រោងចក្រសូឡាទំហំ១១៥ហិកតានឹងជួយបន្ថយឧស្ម័នផ្ទះកញ្ចក់នៅកម្ពុជា

• 18 ខែ​កុម្ភៈ 2019
• Uncategorized @km
• 8 មើល

គម្រោងបង្កើតរោងចក្រផលិតអគ្គីសនីពីពន្លឺព្រះអាទិត្យ ទំហំ១១៥ហិកតានៅខេត្តកំពង់ស្ពឺ នឹងជួយកាត់បន្ថយការបញ្ចញឧស្ម័នផ្ទះកញ្ចក់នៅកម្ពុជាបានយ៉ាងច្រើន នេះបើយោងតាមលទ្ធផលនៃកិច្ចប្រជុំអន្តរក្រសួងលើ គម្រោងអភិវឌ្ឍន៍មួយនេះ។

យោងតាមការចុះផ្សាយលើទំព័រហ្វ៊េសប៊ុក ក្រសួងបរិស្ថាន កិច្ចប្រជុំអន្តរក្រសួងកាលពីសប្តាហ៍មុនកន្លងទៅនេះ បានពិនិត្យឃើញថា គម្រោងអភិវឌ្ឍន៍រោងចក្រផលិតអគ្គីសនីពីពន្លឺព្រះអាទិត្យដោយក្រុមហ៊ុន SchneiTec Group គឺពិតជាមានសារ:ប្រយោជន៍ណាស់សម្រាប់ប្រទេសកម្ពុជា ដោយថ្លៃអគ្គិសនីលក់ជូនអគ្គិសនីកម្ពុជាគឺក្នុងតម្លៃ ៧,៦ សេនដុល្លាក្នុងមួយគីឡូវ៉ាត់ម៉ោង។ ជាងនេះទៅទៀត គម្រោងនេះនឹងជួយកាត់បន្ថយការបញ្ចញឧស្ម័នផ្ទះកញ្ចក់បានច្រើនទៀតផង។

ជាមួយគ្នានេះដែរ កិច្ចប្រជុំខាងលើបានពិភាក្សាលើចំណុចសំខាន់ៗចំនួន៦រួមមាន៖

១-ធ្វើការពិនិត្យ វិភាគ និងបង្ហាញពីលក្ខណៈ និងព័ត៌មានរបស់គម្រោងអភិវឌ្ឍន៍ និងបង្កើតស្ថានីយផលិតអគ្គិសនីដើរដោយពន្លឺព្រះអាទិត្យកម្លាំង៦០មេហ្គាវ៉ាត់លើផ្ទៃដីទំហំ១១៥ហិកតា
២-សិក្សាអំពីធនធានរូបសាស្រ្ត ធនធានជីវសាស្រ្ត និងធនធានសេដ្ឋកិច្ចសង្គមនៅក្នុង និងជុំវិញតំបន់គម្រោងដើម្បីជាទិន្ន័យគោលមួយក្នុងការវាយតម្លៃហេតុប៉ះពាល់បរិស្ថាន និងសង្គម
៣-រៀបចំកិច្ចពិគ្រោះយោបល់ជាមួយប្រជាពលរដ្ឋ អាជ្ញាធរមូលដ្ឋាន និងមន្ទីរជំនាញពាក់ព័ន្ធសម្រាប់ផ្តល់យោបល់លើគម្រោង
៤-កំណត់ទំហំនៃហេតុប៉ះពាល់បរិស្ថានទៅលើធនធានបរិស្ថានធម្មជាតិ និងបរិស្ថានសង្គមដែលមានស្រាប់ នៅក្នុងតំបន់សិក្សាទាំងវិជ្ជមាន និងអវិជ្ជមានដោយសារសកម្មភាពដំណើរការរបស់គម្រោង
៥-កំណត់នូវវិធានការកាត់បន្ថយហេតុប៉ះពាល់បរិស្ថាន និងសង្គម (អវិជ្ជមាន)ដែលអាចកើតមានឡើងពីសកម្មភាពគម្រោងអោយដល់កំរិតអប្បបរមា
៦-វិភាគតម្លៃសេដ្ឋកិច្ច និងតម្លៃបរិស្ថាន ទាំងផ្នែកវិជ្ជមាន និងអវិជ្ជមាន
៧-រៀបចំមូលនិធិបរិស្ថាន និងសង្គមដើម្បីស្តារបរិស្ថានឡើងវិញនិងចូលរួមអភិវឌ្ឍន៍ភូមិ ឃុំដែលពាក់ព័ន្ធនឹងគម្រោងវិនិយោគ។

គួររម្លឹកថា គម្រោងខាងលើនឹងមានបំពាក់ផ្ទាំងកញ្ចក់សូឡារហូតដល់ទៅ ២០០ ០០០ ផ្ទាំងដោយក្រុមហ៊ុនផលិតនិងផ្គត់ផ្គង់ផ្ទាំងកញ្ចក់សូឡាដ៏ធំមួយក្នុងពិភពលោកឈ្មោះថា JinkoSolar Holding Co., Ltd។ អានបន្ថែម

• គម្រោងអភិវឌ្ឍន៍
• នគរូបនីយកម្ម និងស្ថាបត្យកម្ម
• Projects Development
• គម្រោងអភិវឌ្ឍន៍
• Urbanization and Architect