បច្ចេកវិទ្យាថ្មីកំពុងផ្លាស់ប្តូរឧស្សាហកម្មក្នុងវិស័យសំណង់ ស្ថាបត្យកម្ម និងវិស្វកម្មសាកល

• ២០ កុម្ភៈ ២០២៣
• ព័ត៌មានសំណង់
• 1439 មើល

ដោយ Brenden Roche, Product Expert, Facilities Engineering, Bentley Systems

ឧស្សាហកម្មក្នុងសេវាកម្មវិស័យ ស្ថាបត្យកម្ម វិស្វកម្ម និងសំណង់ (Architect, Engineering and Construction – AEC) មិនមែនជារឿងចម្លែកក្នុងការផ្លាស់ប្តូរ និងមាននិន្នាការវិវត្តន៍នោះទេ។ គួរកត់សម្គាល់ថា ជំងឺរាតត្បាតសកលបានបង្ខំឱ្យឧស្សាហកម្មជាច្រើនទៀតផ្លាស់ប្តូរទិសដៅ ហើយ AEC ក៏ដូចគ្នាផងដែរ។ អ្នកផ្តល់សេវាក្នុងវិស័យនេះកំពុងផ្លាស់ប្តូរអាជីវកម្មរបស់ពួកគេដើម្បីការឆ្លើយតប មិនត្រឹមតែជំងឺរាតត្បាតប៉ុណ្ណោះទេ ប៉ុន្តែវាក៏ជាភាពអាសន្នចំពោះបម្រែបម្រួលអាកាសធាតុផងដែរ។ និន្នាការនេះ បាន​ជំរុញ​ឱ្យមានការ​ផ្លាស់​ប្តូរ​មួយ​ចំនួនដើម្បីធ្វើ​ឱ្យ​ខ្លួន​គេ​ក្លាយ​ជាអ្នកប្រកួតប្រជែង​ដ៏​លេចធ្លោ​មួយក្នុង​ឧស្សាហកម្ម AEC នេះ។

ជាមួយទស្សនៈវិស័យនេះ សូមក្រឡេកមើលពីនិន្នាការឧស្សាហកម្ម AEC ដែលអ្នកជំនាញបានរំពឹងទុកចំពោះថ្ងៃអនាគត ដូចខាងក្រោម៖

ទស្សនៈឆ្ពោះទៅរកសំណង់ដែលគ្មានកាបូន

សព្វថ្ងៃនេះ ប្រហែល 56% នៃចំនួនប្រជាជនក្នុងពិភពលោក – 4.4 ពាន់លាននាក់ – រស់នៅក្នុងទីក្រុង។ និន្នាការនេះត្រូវបានគេរំពឹងថា នឹងបន្តដោយចំនួនប្រជាជននៅទីក្រុងនឹងកើនឡើងទ្វេដងនៃចំនួនបច្ចុប្បន្ន នៅឆ្នាំ 2050។ ការកើនឡើងនៃចំនួនប្រជាជននៅក្នុងទីក្រុងទាមទារឱ្យយើងអភិវឌ្ឍទីក្រុងថ្មីយ៉ាងឆាប់រហ័ស ដែលមានន័យថា ការសាងសង់សំណង់ហេដ្ឋារចនាសម្ព័ន្ធថ្មីៗ នឹងប្រឈមការបញ្ចេញកាបូនកាន់តែច្រើនទៅក្នុងបរិយាកាស។ ជាការពិត ការសាងសង់ថ្មីដែលកំពុងបន្តប្រើប្រាស់បរិមាណដ៏ច្រើននៃវត្ថុធាតុដើម ខណៈដែលវាបានរួមចំណែករហូតដល់ 39% នៃការបញ្ចេញកាបូនទៅក្នុងបរិយាកាសជាសាកល។ ដូច្នេះ វិស័យសំណង់បានក្លាយជាអ្នករួមចំណែកយ៉ាងសំខាន់ចំពោះផលប៉ះពាល់បរិស្ថានជាអវិជ្ជមាន ដែលធ្វើឱ្យវាចាំបាច់សម្រាប់អ្នកជំនួញក្នុងឧស្សាហកម្មនេះត្រូវចូលរួមកាត់បន្ថយឥទ្ធិពលអាកាសធាតុជាអវិជ្ជមាន ដោយដំណើរការសំណង់ដែលកាត់បន្ថយឧស្ម័នកាបូនិកជាអតិបរមា។

