យយើង ត្រូវសួរថាយើងនៀកជាពលរដ្ឋ បានធ្វើអ្វីឲ្យកម្ពុជា? ហើយចម្លើយ មហាស្រួល អប់រំខ្លួនឯងជាពលរដ្ឋល្អទៅ អាហ្នឹងហើយគឺយើងជួយកម្ពុជាយើង។»

ជាមួយគ្នានេះដែរ ឯកឧត្តមក៏បានលើកឡើងពីវឌ្ឍនភាពនៃការសាងសង់កំណាត់ផ្លូវជាតិលេខ៧ (ក្រចេះ-ត្បូងឃ្មុំ) ដែលជាគម្រោងគ្រប់គ្រងទ្រព្យសម្បត្តិផ្លូវទី២ (Road Asset Management) មកដែលដល់បច្ចុប្បន្ននេះ ត្រូវបានសាងសង់រួចរាល់ប្រមាណ ៨០% ហើយ។

កំណាត់ផ្លូវនេះ មានប្រវែងសរុប ១៦៤ គីឡូម៉ែត្រ ដោយលើកកម្ពស់គុណភាពផ្លូវពី DBST ទៅជា AC និងត្រូវបានបែងចែកជាបីការដ្ឋានធំៗ រយៈពេលសាងសង់ចំនួន ១៨ ខែ និងរយៈពេលថែទាំចំនួន ៣៦ ខែសាងសង់ដោយក្រុមហ៊ុនចិន ចំណាយថវិកាសរុបប្រមាណជាង ៣៦ លានដុល្លារអាមេរិក។

បន្ថែមពីនេះទៅទៀត ឯកឧត្តមក៏បានចុះពិនិត្យមើលផ្លូវលេខ ៧៦ ខេត្តមណ្ឌលគិរី ផ្លូវពីស្ទឹងត្រែងមកក្រចេះផងដែរ។ ចំពោះគម្រោងសាងសង់ផ្លូវពីក្រចេះទៅទល់ដែនប្រទេសឡាវ (ត្រពាំងក្រៀល) ឯកឧត្ដមទេសរដ្ឋមន្ត្រីបានមានប្រសាសន៍ថា ត្រូវបានសិក្សារួចរាល់ហើយ និងកំពុងតែរង់ចាំភាគីចិនសម្រេចតែប៉ុណ្ណោះ៕

- Video Advertisement -