ផ្សារទំនើប The Peak នឹងគ្រប់គ្រងដោយក្រុមហ៊ុនស្តង់ដាពិភពលោក CapitaLand

21 ខែមីនា 2018
ព័ត៌មានអចលនទ្រព្យ
10 មើល

ក្រុមហ៊ុនអចលនទ្រព្យធំបំផុតមួយនៅអាស៊ី CapitaLand កាលពីថ្មីនេះបានចុះកិច្ចព្រមព្រៀងជាមួយក្រុមហ៊ុនក្នុងស្រុក Worldbridge Land ដើម្បីចូលមកគ្រប់គ្រង ផ្សារទំនើបនៅក្នុងគម្រោង The Peak ដែលនឹងបើកដំណើរការក្នុងឆ្នាំ ២០២០ ខាងមុខនេះ។

ផ្សារទំនើបមួយនេះមានកម្ពស់ ៥ ជាន់ មានផ្ទៃដីក្រឡាសរុបជាងប្រមាណ៤០.០០០ ម៉ែត្រការ៉េ (មិនរាប់បញ្ចូលកន្លែងចតរយន្ត) សំរាប់ផ្ទៃដីក្រឡាសម្រាប់ជួល (Net Lettable Area) មានប្រមាណ ២៤.០០០ ម៉ែត្រការ៉េ។ វាជាផ្នែកមួយនៃគម្រោង The Peak ដែលជាអគារអភិវឌ្ឍចម្រុះ ៥៥ ជាន់ស្ថិតនៅក្នុងខណ្ឌចំការមន ក្រោមការបណ្ដាក់ទុនរបស់ក្រុមហ៊ុន Oxley ជាមួយក្រុមហ៊ុនកម្ពុជា Worldbridge Land ។

បច្ចុប្បន្នគម្រោងមួយនេះកំពុងស្ថិតក្នុងការសាងសង់ហើយរំពឹងថានឹងដាក់ឱ្យដំណើរការនៅឆ្នាំ ២០២០ ។

ទាក់ទងនឹងការគ្រប់គ្រងក្នុងផ្សារទំនើបមួយនេះ ក្រុមហ៊ុនCapitaLand នឹងត្រួតពិនិត្យការងារជារួមដូចជា ការរៀបចំផែនការ គ្រប់គ្រងរាល់ទ្រព្យសម្បត្តិផ្សេងៗរបស់ក្រុមហ៊ុន ការបើកសម្ពោធ និងការគ្រប់គ្រងផ្នែកជួល។

នៅរាជធានីភ្នំពេញក្រុមហ៊ុន CapitaLand ក៏បានគ្រប់គ្រងអគារស្នាក់នៅ ៣ កន្លែងផ្សេងទៀតផងដែររួមមាន CASA Meridian Residence, Somerset Norodom Phnom Penh និង Somerset Meridian Square Phnom Penh ដែលនឹងបើកដំណើរការនៅឆ្នាំនេះនិងឆ្នាំក្រោយ។