ការប្រកាសអាសន្នអំពីទិន្នន័យកាបូន

ដែកថែប និងបេតុងដែលប្រើសម្រាប់ការសាងសង់ គឺជាអ្នករួមចំណែកដ៏សំខាន់ក្នុងការបញ្ចេញកាបូនទៅក្នុងបរិយាកាស។ ការគ្រប់គ្រងប្រភពនៃវត្ថុធាតុដើមទាំងនេះឱ្យមានប្រសិទ្ធិភាព វាអាចជួយទប់ស្កាត់កម្រិតនៃការបំភាយឧស្ម័នកាបូន។ ដូច្នេះ ឧស្សាហកម្ម AEC ត្រូវ​ការ​ការចូលរួមពី​អ្នក​ផលិត​សម្ភារៈ​សំណង់ទាំង​នេះ។ សេវាកម្ម និងមូលដ្ឋានទិន្នន័យជាច្រើនបានបរិយាយអំពីបច្ចេកទេសលម្អិតនៃផលិតផលសំណង់ ដែលបានបង្កើតឡើងដើម្បីជួយអ្នកប្រើប្រាស់អាចតាមដានក្រុមហ៊ុនផលិតនីមួយៗ ដូច្នេះក្រុមហ៊ុនសំណង់ហេដ្ឋារចនាសម្ព័ន្ធអាចផ្តល់ព័ត៌មានអំពីជម្រើសអ្នកផ្គត់ផ្គង់ និងសម្ភារៈដែលគេប្រើប្រាស់។ កម្មវិធីបង្កប់ទិន្នន័យគណនាចំនួនកាបូននៅក្នុងការសាងសង់ Embodied Carbon in Construction Calculator (EC3) និង One Click LCA គឺជាកម្មវិធីដែលផ្តល់ទិន្នន័យមូលដ្ឋានឈានមុខគេ ដែលអនុញ្ញាតឱ្យអ្នកប្រើប្រាស់អាចវាយតម្លៃអំពីខ្សែច្រវាក់ផ្គត់ផ្គង់ ដើម្បីគេអាចបញ្ជាក់អំពីបទដ្ឋានបច្ចេកទេសបាន និងការកំណត់ជ្រើសរើសវត្ថុធាតុដើមសំណង់ដែលបញ្ចេញកាបូនទាប។

Bentley iTwin Platform គឺជាមូលដ្ឋានគ្រឹះសម្រាប់បង្កើត និងគ្រប់គ្រងកូនភ្លោះឌីជីថល ដែលត្រូវបានរួមបញ្ចូលជាមួយកម្មវិធី EC3 និង One Click LCA ដែលអនុញ្ញាតឱ្យអ្នកប្រើប្រាស់រាយការណ៍អំពីបរិមាណសម្ភារៈឬវត្ថុធាតុដើមតាមរយៈវេទិកា iTwin ហើយបញ្ចូលទៅក្នុងកម្មវិធី EC3 ឬ One Click LCA ដោយហេតុនេះហើយ វាបានជួយសម្រួលដល់ការវិភាគវដ្តជីវិតយ៉ាងងាយស្រួលនៃគម្រោងសំណង់ហេដ្ឋារចនាសម្ព័ន្ធ។ ក្នុងទម្រង់ Bentley iTwin Platform អនុញ្ញាតឱ្យអ្នកប្រើប្រាស់បញ្ចូលទិន្នន័យវិស្វកម្មដែលបង្កើតឡើងដោយកម្មវិធីផ្សេងៗ។ បន្ទាប់មក គេអាចទាញយកទិន្នន័យសង្ខេបនៃការឌីហ្សាញនោះតាមរយៈការរួមបញ្ចូលគ្នានេះ ដោយអនុញ្ញាតឱ្យគេទទួលបានការយល់ដឹងអំពីផលប៉ះពាល់បរិស្ថាននៃគម្រោងហេដ្ឋារចនាសម្ព័ន្ធរបស់គេនីមួយៗបាន។

