១០ ក្រុមហ៊ុនដែលឈ្នះពានរង្វាន់បច្ចេកវិទ្យាសំណង់ដែលមានភាពច្នៃប្រឌិតបំផុត

• ២០ សីហា ២០១៩
• ព័ត៌មានសំណង់
• 1631 មើល

នៅក្នុងការប្រកួតប្រជែងការបច្ចេកវិទ្យាសំណង់សម្រាប់ឆ្នាំ២០១៨ ដែលបានប្រព្រឹត្តិឡើងកាលពេលថ្មីៗនេះ  មានក្រុមហ៊ុនចំនួន​ ១០  មកពីជុំវិញពិភពលោក​ បានឈ្នះពានរង្វាន់សម្រាប់ការច្នៃប្រឌិតបច្ចេកវិទ្យាដែលមានឥទ្ធិពលបំផុតនៅក្នុងឧស្សាហកម្មសំណង់។

កម្មវិធីប្រកួតប្រជែងនេះ  ត្រូវបានរៀបចំឡើងដោយក្រុមហ៊ុនសំភារៈសំណង់ឈានមុខគេមួយនៅម៉ិចស៊ីកូឈ្មោះថា CEMEX Ventures កាលពីថ្ងៃទី ៨​ ខែកក្កដា កន្លងមកនេះ ដោយមានការចូលរួមពីក្រុមហ៊ុន និង គណកម្មការជំនាញក្នុងវិស័យសំណង់ ជាច្រើនរូប មកពីបណ្ដាប្រទេសជាច្រើនជុំវិញពិភពលោក។

ព្រឹត្តិការណ៍រយៈពេល ៣ ថ្ងៃនេះត្រូវបានធ្វើឡើងក្នុងគោលបំណងស្វែងរកដំណោះស្រាយដែលមានប្រសិទ្ធភាពបំផុតក្នុងឧស្សាហកម្មសំណង់នាពេលបច្ចុប្បន្ន ដោយបើកឱកាសក្រុមហ៊ុនទើបតែបើកថ្មី បានបញ្ចេញសមត្ថភាពនិងភាពច្នៃប្រឌិតរបស់ខ្លួន។

ជាមួយគ្នានេះដែរ ព្រឹត្តិការណ៍នេះក៏ត្រូវបានធ្វើឡើងដើម្បីឆ្លើយតបទៅនឹងនិន្នាការនិងតំរូវការបច្ចេកវិទ្យាសំណង់ ដែលកំពុងកើនឡើងជាបន្តបន្ទាប់។ បើយោងតាមការឲ្យដឹងពីក្រុមហ៊ុន CREtech  ទុនវិនិយោគលើវិស័យបច្ចេកវិទ្យាសំណង់របស់ក្រុមឯកជន  បានកើនឡើងយ៉ាងគំហុក គឺចាប់ពី ៣៥២ លានដុល្លារក្នុងឆ្នាំ ២០១៦ ដល់ជាង ៦ ពាន់លានដុល្លារនៅឆ្នាំ ២០១៨ ។

ប្រភពដដែលនេះក៏បានបន្ថែមទៀតថាបច្ចេកវិទ្យាដែលពេញនិយមនិងមានប្រយោជន៍បំផុតនាពេលបច្ចុប្បន្នរួមមាន Artificial Intelligence, Digital Twins ក៏ដូចជា  3D printing ជាដើម។

ដោយឡែក ចំពោះអ្នកឈ្នះក្នុងកម្មវិធីការប្រកួតប្រជែងរបស់ CEMEX Ventures នៅឆ្នាំនេះ គឺផ្តល់ជូនលើសពីអ្វីដែលរំពឹងទុក ដោយក្រុមទាំងនោះរួមមាន៖

360 Smart Connect
ក្រុមហ៊ុនបារាំងមួយនេះ បានបង្កើតប្រព័ន្ធតាមដាននិងបំលែងកូដ ពោលគឺការដាក់បញ្ចូល Communication Chip ទៅក្នុងជញ្ជាំងបេតុង។ បច្ចេកវិទ្យានេះ អាចជួយប្រមូលទិន្នន័យ ដូចជាឯកសារត្រួតពិនិត្យគុណភាពសំណង់ ក៏ដូចជាព័ត៌មានការប្រតិបត្តិការផ្សេងៗទៀត ក្នុងការដ្ឋានសំណង់។

