សណ្ឋាគារលំដាប់ពិភពលោកពីអង់គ្លេសគ្រោងបើកសាខានៅកម្ពុជា

• 19 ខែ​កក្កដា 2019
• ព័ត៌មានអចលនទ្រព្យ
• 9 មើល

សណ្ឋាគារលំដាប់កំពូលមានឈ្មោះល្បីនៅប្រទេសអង់គ្លេស Yoo Hotels and Resorts គ្រោងបើកសាខាសណ្ឋាគាររបស់ខ្លួន នៅប្រទេសកម្ពុជា ដែលគម្រោងនេះគឺដើម្បីឆ្លើយតបទៅនឹងកំណើនទេសចរណ៍នៅក្នុងប្រទេសដែលកំពុងតែកើនឡើង។

យោងតាមគេហទំព័រព័ត៌មាន Hospitality Net សណ្ឋាគារ Yoo Hotels and Resorts នឹងពង្រីកសាខារបស់ខ្លួន នៅតំបន់អាស៊ីអាគ្នេយ៏ នៅក្នុងចន្លោះបីឆ្នាំ ទៅប្រាំឆ្នាំខាងមុខ។ គម្រោងនេះមានឈ្មោះថា “Yoo2 Lifestyle Brand” ដែលនឹងមានវត្តមានដំបូងគេនៅកម្ពុជា។

ប្រភពដដែលបន្តថា គម្រោងរបស់សណ្ឋាគារនេះ គឺគ្រោងបើកសាខាសណ្ឋាគារ និងកន្លែងកម្សាន្តរមណីដ្ឋាន យ៉ាងតិច ចំនួន២០កន្លែង នៅប្រទេសកម្ពុជា វៀតណាម ថៃ ឥណ្ឌូនេស៊ី និងហ្វីលីពីន។

លោកស្រី ខៃ ចិន្តា ប្រធានសមាគមសណ្ឋាគារកម្ពុជា យល់ឃើញថា កំណើនភ្ញៀវទេសចរបរទេសចូលក្នុងប្រទេសកម្ពុជា បានជំរុញឲ្យមានការវិនិយោគបន្ថែម លើសេវាស្នាក់នៅ។

លោកស្រីលើកឡើងថា ខណៈពេលដែលវិស័យទេសចរណ៍កំពុងតែកើនឡើង ហេដ្ឋារចនាសម្ព័ន្ធ រួមមានផ្នែកស្នាក់នៅ សណ្ឋាគារ និងភោជនីយដ្ឋានជាដើម នៅមិនទាន់ឆ្លើយតបទៅនឹងតម្រូវការនៅឡើយទេ។

លោកស្រី ខៃ ចិន្តា ថ្លែងថា៖ «យើងឃើញហើយថា កំណើនទេសចរណ៍កើនឡើងជាបន្តបន្ទាប់ ប៉ុន្តែបើក្រឡេកមើលហេដ្ឋារចនាសម្ព័ន្ធដូចជា សេវាស្នាក់នៅ ភោជនីដ្ឋាន និងផលិតផលទេសចរណ៍ថ្មីៗ នៅមិនទាន់ឆ្លើយតបនៅឡើយទេ ដូចច្នេះយើងត្រូវពង្រីកបន្ថែម និងត្រូវការការវិនិយោគបន្ថែម ជាពិសេស ស្របតាមស្តង់ដារអន្តរជាតិ ដើម្បីឆ្លើយតបទៅនឹងតម្រូវការភ្ញៀវទេសចរ។ ជាពិសេសនៅពេលភ្ញៀវទេសចរបរទេសរំពឹងថានឹងចូលមកកម្ពុជា ពី៨លាននាក់ ទៅ១០លាននាក់ នៅពេលខាងមុខ ខណៈនោះយើងនឹងខ្វះបន្ទប់សម្រាប់ស្នាក់នៅ»។

សណ្ឋាគារ Yoo Hotels and Resorts គឺជាសណ្ឋាគារនាំមុខដែលមានការទទួលស្គាល់ក្នុងវិស័យសណ្ឋាគារលើពិភពលោក។ បច្ចុប្បន្ន សណ្ឋាគារនេះមានសាខា នៅក្នុងប្រទេសចំនួន ៣២ប្រទេស ដូចជា នៅប្រទេសប្រេស៊ីល ឥណ្ឌា វៀតណាម រុស្ស៊ី សហរដ្ឋអាមេរិក អ៊ីតាលី តួកគី អ៊ីស្រាអែល ថៃ និងកូស្តារីកា៕

• គម្រោងអភិវឌ្ឍន៍
• ធុរកិច្ច និងទីផ្សារ
• គម្រោងអភិវឌ្ឍន៍
• ធុរកិច្ច និងទីផ្សារ