ការផ្លាស់ប្តូរសំខាន់ៗក្នុងដំណាក់កាលឌីហ្សាញ

ទន្ទឹមនឹងការជ្រើសរើសសម្ភារៈសំណង់បានសមស្រប ស្ថាបត្យករក៏គួរតែស្វែងរកការអនុវត្តវិធានការត្រង់ៗក្នុងការរចនារបស់ពួកគេ ដើម្បីកាត់បន្ថយកម្រិតកាបូននៃអគារ ឬសំណង់ហេដ្ឋារចនាសម្ព័ន្ធ។ ជាឧទាហរណ៍ ការផលិតគ្រឿងបង្គុំដែលមានចំណតក្រោមដី គឺមិនមានប្រយោជន៍ដូចការបង្កើតកន្លែងចតរថយន្តនៅជាន់ផ្ទាល់ដីនោះទេ ព្រោះបរិមាណកាបូនដែលបញ្ចេញសម្រាប់សាងសង់ចំណតរថយន្តក្រោមដីគឺមានកម្រិតខ្ពស់ខ្លាំង។

ទិសដៅឆ្ពោះទៅរកការឌីហ្សាញសម្រាប់ការផលិត (Dfma)

ការផលិតនៅក្រៅការដ្ឋាន (Offsite Manufacturing – OSM) ដែលជាវិធីសាស្រ្តដ៏មានប្រសិទ្ធភាពក្នុងការបង្កើនផលិតភាពសាងសង់ ក៏អាចជួយពន្លឿនគំនិតផ្តួចផ្តើមកាត់បន្ថយការបំភាយកាបូន decarbonization ផងដែរ ដូចជាការផលិតម៉ូឌុលសំខាន់ៗតែនៅក្នុងរោងចក្រ បន្ទាប់មកយកមកដំឡើងនៅកន្លែងសាងសង់ វាអាចជួយឱ្យមានកាកសំណល់តិច និងអាចគ្រប់គ្រងបរិមាណកាបូនផងដែរ ដែលវិធីសាស្រ្តនេះ វាបានកាត់បន្ថយផលប៉ះពាល់បរិស្ថាននៃការដ្ឋានសំណង់ទាំងមូល ដោយការកាត់បន្ថយចរាចរណ៍ក្នុងទីតាំង ឬការដឹកជញ្ជូនតិចជាមុន។

ការកើនឡើងចំណាប់អារម្មណ៍ក្នុងការប្រើប្រាស់សមាសធាតុស្តង់ដារ

មានការចាប់អារម្មណ៍កាន់តែច្រើនឡើងក្នុងការរៀបចំស្តង់ដារនៃវត្ថុធាតុដើមដែលប្រើប្រាស់ក្នុងការសាងសង់។ អ្នកប្រើប្រាស់ទម្រង់កូដបើកចំហររបស់ Bentley ជាច្រើនបានចាប់ផ្តើមបញ្ចូលស្តង់ដារសមាសធាតុទៅក្នុងកាតាឡុក Bentley ដែលអនុញ្ញាតឱ្យពួកគេទទួលបានទិដ្ឋភាពឌីជីថលនៃសមាសធាតុទាំងនេះ។ វត្ថុស្ដង់ដារទាំងនេះអាចត្រូវបានពិនិត្យ និងអនុម័តសម្រាប់ការអនុលោមតាមសម្ភារៈ និងលទ្ធភាពនៃការសាងសង់។ អ្នកប្រើប្រាស់អាចជ្រើសរើសដោយមានទំនុកចិត្តខ្ពស់ថាគេអាចបំពេញតាមការទាមទារគម្រោង។

