កម្ពុជា-ចិនរួមគ្នាបង្កើតទីក្រុងពាណិជ្ជកម្មដ៏ធំមួយនៅខេត្តព្រះសីហនុ

25 ខែមករា 2019
Uncategorized @km
9 មើល

ខេត្តព្រះសីហនុកំពុងត្រៀមខ្លួនស្វាគមន៍ទីក្រុងពាណិជ្ជកម្មដ៏ធំមួយដែលជាការវិនិយោគរួមគ្នារវាងក្រុមហ៊ុនអភិវឌ្ឍន៍ក្នុងស្រុកនិងវិនិយោគិនចិន។

កាលពីពេលថ្មីៗកន្លងទៅនេះ ក្រុមហ៊ុនអភិវឌ្ឍន៍ K99 Group បានដាក់សម្ពោធដំណើរការសាងសង់ជាផ្លូវការគម្រោងទីក្រុងពាណិជ្ជកម្មឈ្មោះថា «ទីក្រុងរស្មីមង្គល»ក្រោមទុនវិនិយោគរហូតដល់ទៅប្រមាណជា៧០ លានដុល្លារអារមេរិកដែលជាការវិនិយោគរួមគ្នារវាងក្រុមហ៊ុននិងវិនិយោគិនចិន។

គម្រោង«ទីក្រុងរស្មីមង្គល»គឺរួមបញ្ចូលការសាងសង់អគារពាណិជ្ជកម្ម សណ្ឋាគារ អគារស្នាក់នៅសរុបចំនួន៣៦អគារដែលអគារទាំងនេះនឹងលាតសន្ធឹងលើផ្ទៃដីទំហំរហូតដល់ទៅ ១០ហិកតានៃតំបន់អូរត្រះដែលកំពុងមានសក្តានុពលក្នុងខេត្តព្រះសីហនុ។

ថ្លែងទៅកាន់បណ្តាសារព័ត៌មានក្នុងពិធីខាងលើ លោក ឫទ្ធី រស្មី អគ្គនាយកក្រុមហ៊ុន K99 Group បានឲ្យដឹងថា ការបង្កើតទីក្រុងពាណិជ្ជកម្មនេះឡើងគឺដើម្បីចូលបង្កើតការងារដល់ប្រជាពលរដ្ឋ កាត់បន្ថយបញ្ហាចំណាកស្រុក ព្រមទាំងលើកកម្ពស់មុខមាត់ខេត្តព្រះសីហនុបន្ថែមមួយកម្រិតទៀត។

ដោយឡែក ទាក់ទងទៅនឹងរយៈពេលនៃការសាងសង់វិញ តំណាងក្រុមហ៊ុនខាងលើបានប្រាប់ទស្សនាវដ្តីសំណង់និងអចលនទ្រព្យយើងខ្ញុំថា ក្រុមហ៊ុននឹងបញ្ចប់ការសាងសង់សម្រាប់ដំណាក់កាលទីមួយក្នុងរយៈពេល៦ខែ។