ទំនោររស់នៅក្នុងអគារខុនដូ Penthouse ក្នុងរាជធានីភ្នំពេញ

• 3 ខែ​តុលា 2017
• ព័ត៌មានអចលនទ្រព្យ
• 7 មើល

ដោយសារតែការផ្គត់ផ្គង់អគារខុនដូកាលពីមុននៅមានកម្រិត ដែលធ្លាប់តែមានផ្ទះល្វែងតូចៗប៉ុណ្ណោះនៅលើទីផ្សារ។ ប៉ុន្តែបច្ចុប្បន្ននេះ គម្រោងថ្មីៗផ្តល់ជូននូវយូនីត ឬផ្ទះជាន់លើគេបង្អស់ជាច្រើន។

ទំហំជាមធ្យមនៃយូនីតជាន់លើគេបង្អស់ មានតម្លៃចាប់ពី ៣០០ ទៅ ៥០០ ដុល្លារក្នុងមួយម៉ែត្រការ៉េ។ សម្រាប់យូនីតខុនដូទូទៅ តម្រូវការទិញ គឺមកពីវិនិយោគិនទិញសម្រាប់ជួល អ្នកទិញសម្រាប់ប្រើប្រាស់ និងអ្នកទិញទុកសម្រាប់ពេលឡើងថ្លៃលក់ទៅវិញ ប៉ុន្តែសម្រាប់យូនីតជាន់លើគេបង្អស់ តម្រូវការទិញភាគច្រើនគឺមកពីអ្នកទិញសម្រាប់ប្រើប្រាស់ ឬរស់នៅ ព្រោះថាមានតែអ្នកទិញតិចតួចប៉ុណ្ណោះដែលមានលទ្ធភាពទិញ ឬហ៊ានចំណាយដើម្បីជួលយូនីតជាន់លើគេបង្អស់ទំហំធំបែបនេះ។

សម្រាប់ទស្សនៈរបស់វិនិយោគិន វាក៏ពិបាកផងដែរសម្រាប់ពួកគេក្នុងការទទួលផលគ្រប់គ្រាន់ពីការវិនិយោគនេះ ព្រោះថាតម្លៃយូនីតជាន់លើគេបង្អស់នេះជាទូទៅគឺមានតម្លៃខ្ពស់ ហើយការជួលត្រូវបានកំណត់កម្រិតនៅក្នុងកម្រិតជាក់លាក់មួយ។

យូនីតជាន់លើគេបង្អស់នៅក្នុងគម្រោងខុនដូថ្មីៗនៅតាមទីតាំងសំខាន់ៗមានតម្លៃខ្ពស់។ បច្ចុប្បន្នតំបន់បឹងកេងកង១ និងកោះពេជ្រ គឺជាទីតាំងដ៏ល្អបំផុតសម្រាប់អ្នកទិញយូនីតជាន់លើគេបង្អស់ ព្រោះថាវាជាតំបន់លំនៅឋានដ៏សំខាន់របស់រាជធានីភ្នំពេញ បន្ទាប់មកគឺតំបន់ទួលគោក ជ្រោយចង្វារ និងតំបន់មាត់ទន្លេផ្សេងៗទៀត។ តម្លៃយូនីតជាន់លើគេបង្អស់បច្ចុប្បន្នអាចមានតម្លៃដល់ទៅ ៥.០០០ដុល្លារក្នុងមួយម៉ែត្រការ៉េ ខណៈដែលយូនីតនៅអាគារចាស់ៗ តែមានទំហំធំជាង មានតម្លៃពី ៣.០០០ ទៅ ៤.០០០ដុល្លារប៉ុណ្ណោះក្នុងមួយម៉ែត្រការ៉េ។

ខណៈដែលអ្នកជំនាន់ក្រោយចូលចិត្តរស់នៅក្នុងបន្ទប់ខុនដូដែលពួកគេអាចនៅជិតកន្លែងធ្វើការរបស់ពួកគេ ផ្ទះ ឬបន្ទប់ជាន់លើគេបង្អស់បានក្លាយជាជម្រើសដ៏ល្អ ក្រៅពីផ្ទះល្វែង និងវីឡានៅក្នុងតំបន់សំខាន់ៗនៃរាជធានីភ្នំពេញ។ នៅក្នុងទីផ្សារបច្ចុប្បន្ន វាជាការពិបាកក្នុងការស្វែងរកវីឡាសម្រាប់លក់នៅក្នុងតំបន់សំខាន់ៗ ព្រោះមានម្ចាស់តិចតួចណាស់ដែលមានបំណងចង់លក់វា ឬបើពួកគេលក់វាវីឡានោះ វានឹងត្រូវបានផ្លាស់ប្តូរទៅជាអគារខុនដូខ្ពស់ៗ ឬជាអាផាតមិនមិនខាន ព្រោះថាតម្លៃដីដែលចេះតែបន្តកើនឡើង បានធ្វើឲ្យការវិនិយោគនៅក្នុងអគារមានដង់ស៊ីតេខ្ពស់កាន់តែមានភាពទាក់ទាញ។