ធ្វើឱ្យកាន់តែប្រសើរតាមរយៈទិន្នន័យសំណង់ដែលមានស្រាប់

រាល់ទ្រព្យសម្បត្តិហេដ្ឋារចនាសម្ព័ន្ធដែលបង្កប់ទិន្នន័យស្តីពីកាបូនក្នុងអំឡុងពេលពេលសាងសង់។ បន្ទាប់មកបង្ហាញទិន្នន័យកាបូននៅពេលប្រតិបតិ្តការដែលកើតចេញពីសេដ្ឋកិច្ចប្រចាំថ្ងៃ ដើម្បីសម្របខ្លួននៅពេលដែលអាជីវកម្មមានគោលបំណងបង្កើនផលិតភាព ឬថាមពល ឬផ្លាស់ប្តូរមុខងារខាងក្នុង។

ខណៈពេលកំពុងអនុវត្តការវាយតម្លៃអំពីវដ្តជីវិតកាបូន អ្នកជំនាញអាចពិចារណាពីវិធីសាស្រ្ត cradle-to-gate ឬ cradle-to-grave។ នៅក្នុងការអនុវត្ត cradle-to-grave គេត្រូវពិចារណារហូតដល់ពេលវេលាបញ្ចប់ជីវិតរបស់អគារនៅពេលដែលត្រូវបានកម្ទេច និងការវាស់វែងកាបូននៃសកម្មភាពទាំងនោះ រួមទាំងការកែច្នៃសម្ភារៈផ្សេងៗសម្រាប់ការប្រើប្រាស់ឡើងវិញផងដែរ។ ដោយឡែក នៅក្នុងវិធីសាស្រ្ត cradle-to-gate អ្នកប្រើប្រាស់ត្រូវពិចារណាពីការសម្របខ្លួន ឬការកែប្រែឡើងវិញ។ ករណីនេះវាអាចមានសារៈសំខាន់នៅក្នុងលក្ខខណ្ឌកាបូនបញ្ចេញក្នុងកម្រិតទាម ហើយអាចកើតឡើងច្រើនជាងមួយដងក្នុងអំឡុងពេលពន្យារអាយុកាលសម្ភារៈប្រើប្រាស់ ឬឧបករក្នុងអគារ។ វិធីសាស្រ្តទាំងពីរនេះគឺជាផ្នែកមួយនៃគំនិតរាងជារង្វង់ បន្ទាប់មកអ្នកឌីហ្សាញគួរពិចារណាពីភាពប្រែប្រួល និងភាពបត់បែនក្នុងការរៀបចំផែនការឌីហ្សាញដំបូងរបស់គេ ដើម្បីធ្វើការផ្លាស់ប្តូរច្រកចេញ ដោយចំណាយតិចទាក់ទងនឹងកាបូន ហើយជាលទ្ធផល គេនឹងអាចពិចារណាលើការពន្យារអាយុជីវិតនៃសម្ភារប្រើប្រាស់ក្នុងអគារ និងការវាយកម្ទេចចោលនូវអគារដូចអ្វីដែលធ្លាប់ធ្វើ ថាមួយណាជាជម្រើសត្រឹមត្រូវ?

ការរៀបចំផែនការដំបូងក្នុងដំណាក់កាលឌីហ្សាញ នឹងជួយគ្រប់គ្រងការបំភាយឧស្ម័នកាបូនិចពីអគារបានល្អ។ ជម្រើសប្លង់មួយចំនួនអាចវាយតម្លៃពីការពិចារណាលើការប្រើប្រាស់ថាមពល និងសម្ភារៈបំពាក់សម្រាប់វដ្តជីវិតរបស់វា និងថ្លៃដើមនៃប្រតិបត្តិការ ដែលអនុញ្ញាតឱ្យអ្នកជំនាញទទួលបានជម្រើសបៃតងបំផុតចំពោះបរិស្ថាន។ ចំពោះតម្លៃកាបូនដែលបានបញ្ចូល និងត្រូវយកមកពិចារណា មិនត្រឹមតែក្នុងអំឡុងពេលសាងសង់ដំបូងប៉ុណ្ណោះទេ ប៉ុន្តែវាក៏ត្រូវបានគិតគូក្នុងអំឡុងពេលកែលម្អ និងការសម្របខ្លួនផងដែរ វិធីសាស្រ្តមួយនេះគឺទស្សនៈនៃអគារជាការប្រមូលផ្តុំសម្ភារៈ Buildings as Material Banks គឺជាការរចនាផ្តោតលើការប្រើប្រាស់ឡើងវិញបាន និងជាច្រកឆ្លងកាត់នៃសម្ភារៈសំណង់។ ក្រោយមកទៀតគឺជាព័ត៌មានអំពីការប្រើប្រាស់ឡើងវិញ និងការស្ដារឡើងវិញនូវសម្ភារៈឧបករណ៍ប្រើប្រាស់ក្នុងអគារ ហើយអាចមើលឃើញពីប្រវត្តិប្រើប្រាស់ និងការទាញយកទិន្នន័យសម្ភារៈនិងឧបករណ៍ទាំងនោះប្រកបដោយប្រសិទ្ធភាពក្នុងអំឡុងពេលនៃការសម្របខ្លួន និងការកែលម្អឡើងវិញ។

