អ្នកជំនាញ៖ ការវិនិយោគលើអចលនទ្រព្យនឹងមានសន្ទុះខ្លាំងក្រោយការបោះឆ្នោត

• 18 ខែ​កក្កដា 2018
• ព័ត៌មានអចលនទ្រព្យ
• 9 មើល

រាជធានីភ្នំពេញ

អ្នកជំនាញនិងអ្នកវិភាគអចលនទ្រព្យបានព្យាករណ៍ថា ការវិនិយោគលើវិស័យអចលនទ្រព្យនឹងមានការកើនឡើងគួរឲ្យកត់សំគាល់ បន្ទាប់ពីការបោះឆ្នោតថ្នាក់ជាតិកាលពីថ្ងៃទី ២៩ ខែកក្កដានេះរួច ដោយអះអាងថាស្ថេរភាពនយោបាយជាកត្តាជំរុញឲ្យមានការវិនិយោគច្រើនជាងមុន ទាំងអ្នកវិនិយោគក្នុងនិងក្រៅប្រទេស។

ការវិនិយោគលើវិស័យអចលនទ្រព្យក្នុងប្រទេសនៅរយៈពេល ៦ខែ ដំបូងនៃ២០១៨ គឺពុំសូវមានសន្ទុះប៉ុន្មានទេ ឬអាចនិយាយបានថាវានៅទ្រឹង ឬកើនឡើងបន្ដិចបន្តួចតែប៉ុណ្ណោះ។ មូលហេតុគឺដោយសារតែជិតបោះឆ្នោត ដូច្នេះហើយ អ្នកវិនិយោគពុំសូវចង់វិនិយោគលើគម្រោងធំៗ ឬទិញអចលនទ្រព្យប៉ុន្មានទេ។ នេះបើយោងតាមការវិភាគរបស់លោក សន សៀប ដែលជាស្ថាបនិក និងជានាយកនៃក្រុមហ៊ុន Key Real Estate Co., Ltd. និងជាអ្នកឯកទេសផ្នែកអចលនទ្រព្យដ៏ល្បីល្បាញមួយរូបនៅក្នុងប្រទេសកម្ពុជា។

លោកបានពន្យល់ទៀតថា អ្នកវិនិយោគភាគច្រើនរង់ចាំឲ្យបោះឆ្នោតរួច ព្រោះថាកត្តាស្ថេរភាពនយោបាយ គឺជាកត្តាចាំបាច់ដែលបង្កើតទំនុកចិត្តដល់អ្នកវិនិយោគ។

យោងតាមការស្ទង់មតិដែលធ្វើឡើងដោយក្រុមហ៊ុន Key Real Estate Co., Ltd បានឲ្យដឹងថា តម្លៃដីធ្លីនៅក្នុងរាជធានីភ្នំពេញទាំងមូល ក្នុងអំឡុងពេល ៦ខែដំបូងក្នុងឆ្នាំ ២០១៨ មានការកើនឡើងត្រឹមតែបន្តិចបន្តួចប៉ុណ្ណោះ។ ខណ្ឌដែលមានតម្លៃដីខ្ពស់ក៏នៅតែជាខណ្ឌដូនពេញ ខណ្ឌ៧មករា ខណ្ឌចំការមន និងខណ្ឌទួលគោក ដែលតម្លែដីក្នុងសង្កាត់ផ្សារថ្មីគឺថ្លៃរហូតដល់ទៅ ៨៨០០ ដុល្លារក្នុងមួយម៉ែត្រការ៉េ។ ហើយ លោក សន សៀប បានព្យាករណ៍ថាតួលេខនេះនឹងកើនឡើងទៀត បន្ទាប់ពីការបោះឆ្នោតរួច។

លោកបានបន្តទៀតថា ទីផ្សារអចលនទ្រព្យនៅកម្ពុជាគឺដើរដល់វ័យជំទង់ហើយ ក្នុងវ័យនេះជាទូទៅ តម្លៃអចលនទ្រព្យ ជាពិសេសតម្លៃដី ពីមួយឆ្នាំទៅមួយឆ្នាំគឺមិនសូវស្ទុះខ្លាំងដូចកាលពី ៥ ទៅ ១០ ឆ្នាំមុននោះទេ។ ប៉ុន្តែក៏នៅតែមានកំណើនជាបន្តបន្ទាប់។

យោងតាមសារព័ត៌មាន AKP ប្រធាននិងនាយកប្រតិបត្តិនៃក្រុមហ៊ុន Century 21 Imperial Realty Co., Ltd. លោក Ken Lo ស្របគ្នានេះដែរ ក៏បានព្យាករណ៍ជាវិជ្ជមានលើទីផ្សារអចលនទ្រព្យនៅកម្ពុជាថាបន្ទាប់ពីការបោះឆ្នោតរួចផងដែរ។

លោកក៏បានលើកទឹកចិត្តដល់អ្នកវិនិយោគ ម្ចាស់គម្រោង ក៏ដូចជាអ្នកដែលពាក់ព័ន្ធក្នុងទ្រព្យសម្បត្តិទាំងអស់ បន្តរក្សាគុណភាពការងារឲ្យរឹងមាំ និងកសាងទំនុកចិត្តអតិថិជនឲ្យបានល្អ។

• គម្រោងអភិវឌ្ឍន៍
• ធុរកិច្ច និងទីផ្សារ
• គម្រោងអភិវឌ្ឍន៍
• ធុរកិច្ច និងទីផ្សារ