លោក Chhayleang Nguon នាយកប្រតិបត្តិក្រុមហ៊ុន Ratanaka Realty បានមានប្រសាសន៍ថា “ដោយមើលឃើញបញ្ហាចរាចរណ៍បច្ចុប្បន្ននៅរាជធានីភ្នំពេញ ខ្ញុំគិតថាប្រសិនបើអ្នកទិញយូនីតជាន់លើគេបង្អស់ជាអ្នកទិញក្នុងស្រុក ពួកគេទំនងជាចង់ផ្លាស់ទៅរស់នៅក្នុងផ្ទះទាំងនេះ។ ដោយឡែក ចំពោះអ្នកដែលមិនរស់នៅក្នុងរាជធានីភ្នំពេញ ពួកគេនឹងដាក់យូនីតទាំងនេះសម្រាប់ជួល”។

យ៉ាងណាក៏ដោយ លោកស្រី ចាន់ ម្លប់សុខា មកពីការិយាល័យមេធាវីសុខា មានទស្សនៈផ្ទុយគ្នា ដោយលោកស្រីជឿជាក់ថា “អ្នកទិញក្នុងស្រុក ឬវិនិយោគិន នឹងទិញយូនីតឬផ្ទះជាន់លើគេបង្អស់នេះសម្រាប់តែជួលទៅឲ្យអ្នកផ្សេងប៉ុណ្ណោះ។ ពួកគេនៅតែចង់រស់នៅក្នុងផ្ទះនៅលើដី។”

ការទិញដីនិងសាងសង់ផ្ទះប្រណីតនៅតាមតំបន់សំខាន់ៗនៃរាជធានីភ្នំពេញ នឹងត្រូវចំណាយជាមធ្យមយ៉ាងហោចណាស់ ៣លានដុល្លារអាមេរិក។ ម្យ៉ាងវិញទៀត ភាពលំបាកក្នុងការទទួលបានដីនិងការសាងសង់ធ្វើឲ្យវាក្លាយជាជម្រើសមិនសូវទាក់ទាញសម្រាប់អ្នកទិញភាគច្រើន។

ដោយសារតែកត្តាតម្លៃ និងភាពលំបាកជាច្រើននោះ បច្ចុប្បន្នអ្នកទិញជាច្រើនជ្រើសយកភាពងាយស្រួល មានកន្លែងផ្តល់សេវាកម្មសន្តិសុខ និងទេសភាពនៃយូនីតជាន់លើគេបង្អស់ ដែលផ្តល់ជូនដោយគម្រោងខុនដូ។

ជាមួយនឹងតម្រូវការកើនឡើងសម្រាប់យូនីតនៅជាន់លើគេបង្អស់ លក្ខណៈពិសេសរបស់យូនីតទាំងនេះក៏មានការវិវត្តន៍ផងដែរ។ យូនីតនៅជាន់លើគេបង្អស់ អាចត្រូវបានផ្តល់ជូនជាលក្ខណៈបន្ទប់ទទេរ ព្រោះថាអ្នកទិញដែលមានថវិកាច្រើន ជាញឹកញាប់ចង់រៀបចំយូនីតរបស់ពួកគេឲ្យស្របទៅតាមចំណង់ចំណូលចិត្តសម្ភារ និងស្ទាយផ្ទាល់ខ្លួនរបស់ពួកគេ។ យូនីតទាំងនេះក៏អាចត្រូវបានផ្តល់ជូនដោយមានបំពាក់បរិក្ខារពេញលេញ រួមទាំងបន្ទប់ទឹក និងផ្ទះបាយដែលមានបរិក្ខារគ្រប់។

ព្រោះតែតម្លៃខ្ពស់ អ្នកទិញយូនីតនៅជាន់លើគេបង្អស់ភាគច្រើនមានការព្រួយបារម្ភជាពិសេសអំពីការរចនា ហើយវាត្រូវតែតម្រូវទៅតាមការចង់បានរបស់ពួកគេ ដូចជាចំនួនបន្ទប់គេង លក្ខណៈខាងក្រៅ ប្រភេទបន្ទប់ និងទំហំជាដើម។ នាពេលអនាគត និន្នាការគឺថាយូនីតជាន់លើគេបង្អស់ដែលមានគ្រឿងសង្ហារឹមគ្រប់គ្រាន់ឆ្លើយតបទៅនឹងតម្រូវការ និងចំណូលចិត្តរបស់អ្នកទិញ នឹងមានការពេញនិយម។

នៅពេលអនាគត យូនីតជាន់លើគេបង្អស់នឹងក្លាយទៅជាជម្រើសសម្រាប់អ្នកទិញជនជាតិខ្មែរដែលជាអ្នកមាន និងដែលចូលចិត្តរស់នៅក្នុងតំបន់សំខាន់ៗនៃរាជធានីភ្នំពេញ ជាមួយនិងទីកន្លែងធំទូលាយ និងមានភាពផ្តាច់មុខ។ ក្នុងនាមជាអ្នកអភិវឌ្ឍន៍ បញ្ហាប្រឈមគឺត្រូវអាចកែសម្រួល និងរៀបចំរចនាម៉ូដអគាររបស់ពួកគេ ដើម្បីបំពេញតម្រូវការ និងចំណង់ចំណូលចិត្តផ្ទាល់ខ្លួនរបស់អ្នកទិញយូនីត ឬផ្ទះជាន់លើគេបង្អស់ ។

• គម្រោងអភិវឌ្ឍន៍
• គម្រោងអភិវឌ្ឍន៍