កម្មវិធី OpenBuildings Energy Simulator—គឺជាកម្មវិធីដែលមានសមត្ថភាពវិភាគថាមពលប្រើប្រាស់ ក្នុងកម្មវិធី OpenBuildings Designer របស់ Bentley ដែលអនុញ្ញាតឱ្យវិស្វករ ឬស្ថាបត្យករ ឬអ្នកឌីហ្សាញ បញ្ចូលការវិភាគពន្លឺ កម្តៅ និងពន្លឺព្រះអាទិត្យទៅក្នុងលំហូរការងាររបស់គេ ក៏ដូចជាផ្តល់សមត្ថភាពឱ្យគេក្នុងការអភិវឌ្ឍន៍ការរចនាអគារប្រកបដោយនិរន្តរភាព។ អ្នកប្រើប្រាស់អាចទស្សន៍ទាយអំពីឥរិយាបទថាមពល និងប្រសិទ្ធភាពប្រេងឥន្ធនៈ ខណៈពេលដែលវាអាចធ្វើការវិភាគអំពីលក្ខណៈសម្បត្តិនៃការបំភាយកម្ដៅនៃសម្ភារៈសំណង់នីមួយៗ ដើម្បីរចនាអគារដែលសន្សំសំចៃថាមពលកាន់តែច្រើន និងប្រើប្រាស់ថាមពលតិចក្នុងអំឡុងពេលប្រតិបត្តិការ។

បច្ចេកវិទ្យាឌីជីថលភ្លោះ ក៏អាចដើរតួនាទីយ៉ាងសំខាន់ក្នុងការជួយកាត់បន្ថយកាបូនិកអគារដែលមានស្រាប់ផងដែរ។ ម្ចាស់ និងអ្នកគ្រប់គ្រង អាចប្រើប្រាស់កម្មវិធី OpenCities 365 ដែលជាដំណោះស្រាយឌីជីថលភ្លោះផ្នែកសំណង់ហេដ្ឋារចនាសម្ព័ន្ធរបស់ Bentley ដែលមាន Cities and Campuses ជាមួយនឹង Microsoft Cloud ដើម្បីបង្កើតកូនភ្លោះឌីជីថលនៃទ្រព្យសម្បត្តិសំណង់ហេដ្ឋារចនាសម្ព័ន្ធរបស់គេ។ តាមរយៈការរួមបញ្ចូលកូនភ្លោះឌីជីថលជាមួយឧបករណ៍ចាប់សញ្ញា Sensor និងឧបករណ៍ IoT ម្ចាស់ និងអ្នកគ្រប់គ្រង អាចយល់បានយ៉ាងទូលំទូលាយអំពីរបៀបដែលអគារមួយត្រូវបានប្រើប្រាស់ និងកាត់បន្ថយការប្រើប្រាស់ថាមពល ពីធាតុផ្សំ និងប្រព័ន្ធផ្សេងៗ។ អ្នកប្រើប្រាស់ក៏អាចយល់អំពីវដ្តជីវិតកាបូនរបស់អគារ និងព្យាករណ៍ពីការបំភាយកាបូននាពេលអនាគតនៅទូទាំងវដ្តជីវិតទ្រព្យសម្បត្តិ ដោយជួយពួកគេធ្វើការសម្រេចចិត្តប្រកបដោយការយល់ដឹងអំពីផែនការពង្រីក ឬកែប្រែអគារ។