Arqlite
ក្រុមហ៊ុនមួយនេះមានមូលដ្ឋាននៅប្រទេសអាហ្សង់ទីន ហើយបានបង្កើតក្រួសសិប្បនិម្មិតពីផ្លាស្ទិចកែច្នៃ។ ចំនុចពិសេសរបស់ក្រួសនេះ គឺវាមានតម្លៃថោក  មានទំងន់ស្រាលជាងក្រួសធម្មតា ៣​ ដង ហើយមានអ៊ីសូឡង់ថាមពលច្រើនជាងក្រួសធម្មតា​ដល់ទៅ ១០ដង។

BuildStream
ក្រុមហ៊ុនសហរដ្ឋអាមេរិកមួយនេះ បានបង្កើតកម្មវិធី (Software) ដើម្បីជួយសម្រួលដល់ការគ្រប់គ្រងបែបបន្ដផ្ទាល់ (Real-time management) នៃឧបករណ៍ធុនធ្ងន់ និងភ័ស្តុភារក្នុងគម្រោងសាងសង់។

BldBox
ក្រុមហ៊ុននេះផលិតកម្មវិធី (Software) វិភាគនិងព្យាករណ៍ ដែលអាចកត់ត្រាទិន្នន័យគម្រោងដែលធ្លាប់ធ្វើរូចកន្លងមក ហើយម្ចាស់គម្រោងអាចប្រើទិន្នន័យនេះ ដើម្បីធ្វើការប៉ាន់ស្មានតម្លៃនិងភាពលម្អិតនៃគម្រោងសាងសង់ថ្មីឲ្យបានត្រឹមត្រូវជាងមុន។

Matrak
ក្រុមហ៊ុនអូស្រ្តាលីមួយនេះបាន បង្កើតខ្សែសង្វាក់ផ្គត់ផ្គង់បែបឌីជីថល ដែលជួយឱ្យអ្នកប្រើប្រាស់អាចតាមដាននិងចែករំលែកទិន្នន័យបែបបន្ដផ្ទាល់ (Real-time data) នៅគ្រប់ដំណាក់កាលនៃការសាងសង់ទាំងអស់។

Morta
ក្រុមហ៊ុនសហរដ្ឋអាមេរិកមួយនេះ បានបង្កើតម៉ាស៉ីនត្រួតពិនិត្យលេខកូដដោយស្វ័យប្រវត្តិដើម្បីធានាថាការរចនាអគារ គឺស្របទៅនឹងច្បាប់និងបទប្បញ្ញត្របរបស់រដ្ឋាភិបាល។

PlanRadar
ក្រុមហ៊ុនអូទ្រីសមួយនេះ បានបង្កើតកម្មវិធី (Software) គ្រប់គ្រងសំណង់ថ្មីមួយ ដែលជួយសម្រួលដល់ឯកសារគម្រោងនិងការទំនាក់ទំនងអន្តរក្រុម។

Rebartek
ក្រុមហ៊ុនន័រវែសមួយនេះ បានបង្កើតប្រព័ន្ធម៉ូឌែល 3D ដែលអាចសម្ភារសំណង់ផ្សេងៗ ដោយស្វ័យប្រវត្តិ តាមរយៈការប្រើមនុស្សយន្ត។

Thunderbolt Pipeline
ក្រុមហ៊ុនអាមេរិចមួយនេះ បានប្រើប្រាស់បច្ចេកវិទ្យា AI និង Machine Learning ក្នុងបង្កើតកម្មវិធី (Software) វៃឆ្លាតមួយ ដើម្បីកាត់បន្ថយហានិភ័យក្នុងគម្រោង។ កម្មវិធីនេះក៏អាចជួយឲ្យម្ចាស់គម្រោងធ្វើការដោយមានប្រសិទ្ធភាពជាងមុន តាមរយៈការពង្រឹងផែនការកម្លាំងពលកម្ម និងតាមដានការដេញថ្លៃ។

Vero Solutions
ក្រុមហ៊ុនកាណាដាមួយនេះ បានបង្កើតប្រព័ន្ធរចនាសម្រាប់ដែកថែបនិងស៊ីម៉ងត៍។

ថ្លែងក្នុងកម្មវិធីប្រគល់រង្វាន់ ក្រុមហ៊ុនទាំង ១០ នេះ បានសន្យាថានឹងបន្តអភិវឌ្ឍបច្ចេកវិទ្យាទាំងនេះ ក្នុងគោលបំណងដើម្បីរួមចំណែកធ្វើឲ្យវិស័យសំណង់ជុំវិញពិភពលោកប្រសិទ្ធភាពនិងនិរន្តរភាពជាមុន ។