ការជំរុញសម្រាប់ភាពបើកចំហ និងកិច្ចសហប្រតិបត្តិការ

អន្តរប្រតិបត្តិការ ឬលំហូរនៃទិន្នន័យទាំងប្រភេទក្រាហ្វិក និងមិនមែនក្រាហ្វិក រវាងកម្មវិធី ឬវេទិកាបច្ចេកវិទ្យា តែងតែជាបញ្ហាប្រឈមសម្រាប់ឧស្សាហកម្មនេះ។ នៅក្នុងយុគសម័យក្រោយជំងឺរាតត្បាត ការទទួលយកវេទិកាបច្ចេកវិទ្យាថ្មីៗ ដូចជា Cloud បានផ្លាស់ប្តូរទិដ្ឋភាពបច្ចេកវិទ្យា ខណៈពេលដែលបង្កើនសារៈសំខាន់ក្នុងការជំរុញឱ្យមានការបើកចំហរ។ ដូចគ្នា​នេះ​ដែរ ការ​ស្វែង​រក​វិធី​ថ្មី​ក្នុង​ការ​ធ្វើ​ការ​បាន​កើន​ឡើង។

មូលនិធិចំណាត់ថ្នាក់អន្តរជាតិស្តីពីបទដ្ឋានបច្ចេកទេស (IFC) គឺជាចំណុចស្នូលនៃវិធីសាស្រ្តជាច្រើនក្នុងការដោះស្រាយបញ្ហាទាំងនេះ។ អត្តសញ្ញាណ ISO 16739-1:2018 របស់វាត្រូវបានគេប្រើក្នុងការសាងសង់សម្រាប់អគារ (សំណង់បញ្ឈរ) ផ្តោតលើអគារអស់រយៈពេលជាច្រើនឆ្នាំ។ ដោយឡែក ស្តង់ដារ IFC4.3 ដែលត្រូវបានដាក់ជូនក្រុមប្រឹក្សា ISO បានពង្រីកវិធីសាស្រ្តនេះសម្រាប់គម្រោងសំណង់លីនេអ៊ែរ (សំណង់រាបនឹងដី) ផងដែរ ដូចជាផ្លូវ និងផ្លូវដែក ដោយសារវាជាការងារនៅពីក្រោយឆាកនៃអង្គការ buildingSMART ដើម្បីបញ្ចូលទិដ្ឋភាពផ្សេងៗនៃសំណង់ហេដ្ឋារចនាសម្ព័ន្ធទៅក្នុងស្តង់ដារ។ ស្តង់ដាររបស់ IFC គឺជាបេះដូងនៃការចែករំលែកទិន្នន័យ និងលំហូរទិន្នន័យដែលជាគ្រឹះ និងជាម៉ាស៊ីនគិតលេខដែលមានមូលដ្ឋាននៅលើ Cloud និងកំពុងតែលេចចេញជារូបរាង ដូច្នេះវានឹងរួមចំណែកជួយឧស្សាហកម្មក្នុងការជំរុញការកាត់បន្ថយកាបូនពីគម្រោងសាងសង់។

ជំងឺរាតត្បាត និងការផ្លាស់ប្តូរជាបន្តបន្ទាប់ចំពោះគំរូការងារពីចម្ងាយ បានបង្ហាញនូវបញ្ហាប្រឈមដែលត្រូវបានឆ្លើយតប ដោយពួកគេទទួលយកជម្រើសនៃការចែករំលែកការងារប្រសើរជាងមុន ដូចជា ProjectWise និង ProjectWise 365 នៅក្នុង ProjectWise Drive ។ ការផ្តល់ជូនចុងក្រោយនេះ រួមបញ្ចូលគ្នានៃកម្មវិធី ProjectWise ដោយវាបានដំណើរការទូទៅជាមួយទិន្នន័យ និងភាពងាយស្រួលរបស់ OneDrive ក្នុងកម្មវិធីរបស់ Microsoft ។

អ្នកប្រើប្រាស់ជាច្រើនកំពុងស្វែងយល់អំពីអត្ថប្រយោជន៍នៃទម្រង់ Bentley iTwin Platform ដែលជាទិន្នន័យវិស្វកម្ម ទិន្នន័យពីប្រព័ន្ធសហគ្រាស ឧបករណ៍ចាប់សញ្ញា IoT និងជាជង្រុកទិន្នន័យអាចត្រូវបាននាំយកមកជាមួយគ្នា នៅពេលយើងជ្រើសរើសប្រាស់វា។ iTwin.js—ត្រូវបានបង្កើតឡើងជាវេទិកាបើកចំហ ជាមួយនឹងកម្មវិធីប្រទាក់ក្រឡាគ្នាដែលអាចប្រើបានដោយសេរី—គឺអាចពង្រីកសម្រាប់អ្នកប្រើប្រាស់ដើម្បីបង្កើតការរួមបញ្ចូលជាមួយប្រព័ន្ធ ឬកម្មវិធីផ្សេងទៀត។ ឧទាហរណ៍ដ៏លេចធ្លោមួយ គឺសមត្ថភាពក្នុងការភ្ជាប់ទៅ APIs ខាងក្រៅដូចជា One Click LCA និង EC3 ដែលអនុញ្ញាតឱ្យទិន្នន័យរបស់គេត្រូវបានបង្ហាញដោយផ្ទាល់ពី iTwin ទៅ One Click LCA/carbon calculators។ យើង​អាច​នឹង​ឃើញ​អ្នកផ្គត់ផ្គង់ជា​ច្រើន​ទៀតនឹងបង្ហាញ ឬ​បើក APIs ដើម្បី​សម្រួល​ដល់​ការ​បើក​ចំហ និង​ការ​ចែក​រំលែក​ព័ត៌មានការងារ និងផលិតផលរបស់គេ។

ឧទាហរណ៍បន្ថែមទៀតនៃការជំរុញដល់ការបើកចំហ និងការសហការគ្នា គឺជាការតភ្ជាប់ដែលបានធ្វើឡើងតាមរយៈទម្រង់ Bentley iTwin Platform ទៅកាន់ទម្រង់ Omniverse Platform របស់ NVIDIA ដែលជាទម្រង់ Unity engine platform និង Unreal Engine Platform។ ទាំងអស់នេះ គឺជា Platform ដែលសហការដ៏មានឥទ្ធិពលមួយ ដែលត្រូវបានប្រើក្នុងឧស្សាហកម្មគូសប្លង់ ដើម្បីផ្តល់នូវដំណោះស្រាយប្រកបដោយប្រសិទ្ធភាព និងនិរន្តរភាពបន្ថែមទៀត។

 ការច្នៃប្រឌិត និងឧបសគ្គ

និយមន័យថ្មី ភាពចម្រុះជាក់ស្តែង (Mixed reality – MR) ជាការរួមបញ្ចូលគ្នារវាងរូបពិតជាក់ស្តែង (Augmented Reality – AR) ជាមួយនឹងការពិតនិម្មិត (Virtual Reality – VR) ដែលផ្តល់អត្ថប្រយោជន៍ថ្មី និងគួរការភ្ញាក់ផ្អើលចំពោះឧស្សាហកម្មសំណង់។ ការបំពាក់ MR អាចផ្តល់ឱ្យស្ថាបត្យករ និងវិស្វករនូវដំណើរទេសចរណ៍និម្មិតនៃម៉ូដែល ឬកន្លែងដែលបាន ឬត្រូវសាងសង់ ជាឧទាហរណ៍ ក្នុងគម្រោង ITER ដែលជាគម្រោងថាមពលនុយក្លេអែធំជាងគេក្នុងពិភពលោកដោយប្រើបច្ចេក Nuclear Fusion ជាដើម គឺគេអាចមើលឃើញពីគំរូពិតជាក់ស្តែងនៅក្នុងគម្រោងនេះ ដែលជាក់ស្តែង គឺមានការដាក់កំហិតតឹងរឹងក្នុងការចេញចូលទៅពិនិត្យគម្រោងនេះ។ គេក៏អាចអនុញ្ញាតឱ្យកម្មករស្តាប់ និងមើលការណែនាំជាជំហានៗសម្រាប់ការដំឡើង និងជួសជុល ហើយបន្ទាប់មកបញ្ចូលព័ត៌មាននោះទៅលើអ្វីដែលពួកគេកំពុងធ្វើការ។

ករណីប្រើប្រាស់កម្រិតខ្ពស់មួយចំនួន ក៏ត្រូវរួមបញ្ចូលផងដែរនូវអ្នកជំនាញ AEC ដែលប្រើប្រាស់ MR ដើម្បីគ្រប់គ្រងឧបករណ៍ពីចម្ងាយ ឬម្ចាស់ប្រតិបត្តិករដោយប្រើ MR ដើម្បីត្រួតពិនិត្យដូចជាប្រព័ន្ធភ្លើង HVAC និងប្រព័ន្ធគ្រប់គ្រងការចូលបញ្ជាពីចម្ងាយ។ ធាតុចូលពីការស្កែនឡាស៊ែរ ឬការថតរូបភាពនៃគេហទំព័រ ឬអគារដែលមានស្រាប់អាចត្រូវបានបញ្ចូលទៅក្នុងកម្មវិធីឆ្លាតវៃសិប្បនិម្មិត AI និងម៉ាស៊ីនសិក្សា Machine Learning ផងដែរ ដើម្បីដាក់ផ្លាកឈ្មោះឧបករណ៍ ឬទ្រព្យសម្បត្តិដោយស្វ័យប្រវត្តិ ដែលអាចកាត់បន្ថយការងារធ្វើដោយដៃ ខណៈពេលដែលវាអាចធានាបាននូវភាពត្រឹមត្រូវកម្រិតខ្ពស់ និងសន្សំសំចៃពេលវេលា។

អនាគតនៃបច្ចេកវិទ្យា MR នៅក្នុងឧស្សាហកម្ម AEC ទំនងជាមានការចាប់អារម្មណ៍ច្រើន។ ទីបំផុត ការទទួលយកបច្ចេកវិទ្យានេះកាន់តែទូលំទូលាយសម្រាប់ឧស្សាហកម្មមួយនេះ ដើម្បីឆ្លងកាត់ការផ្លាស់ប្តូរឌីជីថល និងភាពចាស់ទុំនៃបច្ចេកវិទ្យានៅក្នុងស្ថាប័នរបស់ខ្លួន។

ឧស្សាហកម្ម AEC កំពុងឆ្លងកាត់ការផ្លាស់ប្តូរគំរូដ៏សំខាន់មួយ ដោយសារវាផ្លាស់ប្តូរពីបរិយាកាសរូបវន្តទៅជាបរិយាកាសនិម្មិត។ អត្ថបទនេះបានគ្របដណ្តប់ឱកាសមួយចំនួននៅក្នុងឧស្សាហកម្ម AEC សម្រាប់ក្រុមហ៊ុនវិស្វកម្ម និងស្ថាបត្យកម្ម ក៏ដូចជាម្ចាស់ អ្នកគ្រប់គ្រង ឬប្រតិបត្តិករ ដែលមានបំណងផ្លាស់ប្តូរខ្លួនឯងជាមួយនឹងបច្ចេកវិទ្យាដែលកំពុងវិវត្ត។

អ្នកនិពន្ធ៖ Brenden Roche គឺជាអ្នកជំនាញផ្នែកផលិតផលសម្រាប់វិស្វកម្មគ្រឿងបរិក្ខារក្នុងក្រុមហ៊ុន Bentley Systems។
ប្រែសម្រួលជាភាសាខ្មែរក្រៅផ្លូវការដោយ ព័ត៌មានសំណង់ និងអចលនទ្រព្យ

• អត្ថបទផ្សព្វផ្សាយ
• ចំណេះដឹង និង បទពិសោធន៍
• ធុរកិច្ច និងទីផ្សារ
• បច្ចេកវិទ្យា និងវិស្វកម្ម
• Bentley